Tuesday, May 29, 2007

أحلام على ورق

كل واحد أكيد جواه حلم ونفسه يحققه وبيفكر ويتكتك انه يوصله وواحد تانى بيحلم بحاجة وهو متأكد أنها عمرها مهتحقق
تقدروا تشاركونى فى أحلامكو يمكن واحد مننا حلمه يتحقق من خلال آراءكم ومقترحاتكم
انا حلمى الشخصى .......نفسى قوى أكون سعيدة وراضية بالمقسوم من ربنا سواء حاجة حلوة بترضينى أو محنة بمر بيها عاوزة أكون مستمتعة ومبسوطة بيها، انا طبعا بحاول جاهدة، أوقات بتصيب وأوقات بتخيب واهى ماشية
يلا.......أحلامكم ايه
حلمت بأيه النهاردة
ســــــلام

35 comments:

fanan fa2eer said...

باحلم ان بكرة يكون أحلي
وكمان ييجي بسرعة ولو مش أحلي خليه مكانه مايجيش
باحلم اني أعيش حياة جميلة مع شخص أجمل ويكون هو كل حياتي وأكون حاسة اني أسعد واحدة في الدنيا وتكون الدنيا مخبيالي أيام جميلة
أنا عارف اني باحلم والحلم جميل وبيحلالي:)))
ربنا يحققلك أحلامك

عصفور المدينة said...

أهم هدف انت واضعه لحياتك الآن؟
سؤال صعب جدا الأهداف تتغير بين لحظة واخرى فعلا بدون مبالغة ففيه أهداف كثيرة استراتيجية وفيه أهداف بتكون تكتيكية لحظية - لكن نفسي أنطق الشهادتين عند الموت وثاني الأولويات أوصل لأولادي ما توصلت إليه من خبرات وأخلاقيات والله المستعان وأهم شيء أن يقوم الإنسان بواجب الوقت وأن يحذر دائما أن يراه الله حيث نهاه أو أن يفتقده حيث أمره

حلم كدة ع الماشي نفسي أوصل للجلسة المريحة التي أكون فيها في كامل الاسترخاء

Noony said...

بحلم أموت وربي وأهلي مش غضبانين عليا
بحلم إني أكون مترجمة إسلامية كويسة عشان أوصل الإسلام الصح لغير المسلمين
نفسي حد يفهمني ويحترمني وأبقى كل حياته وياخدني كدة كلي على بعضي بعيوبي قبل أي حاجة تانية أتميز بيها
نفسي أفرح وأفرَّح كل الناس حواليا

ربنا يحققلك كل أحلامك يا رب
:)
نوني

اسكندراني في الغربة said...

بحلم محدش يسافر برة بلدة غير للفسحة و يرجع بسرعة

انتظار مؤقت said...

doba
شكرا على سؤالك عليه يا قمر و بلمناسبه حلمي كتبتو عندي في المدونه يمكن ميعجبكيش ..و لينا كلام

انتظار مؤقت said...

اسكندراني في الغربه ..ده اجمل حلم في الدنيا ان معاك في دي

Mirage said...

انا عن نفسى عايز افتح الجامعة انا والشنكوتى :)

وبعد كده افكر بقى اشترى عربية وشقة وهلم جرا

الشنكوتي الكبير said...

انت يا دوبه تستاهلي عشره على عشره
عشان انا كنت عايز اعمل بوست عن الحلم بتاعي النهارده لكن انتي سبقتيني يا سكره
امبارح قابلت مدير التكاليف عندنا وكالعاده هزرت معاه وسألته يا استاذ محمد مش ناوي تشغلني معاك يا عم
ولأنه شخص محترم جدا قعد معايا شويه يكلمني عن الحاجات اللي المفروض اعملها عشان اطور نفسي
واصبح عندي حلم جديد اني ادرس modern accounting in the AUC
انا عارف ان الموضوع مكلف جدا
وومكن مقدرش احققه بس لنل نفسي جدا احقق الحلم ده
بس طبعا قبل اي حلم فيه اهم امل لكل واحد انه يرضي ربنا ويقدر يتغلب على ضعف نفسه وشهواتها
تسلمي يا هبوب وليكي عندي جايزه حلوه على البوست اللي جه في وقته بالظبط

