Monday, December 24, 2007

فلتسقط الستات

امبارح وانا بتصفح فى جريدة لقيت مقالة حلوة قوى كاتبها نبيل فاروق اللى بيكتب الرويات المخيفة دى بس الموضوع حيوى للغاية وحبيت نتناقش فيه بموضوعية وبعيدا عن تحكم الرأى للرجل الشرقى وكذلك تمسك المرأة برأيها بعناد والموضوع كما هو آت
=====
أعترف هنا وربما لأول مرة أننى كنت فى بداياتى واحداً من هذا الفريق الرافض، وكنت أرهق زوجتى المسكينة وهى طبيبة بشرية بضيقى من عملها وإضاعتها وقتها فيه وككل رجل كنت أربط هذا الواجب والتقاليد والدين وخلافه وكانت تحاول إقناعى تارة وتثور على تارة أخرى، ولكنها لم تتوقف عن العمل وحسناً فعلت،
فبعد إصرارى على عدم عمل المرأة، واجهت موقفين، جعلا كيانى وأفكارى كلها تهتز...أولهما مع قريبة للأسرة من بعيد...مات زوجها الشاب فجأة ولم تكن تملك مورد رزق أو تعمل فى أى مجال، مما أدخلها فى مشكلات لا حصر لها ...إضطرتها بعد أقل من عام إلى الزواج من شخص لا تميل حتى إليه، لمجرد أنه ينفق عليها ويرعاها ويرعى ابنتها الصغيرة من زوجها الذى كانت تحبه من كل قلبها
والموقف الثانى أصابنى شخصياً، مع مرورى بأزمة فشل كلوى جعلتنى أعيد ترتيب أفكارى لأكتشف أن أكثر ما كان يشد فى أزرى هو ثقتى بأن زوجتى تعمل وان مورد الرزق لن ينقطع حتى لو واجهت العجز أو الموت عندئذ كان لابد من أن أنظر إلى الأمور من زاوية أخرى..نظرت إلى النساء فى هذا الزمن... إلى الفتيات والصغيرات والمراهقات وتبين لى أن الصورة قد اختلفت تمام عما كان ف زمن شبابى وأن أنثى اليو لم تعد تشبه حتى أنثى أمس....فكل البنات فوق العشرين يسعين إلى العمل والنجاح والتفوق ويقتحمن مجالات جديدة وأعمالاً كان يعجز عنها الرجال فى الماضى وأصبحن أكثر تحرراً بكثير مما كانت عليه أمهاتهن وأكثر إقداماً وشجاعة وحفاظاً على أنفسهن من ذئاب البشر ولكن الفريق إياه لم يستطع إستيعاب هذا أو هضمه وما زال مصراً على ان ما يحدث هو فساد إستشرى فى المجتمع وانحلال أخلاقى يهدد الحياة الأسرية ومصيبة دينية ....سينهار معها الدين..ويضيع الإيمان والأطرف أنهم اعتبروا حرية المرأة نوعاً من الغزو الفكرى الغربى ومحاولة للأمركة وحاجات كتير أقلها يودى السجن
والطريف أنهم عندما حاولت مناقشة أمر الرافضين وسألته إذا ما كان يفضل عمل المرأة فى أى مجال أم إنحلالها وسقوطها لانعدام فرص العمل ....أجابنى بكل صراحة أنها لا ينبغى أن تعمل مهما كانت الأسباب ....وعندما سألته وماذا عن إحتمالات سقوطها لو لم يكن ليها مورد رزق....فهتف بكل غضبه وإنفعاله.....فلتسقط الستات

Monday, December 17, 2007

عيد سعيد

كل عام وأنتم والأمة جميعا بألف خير أوصيكم بصلة الرحم ورعاية الوالدين == والترفيه عن الأولاد حب الزوجة لزوجها حب الزوج لزوجته == تحابوا تراحموا تآخو == إستمتعو بأوقاتكم فى الخير == وفى حب الله - وبتقواه والتقرب إليه - - - أحبكم جميعاً فى الله ----------- لكم منى كل الأمنيات بالخير وبالسعادة دائماً ******* هبة

Monday, December 3, 2007

حنان وحنين

كلمة ذكرت أمامى بالأمس وبترن فى ودانى كتير لغاية دلوقتى
إذا أكرمت الكريم ملكته وإذا أكرمت اللئيم تمردَ
المقولة دى غريبة فعلا، هل فعلا ممكن بعد متكرم اللى قدامك قوى وتضحى بوقتك وسعادتك وكيانك علشانه فى لحظة يتقلب عليك ويبقى ضدك ويرضى على نفسه بعد كل ده إنه يطعنك فى ضهرك
للدرجة دى ممكن الحقد الداخلى للبشر يأذى المودة والرحمة والحب والعشرة
------
وعلى الجهة الآخرى من المعنى نجد انك بمجرد متكرم الكريم تلاقيه دايما وقت الحاجة بين ايديك وبيقولك انا اللى ربك باعتهولك علشان أخفف عنك وآخد بإيدك لبر الآمان، أنا اللى ممكن تتكل عليه ومتخافشى انك تتأذى أو تتهان، أنا اللى لو قدرت هضحى بحياتى وسعادتى علشان إنت تكون راضى ومرتاح ياللى كرمتنى فى يوم
حقيقى حقيقى سبحان الله
===
الحنان مش كلمة بس
الحنان لو حتى نظرة فيها كل شىء يتحس
سبحان الله كل واحد بيبقى جواه كمية حنان إن كان لوالديه ولا لأولاده ولا لطفل صغير جميل او لشخص مريض او شخصية تكون كبيرة فى السن، بتلاقينا كلنا بنتصرف بمنتهى التلقائية والطبيعية علشان نحنحن عليه ونساعده على قد منقدر ونستمتع بوجودنا معاه
تفتكرو ممكن الواحد يعيش وهو بيفتقد صفة الحنان، إنه يقرر ومن نفسه انه ميوهبش أى حد من حواليه حنان من اللى ربنا زارعه جوانا، ويا ترى اللى عنده إدراك لنعمة الحنان يقدر يتطور إزاى بنعمة ربنا دى علشان يساعد الكل وهل لو وهبلهم كل حنانه هيستغلوه وفى لحظة يلاقيهم مقلوبين ضده، انا مش عارفة بصراحة
===
الحنين
---
كل شخص دايما بيكون جواه حنين لشىء، سواء حنين لفترة طفولة او مراهقة او جامعة، سواء صديق والزمن فرق ما بينهم، أو حتى اللى بيسافر وبيكون عنده حنين لبلده، وكمان عندنا اللى بيحن لبلده الريفية أو لعبة كان بيلعبها فى الشارع مع أصحابه أو حتى إنه يبنى بيت من الرمل بجانب موجات البحر
السخرية بقى أن ناس كتير قوى عندها حنين للضحكة اللى بتطلع من القلب