____________________
يا ميراج الجامعه بتاعتنا محتاجه شوية اوراق كده انا هانزل اسأل على التراخيص والمكان ظبط لنا كده كام تلميذ ولم منهم المصاريف عشان نعرف نبتدي
دي هتبقى من اعظم الجامعات في العالم
سلااااااااااااااااااااااااااام

Doba said...

fanan fa2eer

أحلامك جميلة قوى.......يارب يحققهالك يارب، بس مهواش حلم صعب ولا حاجة اتخانقة مع الدنيا وكل يوم اول متصى قررى انك تعيشى يومك وكأنه أحلى يوم هتعيشيه فى حياتك وبكده هتخلى كل ايامك هنا وسعادة

وبالنسبه للشخص الجميل اللى هيخليكى اسعد واحد فى الدنيا، فمش هقدر اقولك غير أحسنى الأختيار وبس

أشكرك....تحياتى
=========================
عصفور المدينة

ماشاء الله على حلمك....يارب يرزقنا الشهادة عند الموت معاك يارب وكل اهدافك التكتيكية اللحظية تتحقق بشكل دورى وهادف زى مانتا بتتمنى

وأرجوك من كل قلبى ركز قوى فى انك توصل كل اللى وصلتله من أخلاقيات وخبرات لأولادك هما دول كنزك فى الدنيا

وأكيد انت الوحيد اللى عارف ايه الجلسة اللى تخليك مستريح قوى ومسترخى تماما.....باسم كل البلوجرز ندعوك لعمل هذه الجلسة فى أقرب وقت

تحياتى......وسلامى
========================
noony

لما دخلت مودنتك وقريت التاج اللى انتى كاتباه متتخيليش فرحت بيكى قد ايه لأنك حقيقى بتحاولى تحافظى على رضا والديكى واكبر هدف ليكى انك تكونى مترجمة اسلامية ربنا يفتح عليكى كل ابواب خيره ده كفاية رضا الام بس بيفتح كل الأبواب المقفلة بس واضح انك كنتى متعلقة قوى بباباكى الله يرحمه ويرحمنا أجمعين

أكيد ربنا شايلك انسان فيه كل الصفات الحلوة اللى تتوافق مع صفاتك الجميلة دى بس كله بأوانه وادعى انتى بس.......على فكرة دعائك اللى بتدعيه برده جميل قوى....مش هقدر اقول اكتر من - ربنا يديلك على قد نيتك وحبك لكل اللى حواليكى- سلامى

Doba said...

اسكندرانى فى الغربة

للدرجة دى متضايق من غربتك - الله يكون فى عونك والله وترجع بالسلامة فى القريب العاجل - بس أعرف ان فى السفر 7 فوايد ومنها ان ثواب كبييييييييير قوى بتاخده من ربنا على كده بأنك بتسعى فى الأرض للخير - المهم ميكونشى للشر - تحياتى ويارب نتفسح كلنا قريب

سلامات
========================
انتظار مؤقت

لا شكر على واجب يا افندم
لسه مقريتشى حلمك بس هعلقلك عليه وهشرحك لو معجبنيش

وبالنسبة للغربة هيه فعلا صعبة ومرة بس علشان تدوق الحلو لازم تمر بالمر الأول

تحياتى وسلامى
======================
mirage

انا قلتلكو انى هبلغ عنكو فى موضوع الجامعة ده.....بس ربنا الموفق...وش بابتسامة

ويارب يرزقك بالشقة والعربية والهلم جرااااااااااااااا

سلامات
==============

Doba said...

الشنكوتى الكبير

انا فرحانة انى سبقتك جدا......ههههههه، وبرده مردتليش عزومة السمك هعيطلك حاضر

انا باخد كورس انجليزى فى AUC ممكن أسألك بكام ال Modern Accounting بس بصراحة المفروض انك تحاول اكتر واكتر...الواحد علشان يبقى متميز لازم يتعب قوى ويعمل كل ما فى وسعه علشان يوصل لهدفه......حاول على قد متقدر

ثم يعنى انت عاوز ترضى ربنا ورايحلى تفتح جامعة انت وميراج......روح يا اخى الله..........يعمر بيتك
ههههههههههههههههههه

سلام
================
إلى كل من وضع تعليق لكم من أرق الأمنيات والتحيات

هبة

الطائر الحزين said...

يا سلام ان وفقنا الله للنطق بالشهادة قبل الممات

Doba said...

الطائر الحزين

يارب أمين كلنا يبلغنا النطق بالشهادة
اشكرك على مرورك الكريم

تحياتى

الشنكوتي الكبير said...

يا سلام هي الجامعه وحشه في ايه يا اختي ده حتى لا حياء في العلم والحكومه نفسها بتفكر يدخلوا الحاجات دي في المدارس يبقى طبيعي الجامعات الخاصه هتدخلها برده يبقى ليه منلحقشي انا وهو ناخد السبق ده
اما بخصوص الكورس فأنا اتصلت بيهم بعد ما جبت تليفونهم عشان اسأل قالولي ان خلاص مفيش كورس modern accounting تاني لكن فيه حاجه تانيه للمحاسبه وسعرها 510 ج للماده *14 ماده
باللإضافه لتمن امتحان اللغه 50ج
وتمن المقابله الشخصيه20ج
انا عارف ان الموضوع مكلف جدا لكن الراجل اللي شجعني قالي انه كان بيدفع كل مرتبه عشان يكمل الفلوس بتاعتهم وانا شايف ان معاكي حق مفيش نجاح من غير تعب عشان كده انا هاحاول اتصرف انشاء الله بس ادعولي على العموم التقديم في شهر 7 وشهر 8
والدراسه في شهر9
سلااااااااااااااااااااام

Mirage said...

طيب متعمل ال
CMA
دى على كده ارخص من اللى انت بتقول عليه ده بكتير وافيد واهم بكتير

دى هتنقلك نقلة تانية خالص

Doba said...

الشنكوتى وميراج

شكلى كده انا اللى هفتح جامعة بدل كل المصاريف دى واكسب والم من وراكو وابنى العمارات وهقلب الحلم بتاعى واسميه كماننا----نفسك فى ايه كماننا
هههههههههههههه

سلام

الشنكوتي الكبير said...

حوش يا ميراج البنت عايزه تستكردنا وتاخد المشروع انجز معايا عشان نسبقها
هههههههههههههههههههههههه
طيب يا ريت تخشي معانا شريكه اهو حتى عشان نبقى زي الحكومه دايما تعين ستات عشان محدش يقول انهم متعصبين برده ممكن نعينك عشان يقولوا عننا متفتحين ويمكن امريكا تدينا دعم كمان
هههههههههههههههههه
سلاااااااااااااااااام
يا سكره

Doba said...

دعم


احلم احلم
يا بنى دى لو اشتغلت الجامعة دى هيأمموها-----هههههههههههههه

الشنكوتي الكبير said...

مالكيش دعوه انا ليه واحد صاحبي شغال سواق في المحافظه وبركب معاه ساعات العربيه النص نقل بتاعتهم يعني من الآخر عندي وسايط تشيب الكتكوت وممكن اوديكوا ورا الشمس يا فلاحيس
ههههههههههههههههه
نورتي

shahy said...

دمك زي العسل انتي والشنكوتي وميراج
بس عاوزة اعرف اية حكاية الجامعة دي
........
اما عن احلامي
مابقاش عندي احلام شخصية كتير
معظم احلامي لزوجي واولادي واخواتي
واحلام عامة للبلد
يعني وحاجات كدة
عموما ربنا يحقق كل احلامنا في الخير
اسعدني جدا تعليقك عندي
شكرا يا قمر
سلاااام

Tamer Nabil said...

احلام لاتموت الا بموت الانسان

طول ما الواحد عايش لازم يحلم ومش يحلم بس ويحاول يحقق حلمة ودةبالسعى مش بالوقوف فى مكانى واقول عايز

ربنا يوفقك


تحياتى

انتظار مؤقت said...