Thursday, November 22, 2007

دموع

كل واحد بييجى عليه وقت وبيبقى نفسه يبكى
أوقات بيمسك نفسه ويمنع نفسه من البكا
وأوقات مبيتحملش والبكا بيبقى أقوى منه
طبعا مش عيب ولا حرام اننا نبكى
راجل او ست
لكن العيب اننا نكتم آلامنا جوانا ومنطلعهاش
اننا نبكى من غير صوت
اننا نخنق نفسنا على الرغم ان ربنا أعطانا نعمة جميلة
اننا نطلع الشحنات والألام السيئة فى نقاط مياة بسيطة مبسطة تخرج وتنساب بمنتهى السهولة لتمسح وتزيل كل آثار الندم والخوف والحزن والحرمان
إذا لم تسطتع أن تعلن غضبك جهراً
إذا لم تستطع أن تسيطر على آلامك
إذا لم تستطع تحقيق أحلامك
إذا ظهرت لك علامات اليأس والقهر
إبكى
إبكى
ولكن
من بعد البكاء فلتقى بكل الهموم جانبا وبكل المشاعر الساخطة والسيئة
إلقى بمخلفات الحياة والطبيعة التى تقوم بإلقائها على أكتافنا لتزيد من حمولنا فى الحياة
ولكن فلتبدأ من جديد
أبدأ بخطوات ثابتة نحو المستقبل المشرق ولتسمتع بكل مباهج الحياة والنعم التى يغمرنا بها الله دائما وأبدا

Sunday, November 4, 2007

سؤال لكل إمرأة

لكل منا ديانته ولكل منا آرائه ومعتقداته ولكل منا طبيعه تربية ولكل منا ظروف معيشة واحتياجات
====
تكملة لمناقشتنا فى الطبيعة الجدلية بين الرجل والمرأة نتناقش اليوم عن المرأة بما لها
من حقوق ومن قبلها الواجبات التى يجب عليها أن تؤديها قبل المطالبة بحقوقها
==
المرأة ذلك الكائن الضعيف القوى
حباها الله بنعمة الأنوثة وما بها من دلال ونعومة وحباها أيضا بعقل راجح نوعا ما تستطيع من خلاله أن ترعى زوجها وتربى أسرتها وتحافظ على كيان الأسرة كصرح ثابت مترابط الأركان
خلقت المرأة لتكون مصدر سعادة للرجل وسكن له ومودة ورحمة
وخلق الله بينكما ميثاق غليظ
سأبدأ بالبنت الآنسة غير المتزوجة فى هذه الأيام والتى يأتى إليها الشبان كثيرا للتقدم لخطبتها وهى ترفض وكثير من هذه الأسباب تافهة للغاية أما تعلم قول الرسول صلى الله عليه وسلم من جائكم من ترضون دينه وخلقه فزوجوه
أى لابد لها من الاختيار والاختيار بعناية فهى ان ارتبطت بمن هو معتدل دينيا وخلقه حسن كسبت الحياة الدنيا وان كانت حسنة العشير له واكتسبت رضاه كسبت الآخرة
-
بدأنا بالاختيار والآن بالتنفيذ
==
بعث الله لكى بنعمة الزوج والحبيب والصديق والعشيق والوالد لاولادك
أفلا يستحق منكى الكثير والكثير للإعتناء به وبمتطلباته ولتعلمى انها ليست بالكثير فبالحب تستطيعى أن تبثى الحب لكل من حولك
-
فهو لا يرغب الا بمن تبثه الحب والرضا وتكون له ملاذ من صراعات الحياة ليختبىء بين ذراعيها عن كل هموم الدنيا فما بالك ان أصبحتى أنتى الآخرى صراع من ضمن هذه الصراعات بالتأكيد سيفر هاربا من هذه الحياة العقيمة
-
نتكلم بالعامية شوية لو سمحت
-
كل واحدة مبقاش عندها غير التضرر وخلاص لازم تقعد تنكد على جوزها وتمسك فى الحاجات اللى بيقولها غلط واللى بيعملها غلط وتقعد تعيد وتزيد وتكبر فى النكد ولو مبتحبش أهله تولعها عليه حريقة - طيب ليه - ده بالكلمة الحلوة ممكن تكسبى كل اللى حواليكى وتضمنى ان معاكى قلوبهم
-
فين انك تخليله بيته جنة فى الارض انك تستقبليه احسن استقبال وانك تقعدى تتكلمى معاه وتهونى عليه وتأكدى انه حتى لو قلبه حجر بالكلمة الحلو والاهتمام المناسب هتلينى وتكسبى قلبه وعقله كل واحدة تقعد ترغى مع اصحابها وتقعد تتشكى وتعاتب وتلوم على جوزها - متعرفيش ان الشيطان هو الملك فى القعدة دى وانه يهمه انه يخسر كل واحدة بيتها وان طول مفيه خناق وقرف فى البيت هو سعيد ومبسوط
==
إلى كل امرأة
أرجوكى
==
إرتدى أحسن ثيابك وأغلاهاه على الاطلاق فان زوجك أحق برؤيتك هكذا عن الآخرين
-
أحسنى أخلاقك بالتقرب الى الله وحسن طاعته والتشبث به والتضرع إليه عند الصعاب
-
زينى بيتك وطريقة تقديم مأكولاتك
-
قابلى زوجك دائما بابتسامة فهى بكل الاحوال صدقة
-
أطعميه بيديكى فان بكل لقمة صدقة وبكل كلمة طيبة صدقة
-
إستمعى إليه فنحن بزمن صعب يكثر فيه الضغوط
-
كونى حسنة القول وذكريه دائما بان لنا الله الذى لا يغفل عن مخلوقاته
-
كونى حريصة على ماله وعلى نفسك ولا تفعلى الا ما يرضيهولتعلمى ان نوم زوجك وهو غير راضى عنك يجعل الملائكة تلعنك من المساء وحتى تصبحى
-
استعيذى سيدتى من الشيطان دائما وكونى قوية لتستطيعى مباراته فى الحياة حتى تصمدى أمامه وكلما آتتك المشاكل والصعاب فلتأخذى قرارك بأنه مهما كانت الضغوط قوية فانتى قادرة على الصمود أمامها ولا تسمحى للنكد والمحن ان تقف او تحول دون سعادتك فى رضا الله ورضا زوجك وان تكونى دائمة سعيدة راضية بما يرزقك به الله
---
أوصيكى بتقوى الله فى زوجك
وفى نفسك
وفى أولادك
==
وللحديث بقية عن تربية الأطفال