ها يا قمر ازيك
شفي يا ستي انا واضح اني عملت مشكله بالبوست الي انا كتبتو عندي في المدونه انا جيت ارد على تعليقك هنا عشان الموظوع كبر هناك اوي و بقولك شكرا على المشاعر الرقيقه و احساسك العالي بالناس و مشاكلها و يهمني انك تعرفي انا مجاش في راسي ساعة ما كتبت اي اعتراض على خلقتي او اي جانب ديني انا كنت بتكلم من قلبي وحاجه انا حاسسها بس الي حسيتو ان بدا يتفهم غلط و انا مش عايز امسح حاجه انا كتبتها ..طولت عليكي و ازعجتك بس حبيت تكوني معايه في الصوره..تحياتي

sendbad said...

نفسي احس اني عايش

Doba said...

Shahy

موضوع الجامعة تتمشى كده لغاية الشنكوتى وميراج فى مدوناتهم وانتى تعرفى موضوع الجامعة ده من الأول

وشكرا انك زوتينا جدا حقيقى نورتينا
بالنسبة بقى لحلم الزوج والاولاد وكده.....انا مقصدشى كده انا اقصد ان فيه حاجة عندك جووووووووووه مستخبيه نفسك انتى تحققيها.....عاوزين نعرف هيه ايه......وفى انتظارك مرة تانية

سلام
=====================
Tamer Nabil
هو حقيقى لازم الواحد يسعى لتحقيق أمله طول مربنا لسه واهبله الحياة
مقلتلناش برده حلمك ايه

ايه يا جماعة بطلتو تحلمو ولا ايه
شكرا جدا لزيارتك وفى انتظار سماع حلمك

تحياتى وسلامى
==================
انتظار مؤقت
شكرا لتشريف وهروح اشوف ايه الجديد هناك وباقى التعليقات بس عموما اوعى تمسح حاجة خرجت من جواك ومن قلبك مهما ان كانت

اكتب بوست جديد تكلمه للموضوع ووضح فيه رايك اكتر للى مفيهموش او للى فهموك غلط، هو حقيقى بوست جامد قوى

انت تشرفنى وتقول اللى انت عاوزه فى اى وقت وطول براحتك ولا يهمك ان يسعدنى وجودك دايما

امنياتى بحياة سعيدة
سلام
===================
Sendbad
اشكرك اولا على مرورك الجميل
ثانيا ده اسمك سندباد يعنى بتلف الدنيا بحالها وشغال لف يعنى عايشها بالطول والعرض

ثالثا وده الأهم انك عاوز او بتحلم تحس انك عايش فاعرف ان ربنا مديلك الحياة والعقل اللى يخليك تعيشها فى منتهى منتهى السعادة بس انت اللى بتكسل تستخدمه علشان تعيش سعيد وبتستهل انك تلغيه وتقول نفسى -- حياتك هتعيشها مرة واحدة واللى بيضيع مبيرجعشى -- عيش حياتك زى اسمك بالطول والعرض ولف الدنيا بحالها بس المهم فى الاول والاخر رضا ربنا يعنى كل حاجة تتعمل فى اطار الخير وشرع الله

تحياتى بحياة هنيئة
سلام

sendbad said...

انتي فعلا قلتي الصح الظاهر اني ادمنت التعاسة رغم ان في حاجات كتير زي ما قلتي ممكن تخليني اسعد واحد في الدنيا
ادعيلي وتحياتي

bastokka طهقانة said...

فكرة حلوة قوي
انا كنت بحلم ادخل المعهد العالي للمسرح
و محصلش
و بحلم ادخل اكادمية اخبار اليوم
نفسي اكون صحفية او مذيعة
بس
لس كل ما يتمناه المرء يعكرتههههوو
متحرمش منك

ضد الظلم said...