Wednesday, October 24, 2007

باقة من الحب لكل محب

رسالة حب من شاب بيوصف وبيحب حبيبته
================
بحب عينها وهي بتحضني من غير كلام بحب ضحكتهم لما ببص فيهم ====
بحبها لما تبقى غيرانه كده وهتتجنن عليا ====
بحبها لما تعمل حاجه عبيطه علشان تفرحني بحبها لما تكتبلي جواب زي العيال بتوع ثانوي وتقولي فيه مشاعرها بخط طفله عمرها خمس سنين ==== بحبها لما تكلمني عن احساسها ببراءه بحبها لما تبقى عايزه تتجنن معايا وتعمل كل اللي بتحلم بيه
====
بحبها لما تصارحني بحاجه خايفه منها قوي حبيت فيها شقاوتها وجرأتها حبيت فيها بساطتها الجميله حبيت فيها دلعها البريء ====
حبيتها قوي لما حسيتها هتتجنن من غبائي اني مش فاهم حبها حبيتها لما شجعتني اعمل كتير حبيتها لما صبرت معايا في مشاكل رخمه كتير
=====
حبيتها لما حسيت انها اقرب ليه من اي حد حبيتها لما ونستني في وقت كنت حاسس بالوحده قوي ====
حبيتها علشان شفت في عينها كلمة بحبك من غير ما تنطقها بحبها زي ما هي كده برغم اعتراضي على حاجات فيها بس مقدرتش محبهاش علشان بحس ان الحب الحقيقي هو اللي لما بيجي يخليك تحب الشخص كله على بعضه مينفعش اقسمه حتت
==== بحب فيها شقاوتها وجنانها ====
بحبها قوي لما اضحك عليها واخوفها عليا ولما اقولها اصلي هاتجوز عليكي وانا اصلا مش عارف اتجوزها هي يبقى اتجوز عليها ازاي واشوف في عينيها خوف عليه كأني كنز كبير عندها وخايفة ليضيع من بين ايديها
====
بحبها لما تمدحني وتجاملني حتى لو عارف انها بتبالغ علشان بتحبني بحبها لما اقولها كلام حلو واحس انها فرحانه بيه قوي وان كلامي اهم عندها من الدنيا كلها ====
بحبها لما تتخانق مع واحده بتهزر معايا او بتعاكسني من ايام الشقاوة ==== وبحبها قوي لما شفت في عيونها فرحه بأننا اخيرا هنتجوز
====
بحبها قوي لما شفت الخجل والكسوف ملخبطينها قدام مامتي كأنها في امتحان فظيع مع انها دايما جريئه وقويه ====
بحب فيها خفة دمها الفظيعه مع اني دايما بمنعها من التريقه على الناس بس انا نفسي مبقدرش امسك نفسي من الضحك على تعليقاتها الفظيعه بتنقد الناس بطريقه تموت من الضحك
====
بحبها وهي عايزه تستكردني علشان تعمل حاجه عاجباها وهي بتحايلني علشان اوافق ====
بحــــــب فيها كل ما فيها اصلها قمر قوي بحبك حبيبتى

Wednesday, October 17, 2007

سؤال لكل رجل

انا عندى مجموعة من الموضوعات محتاجة مناقشة فى الطبيعة الجدلية بين الرجل والمرأة وسأبدأ بعد إذن الجميع بالرجل وطبعا تعليقات المرأة متاحة فى وضع وجهة نظرها فى طبيعة تفكير الرجل ولكننى لدى بضع تساؤلات وأرغب فى التحاور بشكل ودى مع الجميع عنهم
لكل منا ديانته
ولكل منا آرائه ومعتقداته
ولكل منا طبيعه تربية
ولكل منا ظروف معيشة واحتياجات
ولكن
ما أريد السؤال عنه حقا هو
من خلال كل ديانة وسأتحدث من خلال ديانتى الاسلامية وأسأل عن تشبه الرجال بالرسول فى الطبائع، فهو القدوة التى ينبغى على الكل أن يتبعه وسأسأل عن أشياء بسيطة
أين غض البصر
أين صلاة الجماعة فى المسجد
أين خدمة أهلك بالمنزل ومساعدتهم
لم استخدام الألفاظ النابية والشتائم وخاصة وسط الزوجة والأبناء
أين الحث على حفظ القرآن والصلاة جماعة بين الاخ واخته او الاب واولاده
لم يذهب الرجل الى أن يستخدم قوته مع زوجته بالضرب او مع اخته او ابنته ألم يخلق له الله عقلاً ليستفيد منه ليخرج بأحسن النتائج، لم يستعيض عنه بما لدى الحيوانات من طبيعة همجية نوعا ما بدلا من استخدام العقل
===
أختتم حديثى بسؤال واحد
===
أين القدوة
القدوة التى من خلالها نستطيع تربية أبنائنا بشكل صحيح ومنه الى مجتمع صحى ومنه الى مصر الغالية بمجتمع متحضر راقى يتعاون فيه افراده مع بعضهم البعض بالمحبة والود والرفق واللين
القدوة التى تساهم تنظيم المجتمع وحثه على بناء طموحه وتحقيقه من خلال فكر واعى ومنظم
أين الضمير

Wednesday, September 12, 2007

أجمل إحساس فى الكون

بجد بجد أجمل إحساس فى الكون انك تعشق وبجنون
إحساسى النهاردة لا يوصف - بجد مش عارفة اقولكم انا قد ايه فرحانة وسعيدة ومنشكحة وطايرة
ابنى حبيبى بقى عنده
ثلاث سنوات
هيييييييييييييييه
مكنتش اتخيل من زمان ان فى يوم من الأيام هلاقى ان فى حياتى حد يكون غالى عليا للدرجة اللى تخليك فعلا تضحى بحياتك علشانه وانك تفديه بجد بعمرك
حاجة غريبة فعلا لما بكون زهقانة ولا تعبانة تلاقيه بيحس بيا على طول وييجى ينكشنى علشان العب معاه ومعاه والله الاوقات دايما جميلة - طبعا طبعا فيه زعيق وجعير وعصبية موجودة برده بس يبقى جمال نعمة ربنا فى وجود طفل فى البيت يعطى له رونق وطعم خاص
يوسف حبيبى كبر يا رجالة وبقى عنده 3 سنوات مش عارفة والله شكلى كمان سنة ولا اتنين هيجيلى سكتة قلبية من كتر مانا فرحانة انه بيكبر حبة حبة
يارب يقدرنى يارب وأقدر أربى إبن بار بأبويه وعبد صالح لربه وانسان جدير باحترام المجتمع
كل عام وكل المدونيين وأصدقائى الأعزاء بصحة وحب وسعادة وخير
ويارب كل اللى فى نفسه أمنية أو أمل ربنا يحققهمله
رمضان كريم
هبة