بحلم وحلمى بسيط مش كتر مال ولا سيط بحلم اكون نفسى
بجد نفسى الكون كله يهدى ويتلغى الظلم من قلوب بنى البشر

Doba said...

sendbad
دعيالك والله من كل قلبى بكل السعادة
تحياتى
=====================

طهقانة
نورتينى يا قمر ووحشتينى جدا
بجد بجد طريقتك فى الكتبة والحوار والرد تحفة ولو تقدرى تروحى المعقد أو الأكاديمية هيكون عمل تحفة يارب فعلا يكون عندك القدرة وتحققيه هنكون مبسوطين جدا لما نلاقيكى ملعلعة كده وسط الكل

تحياتى ليكى يا بستوكة
هبة
==============
ضد الظلم
احلم تكون نفسك وكون اول واحد ضد الظلم ونادى بيه يمكن يأثر مع شخص او اتنين يبقى كسبنا كتير

للأبد هنتنينا كده ما بين الخير والشر وما بين السما والأرض بس المهم القرار اللى الواحد ياخده انا هبقى ايه خير ولا شر؟؟؟

تحياتى وأمنياتى بكل الخير
سلام

هبة

Spyfun said...

بلاش احلام نخليها اهداف عايزين نوصلها
انا مثلا نفسي في حياه كريمه و اني اكون مطيع لله في كل الاوقات
وان ربنا يرزقني الزوجه الصالحه
تعرفوا ايه اسباب السعاده في الحياه
1) البيت الواسع
2) الزوجه الصالحه
3( الاولاد
4)الرضا ودا اصعب شيء يواجه الانسان
يالا نحاول ندرب نفسينا علي الشعور بالرضا باللي كاتبه الله لنا
سلاممااات

اجندا حمرا said...

ازيك ياكوكي؟عامله ايه يادوبا
اول مره ليا في مدونتك يامسهل
موضوعك شدني موضوع الأحلام و لسه كنت بتكلم في حاجه شبه كده عندي في البلوج
بحلم بأيه؟بتهيئلي حشترك معاكي في اللي قلتيه نفسي اني اكون سعيده و راضيه اكتر من كده
لما احط دماغي علي المخده باليل احس اني عملت كل اللي عليا في يومي و اني راضيه عن اللي عملته و سواته
بحلم ان الناس تحبني محبه حقيقيه من قلوبها مش عشان عايزه مني حاجه اعملهالها
نفسي اكون ناجحه في حياتي
بتهيئلي ده في دماغي دلوقتي
تحياتي ليكي و للبوست الجميل ده
:)))))

Doba said...

spyfan

أهلا بيك وانا معاك ان الواحد يرضى دى اصعب اصعب حاجة ومش بالساهل خالص بس الموضوع محتاج صبر وتحمل للوصول للرضا الدائم من ربنا

ربنا يحققلك كل طموحاتك ويرزقك بالبيت الوسع والزوجة الصالحة والأولاد ان شاء الله
تحياتى
=================
اجندا حمرا
منورانى وسعيدة انك مشتركة معايا محبة الناس تبدأ منك انتى وبيكى انتى الواحد لازم يبتدى يسعد اللى حواليه وهما هيتسعدو بيه وهيسعدوه

يارب يرزقنا الرضا والحب والسعادة والطمأنينة

تحياتى يا احلى بلوجرز
هبة

mimi said...

انا قريت البوست بتاعك وعجبني اوي وده طبيعي منك ، انتي شخصية مميزة عن اللي عرفتهم في حياتي ، ج اهيد ربنا معاكي

mimi said...

بحلم احب اوي واتحب اوي لان احلي واطعم والذ حاجة في الدنيا هوا الحب

3abdo me7tas said...

أنا بطلت احلم لأن الأحلام قتلتنى قبل كده وأنا مش ناوى أموت تانى كفاية مرة واحدة

Doba said...

mimi

يارب تحبى قوى وتتحبى قوى قوى وتحققى كل اللى بتتمنيه

فى انتظار بداية قوية لمدونتك
تحياتى - هبة
===============
3abdo me7tas

أوعى تخلى الحلم يقتلك مهما حصل قوم واقف على رجلك من تانى وامشى بعزم ما فيك - تحياتى وأمنياتى بمنتهى منتهى السعادة - هبة