Wednesday, August 29, 2007

كشف المستور

في بداية الأمر أود أن أقدم نفسي لكم، أسمي يحيى زوج الأستاذة هبة (المشهورة بدوبه على المدونات بالمناسبة لا أحب هذا الاسم) هذه الفكرة ممتازة طبعا وإن كنت قد قرأت عنها منذ حوالي أسبوعين في قصة للكاتب المؤلف أحمد خالد توفيق حيث أشار في قصته بعنوان “قصة تكملها أنت” إلى أن فكرة وجود قصة واحدة ولها أكثر من مؤلف ظهرت منذ حوالي خمسون عاماً على يد الأديب العالمي نجيب محفوظ حيث أنه كتب بداية القصة ثم مررها لأحد كتاب ذلك العصر ليكملها وهكذا مرت القصة على عشرة مؤلفين ثم عادت مرة أخرى لنجيب محفوظ فوجدها شيء أخر تماماً. على أية حال إليكم الفصل الخاص بهبة حيث أنها طلبت مساعدتي في كتابته بدلاً منها ----------------------------------------------------------------- الفصل الخامس
========
كشف المستور
=== وبالفعل تحركنا سريعا كي نختبئ وراء مجموعة صخور متوسطة الحجم وتبعتنا الفتاة خلف تلك الصخور. في بداية الأمر ظننا أنهم سوف يثورون لاختفاء صديقنا إبراهيم ولكنهم لم ينتبهوا لذلك حيث أن الليل قد أسدل ستائره وهم كانوا يترنحون ويتبادلون النكات البذيئة نتيجة الخمر. وهنا تمتم إبراهيم بآية الشكر والحمد لله على أنهم لم يلاحظوا اختفائه فقطعه عليَ مستنكرا خوفه ومتهماً إياه بمسئولية ما حدث لهم منذ البداية حيث أنه كان اقتراحه بزيارة آلة الزمان (قلعة قايتباي) ثم تم اختطافه بدون أدنى مقاومه منه مما أدى بهم إلى ذلك الموقف. قبل أن يستكمل عليَ هجومه الحاد الموجه إلى إبراهيم أوقفه أحمد بإشارة صارمة من يده قائلاً: ماذا تقول؟ هل تلك الأحداث أثرت على أعصابك إلى هذا الحد؟ تماسك يا رجل!! ...؟؟ دعونا الآن نفكر بهدوء ماذا نفعل وكيف صار بنا الأمر إلى هنا. في البداية كنا في طريقنا إلى قلعة قايتباي لرؤية معالمها وهنا قطعه إبراهيم قائلا: لقد شربنا (تمر هندي) من البائع المتجول قبل دخولنا للقلعة مباشرة فهل يمكن أن نكون قد أصبنا بهلوسه جماعية فنظر إليه عليَ وعيناه حمروتان من شدة الغضب قائلاً: أصمت وإلا أذقتك طعم قبضتي حتى تتيقن أنها حقيقة كيف تكون هلوسه جماعية بكل تلك التفاصيل وكيف ... قاطعه أحمد للمرة الثانية قائلا: يجب ألا نغفل أي تفاصيل أو احتمالات بالفعل يمكن أن نكون تحت تأثير هلوسه جماعية فقد قرأت عن تجربة مشابه لذلك تمت في معمل ألماني أثناء الحرب العالمية الثانية كذلك الأحلام تكون حقيقة لدرجة كبيرة جدا حتى نستيقظ ونتيقن أنها حقيقة ألم تقرأ لأرسطو ونظرية الشك؟ رد عليَ مستهزأ: طبعا قرأت أنا أشك إذن أنا دبوس. لم ترق لأحد تلك الدعابة عدا الفتاة السمراء التي كتمت ضحكتها بيديها الرقيقتين وهنا انتبه ثلاثتهم لأمر تلك الفتاة وبدأ أحمد في تحليل الموقف مجدداً وتوجه بسؤال مباشر لتلك الفتاة طلب منها أن تعرفهم بنفسها؟ قالت الفتاة بصوت أنثوي ناعم أسمي "مريم مختار" وأبلغ من العمر 26 عام مصرية .... فقاطعها إبراهيم متسائلا: آنسة أم متزوجة؟ قبل أن تجيب لكمه عليَ في وجهة بقبضته قائلاً بحزم: لا تتكلم مرة أخرى. أجابت مريم آنسة. سألها أحمد عن أي معلومات يمكن أن تعرفها تساعدهم على الخروج من ذلك المأزق أو تساعدهم على حل ذلك اللغز. هنا ألقت مريم بقنبلة جعلت الجميع صامتين كأن على رؤوسهم الطير قالت: أنا قادمة من عام 2075 ...............!! ونظرت إليهم لتجدهم جميعهم محدقين فيها تماما بأعينهم بعد دقائق أستجمع أحمد تركيزه وسألها في ضيق هل يمكن لكي أن تساعدينا أم لا؟ قالت لهم سوف أقول لكم كل ما أعرفه وبدأت مريم في سرد القصة من البداية. قالت: أنا اعمل ضمن فريق أبحاث علمية متخصص في التراث التاريخي لمصر وقد كان يرأس فريقنا العالم الجليل هاني رأفت صاحب نظرية ترابط الحضارات والتراث الدال عليها وبالطبع أنتم لم تسمعوا عن تلك النظرية حيث أنها ظهرت عام 2060 و كما هو واضح أنتم من رواد بدايات الألفية الثانية،..... بالفعل أخذت تلك النظرية في الوضوح وبدأنا نثبت صحتها حيث بدأ بحثنا بداية من الأهرامات وأبو الهول ومرورا بحفريات المقطم ثم منارة الإسكندرية وأخيرا قلعة قايتباي. فقبل توجهنا إلى القلعة وجدنا على فنار الإسكندرية ما يؤكد أن تصميم القلعة تم بشكل متطور جدا عما كانت عليه التكنولوجيا والعلوم في ذلك الوقت وبالمناسبة هذا ما تم اكتشافه في أغلب الآثار التي بحثنا عنها وفي هذا اليوم ذهبنا إلى قلعة قايتباي وأنقسم فريق العمل إلى مجموعتين وكانت مجموعتي تضم دكتور هاني رأفت والمساعد حسن الذي قابلتموه في البيت وأثناء بحثنا في القلعة هبط بنا جزء من الأرضية ووجدنا أنفسنا في ذلك الزمان حيث مر علينا إلى الآن حوالي ستة أشهر ونحن نحاول أن نعود إلى زماننا وبالمصادفة اكتشفنا مجموعة المتمردين الذين يسعون إلى قلب الحكم العباسي والاستيلاء على العرش بقيادة زعيمهم الأطحل بن النعمان وهنا توجسنا خيفة أن ينجح الأطحل في ذلك حيث أنهم يقوموا بخطف من يرونهم يصلحون لذلك ليتم تجنيدهم من خلال المال أو النساء أو حتى بتهديد أسرهم في بعض الأحيان حتى يفعلوا ما يطلبه منهم زعيمهم. حتى تلك النقطة كانت المجموعة تسمعها باهتمام بالغ وأفواههم مفتوحة وعقول تائهة وفجأة أنتبه احد أفراد المتمردين لاختفاء إبراهيم وصاح بصوت غاضب إبراهيم اختفى يا رجاله وأمرهم زعيمهم الأطحل بن النعمان بأن يقلبوا كل حجر بحثاً عنه ومن سوف يجده له مكافأة كبيرة فنظر الأصدقاء إلى بعضهم ونظروا إلى مريم التي لمعت عيناه ببريق مخيف.....؟؟؟ ==================
ومن هنا ألقى بالقنبلة الجديدة مع الفصل السادس للسيد المحترم ذو الحركات العبقرية والخدع السينمائية اللأستاذ
وأسمع تصفيق حاااااااااااااااااد يا جدع
وكمان عيارين فى الهوا
مع شكر خاص جدا جدا للأستاذ المحترم يحيى على مجهوداته الجليلة
لمتابعة القصة منذ البداية

Thursday, August 16, 2007

يا ترى تعرفو أيه الأسباب

بقالى فترة بلف داخل مدونات الآخرين ولاحظت بعض التشاؤم والاكتئاب الذى أصابهم جميعاً - هو ليه كل واحد عنده استعداد إنه يتشائم ويكتئب للدرجة دى - على الرغم ان ربنا مدينا نعم كتير قوى بس ليه؟؟....جوايا أسئلة كتير محتاجة لإجابات ياريت لو تقدروا تفيدونى.... وقبل مقولها .....انا بس عاوزة اوضح ان ده مش بوست متشائم او انا بنشره علشان اضايقكم ...انا عاوزاكم تشاركونى بأفكاركم ازاى الشخص يتحايل ويتعامل على الأسئلة دى علشان يعيش كويس ومرتاح ومبسوط......ولا هو الإنبساط والسعادة أصبحو عملة صعبة اليومين دول؟؟؟ الواحدة من دول تقابلنى تقولى الا هو انتى مالك مبسوطة كده ليه متكتئبى شوية وتشيلى الهم كده زينا - واللى تقولك ايوة شكلك متدلعة ومرتاحة علشان كده مبسوطة ....وارد عليهم بأن ربنا ادى للكل حاجات تدلعه وتهنيه بس احنا اللى غاويين فقر وغاويين دايما نقعد نبكى على اللى فات - ويا سلام لو عملت كذا وكذا كنت بقيت ايه........ده لو علمت الغيب لاخترتم الواقع .....ده ربنا كاتب كل حاجة بالمظبوط لكل شخص وكل واحد وظروفه ربنا بيديله عليها خير وثواب كبير ....ولإن شكرتم لأزيدنكم......ثم هو فين الحمد والشكر لربنا.....فين الاستغفار .....اللى يوسع الرزق ويجيب الخير ويمحو السيئات....ليه كل شخص ميعملشى وقفة مع نفسه كل يوم ويحاسب نفسه ويشوف لو عمل صح يحمد ربنا انه هداه للصواب ولو عمل أخطاء يستغفر ربنا علشان يتوب عليه ويمحو سيئاته
عارفة صدعت دماغكو كلكو بس بجد بجد فكرت كتير ومش قادرة اوصل لحلول لأسئلتى اللى تعبتنى وخلتنى اشارككم فيها يمكن نوصل سوا لبر أمان - على فكرة كمان الموضوع مش موضوع مجتمع وبلد وسياسة انا مش بتكلم على الحقوق اللى كل واحد متوقعها ومستنيها وموقف عليها حياته .....انا بتكلم على ان كل شخص بيطلب العدل والصدق والخير والحب والامانة والود والاحترام لازم وضرورى يبتدى بنفسه ويصلح من أخلاقه ....ليه كل البشر بقى جواها هذا الكم من الغضب والضيق والحنق وعدم الرضا .... تلاقيك بتتكلم مع شخص تلاقيه اتنرفز واتلكك وعاوز يتخانق ويضربك ... طيب مانتا ربنا مديلك عقل علشان تفكر بيه ولسان هتتحاسب على كل اللى بيطلع منه متستغلهم الاتنين علشان تتكلم بعقل وتوصل لحلول ....ليه الناس بقت بتفضل انها تستخدم القوة بدل عقلها....الزوج يضرب زوجته....والام تضرب ابنها....والبنت تضرب صاحبتها...والشاب يضرب صاحبه.......خلاص كلنا هنلغى عقلنا وعاوزين المجتمع يروح بينا على فين
أسئلتى كالآتى وحقيقى محتاجة آرائكم الجميلة مش مجرد تعليقاتكم
ليه كل ست بتفضل انها تضايق جوزها وتمسك عليه كل اخطائه وتعيشه فى نكد وقرف علشان هيه تعبانة ومرهقة - ده بدل متروحى تترمى فى حضنه وترميه جواه مشاكله وهمومك وتستخبى جواه وتقوليله انا بجد ضعيفة ومحتاجالك
ليه كل راجل بيفضل وبيحب يشيل الهم وخاصة بعد الجواز وكأنه شايل مسئولية البلد على أكتافه على الرغم ان ربنا مديله مميزات كتيير من زوجة واولاد وبيت وحب ومودة ممكن يستمتع بيهم ويراعيهم ويهذب أخلاقهم بدل مهو عمال يجرى وكأنه مربوط فى طاحونة لمجرد انه يجيب اوراق مالية لا تمس القلب بل انها وبفضلها تقسى القلب وتسبب الجفا والبعد ... ده انت ربنا مديلك نعمة كثير من الشباب اللى مش مرتبطين هموتو ويتجوزو ويتذوقو معنى الاستقرار بس اول ميتجوز الراجل من دول هووووووووب تلاقيه بيلعن اليوم اللى اخد فيه القرار وضحى بعذوبيته فيها
ليه الشباب كلهم فى الوقت الحالى بقت دماغهم فاضية مبقاش فيه شباب يغض البصر أو يقرا أو ينزل يتعلم حاجة جديدة ويطور من امكانياته ومهاراته بدل من قعدة القهاوى والبصبصة مع البنات وكل واحد يقولك مانا مش عارف اعمل ايه ليه كل واحد اختار انه يعيش بدون دماغ بدل ميستغلها صح فى انه يكون شخص صالح
ليه ناس كتير بقت عندهم قسوة فى قلوبهم من تجاه والديهم....منتهى الفتور والعجرفة فى التعامل ...ده برضاهم الواحد يترمى جوه الجنة.....ولا تقل لهما اف.....ولا تنهرهما....وقل لهما قولا كريما....مين اللى بيتقى ربنا فى والديه وبدل ميقول لا مش عاوز ولا وانتى مالك أو متدخليش فى حياتى يقول لو سمحتى ومن فضلك ويبوس ايديهم وراسهم ويهتم بيهم وبصحتهم ....دول داقو المر علشان الواحد يبقى شحط عليه القيمة كده
ليه الناس مبقاش عندها وعى دينى وكل شخص تبع ديانته انا مش هتكلم فى ديانات انا هقول ان ربنا رب الكل وفى كل ديانة مذكور بشكل مفصل الصواب والخطأ .....الحلال والحرام....ليه كل واحد بقى بعيد كده......وما خلقت الأنس والجن إلا ليعبدون.....يعنى ربنا خالقنا علشان نعبده وبس ......من خلال تعاملنا مع الناس ومن خلال اشغالنا ومن خلال تربيتنا لأطفالنا ومن خلال صلة الرحم والمحافظة على رعاية الجار علشان يكون فيه الود والحب والتراحم والمواساة والرحمة والخير والألفة
ليه الناس مش بتتقى ربنا حق تقاته علشان يفوزو بجنة عرضها السموات والارض ....ده الواحد عمال يجرى ويجرى ويجرى لكن علشان يروح على فين....مجتمعنا بقى بيستسهل كتير فى انه يكون تابع للشر او الشيطان على انه يختار الخير والحب
اللهم أبلغنا رمضان ... فيه الواحد بيحس ان الناس بيطلع منها الخير كل الخيراللى بيقدروا عليه ولا يكلف الله نفساً الا وسعها....بس مهى شهور السنة كلها بتاعت ربنا والايام والساعات فليه الخير ميبقاش فى كل وقت.....تلاقى كل واحد ماسك مصحف وبيقرا فى المترو والشارع وكأنه سباق لختم القرآن ....القرآن ختمته تكون بهدوء وبتأنى وبحب وبتمعن فى الآيات مش مجرد قراءة....ده مش ذنب الواحد شايله انه يختم القرآن كام مرة ....الواحد بيقرا لربنا...وتلاقى الواحد يقولك انا ختمت كذاوكذ ولا ييجى عشرة مرات ....طيب انت بتقرا علشان الناس تعرف وتفرح بيك ولا علشان ربنا يرضى عليك ويتقبله منك
تفتكرو ممكن من خلالنا نحن المدونون والاصدقاء والأحباء فى الله نتحد وندعو اكبر جمع من الناس على حب الخير وحب الحب والمودة والوقوف بصدد اى شر والنهى عن اى منكر يستطيعون تغييره من الآن وحتى يجمعنا الله فى يوم لا ظل الا ظله ... حقيقى أتمنى ...بحس ان جواكم طاقة هايلة تستطيع تغيير الكثير والكثير
تحياتى إليكم جميعا وأمنياتى بكل الخير والحب والسعادة والأمل
هبة

Thursday, August 2, 2007

فين تاجى - راح فين

السلام والتحية لكل من يزور مدونتى الصغيرة أتانى أكتر من تاج من أكتر من صديق - شنكوتى وعبده محتاس وترو لف - بيبو - وكنت بحاول أهرب بصراحة ولكنهم تزايدو كثيرا وأصبحوا ثلاثة ولقد أجمعت أسئلتهم جميعا ولأننى أعتبر التاج ما هو إلا مرآة لوصف صاحب المدونة – فلقد أجبته بمنتهى الأمانة والصدق – فقط أحب أن أخبركم إننى أحبكم جميعاً فى الله ============================ اسم مدونتك؟ Doba
لماذا اخترته.. وماهي نيتك من وراء اختياره؟
برىء يا بيه والله – بس ده اسم الدلع بتاعى من وانا صغيرة
هل فكرت في إغلاق مدونتك؟ والسبب؟ لا حول ولا قوة إلا بالله – انا مفكرتش بصراحة بس النق اللى بينزل فوق نفوخى ممكن يخلينى فيوم افكر
صورتك في المدونة ورمزيتها ؟؟ أنا حاطه صورة مرسومة لبنت انا مسمياها نور – حبيت الصورة دى قوى ومن يوم مشوفتها وهيه معايا عالموبايل والديسك توب فى الكمبيوتر وكمان على المدونة – حساها فيها نفس بصه عينى وشايفانى من جوايا قوووى
لما دخلت عالم التدوين من الاساس؟
جلست لساعات وأيام وأسابيع مجرد قارئة ومتابعة للكثيرين واستمتعت بقراءة موضوعاتهم كثيرا وبمشاركتى بتعليقى على موضوعاتهم ومن هنا جائتنى رغبة ملحة للمشاركة بشكل فعال – واهو ادينى بحاول وسط العمالقة – بس انا عارفة نفسى مش كاتبة ولا نيلة بس بحب المدونيين وكتاباتهم جدا
جمله قيلت لك فى وصف مدونتك؟
مش قادرة اقول كلمة محددة ولكن يكفى أن بعضهم يستمتع بها وهذا يكفينى
التعليقات بالنسبه لك ,اهميتها؟ مشاركة وتبادل آراء وصداقة متنوعة الأفكار والمشاعر
احلى بوست كتبته ...ضع اللينك , ثم اذكر لماذا؟
أحلى بوست على الرغم من مرارته جوايا كان – البحر ما أحلاه – لكنه كان بيعبر بشكل قوى عن كل ما دار بمشاعرى فى ذاك الحين – فأشعر بأنه يمس قلبى كلما قرأته == ملحوظة == مش هعرف احط اللينك لانى مبعرفشى قوى فى حركات المدونة – يكفينى حبها – مش لازم بقى التقنيات العالية دى
أفضل بوست قرأته؟ وضع لينكه؟ صعب أنه يكون بوست واحد لأن لو الواحد كل مهيدعبس جواه هيلاقى حاجة احلى – حاولت اطلع حاجة واحدة بس لا يمكن
أفضل مدونة قرأتها؟
كثيرووووووووون ولكن كل منهم أوقات يضع أشياء تتوافق معك ومع شخصيتك واوقات أخرى لا تجد نفسك بين السطور وتجد التعليق الوحيد لديك هو – لا تعليق – جميع المدونات التى توجد فيها تعليقاتى فجميعها قريبة من قلبى
حد قل ادبه فى التعليق إيه رد فعلك؟
والله موضوع قله الأدب دى برده مجرد آراء ثم فى الأول والآخر اللى بيقل أدبه فهو اللى قليل الأدب انا اتضايق ليه – يروح يظبط أدبه وييجى – لكن الكلام بشكل موضوعى متحضر – ما أجمله ويا أهلا ومراحب كمان
أسوأ مدونة؟ إلى الآن قرأت الكثير من الموضوعات ولكن أكثر ما أزعجنى هو إنتشار الحديث عن المثليات والخروج عن الآداب العامة للدين – فجميع الأديان تتسم بالسماحة والوضوح ولا داعى للمهاترات – فأى مدونة تتطرق لمهاترات وضيعة فلا يوجد مكان لى بين سطورها
أسوأ بوست أسوأ مدون؟ مليش الحرية انى أعلق لأى شخص بالدرجة دى وإنى أحكم عليه بأنه الأسوأ – ولكن كل ما يسعنى أن أحتفظ بتعليقى لنفسى ولا أدخل مدونته مرة أخرى
هيحصل ايه لإيميلك لما تموتى ؟؟ الله أعلم – بس هكتب فى وصيتى أنه يتقسم على الورثة – هههههههه مش عارفة بس أعتقد أنه لا يوجد من يهتم أن يتطرق لمشاعرى وأفكارى لهذه الدرجة – فهيروح مع اللى راحو – او احسن اكتب فى الوصية يشغلوا فيها قرآن ويسيبوها
اديتى الباسوورد لحد قبل كده؟
لالالالالالالا
كانت إيه طبيعة علاقتك بيه؟ سبق وإنى قلت لأ – هقعد بقى أعيد وأزيد – أجيب صحة منين لكل ده كح كح كح كح الصحة ولت بقى يا اولاد – يلا حسن الختام بقى اسمك ؟ هبة – والدلع دوبه واللى يحب يقول حاجة من عنده أهلا وسهلا فيه لقب تانى الناس بيقولوهولى دلوقتى وهو لقب عزيز جدا طبعا وهو أم يووووووووووووسف
اسم مشهور ببيه وسط اصحابك؟ هبة
عمرك؟؟ سبعة وعشرون عاما ونص شهر كده بالتمام والكمال والله
برجك ؟؟ برج السرطان دراستك؟؟ مجالك؟؟ ليسانس آداب – قسم حضارة أوروبية قديمة – جامعة عين شمس Sales Coordinator
شخصيتك نوعها إيه؟ إنسانة متشائمة فى الظروف الطبيعية ولكن بشكل عام متفائلة جدا - بحب جوزى وابنى وبيتى - وبحب الحياة وعارفة ومتأكده ان ربنا مدينا نعم كتير قوى لازم نستمتع بيها على قد منقدر – بحب الناس قوى وخاصة المقربين جدا
السفر بالنسبة لك؟ أى مكان فيه بحر بالنسبة لى مكان ممتع للغاية – السفر خارج مصر – بصراحة مبقدرش ومبتجيليش الجرأة إنى أفكر فى الموضوع ده
وقت فراغك بتعملى فيه إيه؟ مج نيسكافيه أو فنجان قهوة مظبوط كده مع كتاب حلو ومكان هادىء وموسيقى مميزة وده يبقى احلى وقت – يقما بقعد ألعب أنا والواد يوسف ابنى – او أخرج مع صديقات السوء أنتيماتى المود بتاعك؟ متقلبة المزاج دائما وأبدا ممكن حاجة عبيطة قوى تخلينى فى منتهى السعادة وحاجة كبيرة قوى المفروض تزعلنى تلاقيها مبتأثرشى خالص – بس لما دماغى بتقفل ببقى عندية بشدة وده بيطلع أسوأ ما فى هبة
الاكلة المفضلة؟ هو أنا بحب حاجات كتير مفضلة وبستمتع بيها قوى بس أكترهم يعنى واسمحولى اخليهم ثلاث أكلات وهم الجمبرى – السمك – الفراخ المشوية
الصفات اللي أخدتها من بابا؟ بصراحة معرفهوش لأنه توفى وانا عندى سنة ونص لكنهم بيقولولى إنى أخدت عناده وطيبته الشديده
الصفات التي أخدتها من ماما ؟ ماما حبيبتى علمتنى أنا وأخواتى ازاى نحب بعض بجد ونخاف على بعض – وازاى نتعامل مع المجتمع بنوع من التسامح والود والكلمة الطيبة – ربنا يديلها الصحة ويدخلها الجنة يارب
اكتر ست حاجات بكرهها؟ الخيانة – لأنها بتموتنى وبتقتلنى قوى بجد مبستحملهاش خالص وخاصة لو من حبيب أو من صديق ساعتها هتجيلكم فاجعة بهبة مدمرة تماما الكدب – لأنه بيخلى الشخص اللى قدامى بيسقط تماما من نظرى وساعتها مهما عمل فى المستقبل بيتنيه فى درجة منحطة فى نظرى البخل – لأن البخيل مادياً بيكون بخل فى مشاعره – وأنا مقدرشى أعيش من غير مشاعر حلوة حواليا النكد – بحب الناس تحب حياتها وتستمتع بيها على قد متقدر القسوة – ليه الواحد يقسى على اللى قدامه مدام قادر بكلمة حلوة وبسيطة يزرع الحب والطمأنينه فى نفوسهم إحساسى بالقهر أو إحساسى بعدم مقدرتى على مساعدة الآخرين
اكتر ست حاجات بحبها؟
الله ورسوله والنعم التى حبانا بها جميعا يوسف – إبنى الحبيب يحيى – زوجى العزيز ماما واخواتى نسمة وغادة – اصدقاء العمر
هبة
أصدقاء المدونات
الشغل بالنسبة لك؟ مكان من خلاله يمكن القدرة على التواصل فى الحياة والتعلم والاستفادة بشكل مادى ومعنوى وثقافى انت سعيد؟ الحمد لله على كل شىء عجبت لأمر المرء أمره كله خير إذا أصابه مصيبة صبر واحتسب فكان خيراً له – وإذا أصابه خيراً حمد وشكر فكان خيراً له إزاى بقى الواحد ميكونشى مبسوط بعد ده كله
لو اجتمعت انت وحسني مبارك في غرفة واحده؟
تذكر الله الواحد الأحد واخشاه فإنه يمهل ولا يهمل
لو معاك مليون ونص جنيه......تعمل بيهم ايه؟
كل لما بقعد افر واقول لو ربنا ادانى فلوس اكتر هل هيبقى عندى المقدرة زى دلوقتى على مساعد الفقراء ولا هيصيبنى الغرور وسأصبح بلا قلب – اللهم عافينا يارب تصدقوا – انا مش عاوزاهم خاااالص
بتحب مصر؟ بحبها قوى وبحب ترابها فيكفى قول الله عنها – ادخلوها أمنين خير مصر كبير قوى بس للى بيحمد ربنا وبيتقيه ويخشاه ولا ينقم على حاله
بتحبى البنات؟
بحبهم جدا ونفسى ى بنوته صغنونة العب بيها وأربيها صح علشان أدخل بيها الجنة
مسلم؟ الحمد لله
مين اكتر شخصية ما تقدرش تستغنى عنها في حياتك؟وليه؟
ما نحن إلا ودائع الله على الأرض ولكننى أحب أن يشاركنى دربى يحيى ويوسف وكل شخص يكمن فى داخله حب لشخصية هبة – الحب فى الله – والذى يجمعنا فى ظل الله يوم لا ظل إلا ظله – شخصان تحابا فى الله
ايه اكتر موقف محرج اتعرضت ليه في حياتك؟واتصرفت ازاي؟ يوم لم أستطع أن أواجه من أساء لى وأعلمه بمدى شعورى بالأسف عليه بعتبر ده اكتر احراج ليا فى حياتى ايه الأمنية اللي بتدعي ربنا دايما انه يحققها لك؟ إنه يكون راضى عنى وأنه يحبب فيا خلقه – وإنى أكون زوجة صالحة وأم لديها القدرة على تربية ولدها تربية جيدة يرضى عنها الله ويارب دايما أكون سعيدة وراضية بكل اللى يقسمهولى ويبعد عنى الشيطان اللهم آمين
التاج امرره لمين ؟ إلى كل من يريد أن يضع بصمة خاصة لحياته ليعرف من خلالها أصدقاءه من يكون تحياتى هبة

Thursday, July 26, 2007

استراتيجية تحقيق الأهداف

استراتيجية تحقيق الأهداف ======== لكل منا أهداف في هذه الحياة..ما أهدافك؟
====
فكر معي في الأمرليس الأمر صعبا على فكرةلو كنت لا تعرف أهدافك، إليك هذه الطريقة البسيطة لتحديدهايمكنك أن تغمض عينيك وتتخيل نفسك بعد 10 أعوام من الآن.. الصورة التي تتمناها هي.. ببساطة.. أهدافك التي تريد تحقيقهاتخيل نفسك وفكر.. كيف ستكون في المستقبل؟ما الذي تتمناه لنفسك في هذه الفترة؟
*******
تحديد الأهداف لكل منا أهداف كثيرة في هذه الحياة.. الكثيرون يشكون إليّ من مشكلة عجيبة، وهي أنهم لا يعرفون كيف يحددون أهدافهملا يوجد شخص ليس عنده أهداف.. هذه هي الحقيقة.. لو وجدت مصباح علاء الدين، فماذا ستطلب من الجنيّ؟هذه الطلبات -ببساطة- هي أهدافك
*******
شيء ما معظم الناس يعيشون في هذه الحياة باستراتيجية عجيبة جدا.. وهي الانتظار..معظم الناس يعيشون في انتظار شيء ما.. شيء سيجعلهم أغنياء أو مشاهير أو –ببساطة- أكثر سعادةما هذا الشيء؟
-----------
لا أحد يعلم لو سألت شخصا تعيسا: ما حل مشاكلك؟ سيجيب: بكرة تفرج بكرة إمتى بالضبط؟ لا أحد يعلم هؤلاء الناس لا يفعلون شيئا.. يرضون بأحوالهم التي لا يريدونها.. ويعزون أنفسهم بصورة خيالية في أذهانهم يأملون أن تتحقق يوما مامتى ستتحقق أو كيف؟ لا أحد يعلم دعني أخبرك بحقيقة بيني وبينك هل تعرف أن هناك الملايين، بل المليارات من الناس.. يموتون دون أن تتحقق أهدافهم؟حقيقة مرعبة هي، لو أردت رأيى هل أنت من هذا النوع من الناس؟ أعني هؤلاء المنتظرين لشيء ما؟
*************
أجب على هذا السؤال وكن صريحا مع نفسك هؤلاء ليسوا راضين عن أوضاعهم.. لأنهم ينتظرون أن تأتي معجزة إلهية ما لتخرجهم مما هم فيه الله سبحانه وتعالى سيساعدهم وسيبارك لهم ويوفقهم ويفتح لهم الأبواب المغلقة.. إذا سعوا نحو أهدافهم إلا أنه –سبحانه- لن يجعل السماء تمطر ذهبا وهم جالسون في بيوتهم في استرخاء قل لي هل أنت من هؤلاء؟
*******
خذ هذه الحكمة البسيطة وفكر فيها مافيش حاجة بتحصل لوحدها بمعنى آخرماذا فعلت كي تحقق أهدافك التي فكرت فيها في بداية الرسالة؟هل تنتظر أن تتحقق هذه الأهداف وحدها..أم أنك سائر في الطريق نحو تحقيقها؟؟هذا هو السؤال..لو لم تكن قد حددت خطة أو طريقة لتحقيق حلمك، فقد حان الوقت
*******
صديقي القارئ..أنت الآن تعرف أهدافك، وعرفت أنها لن تتحقق وحدها.. فماذا تنتظر؟ قم الآن وخذ خطوة في اتجاه تحقيق ما تريد قم بالمكالمة الهاتفية التي كان يجب أن تقوم بها منذ زمن.. اسأل عن الدورة التي يجب أن تلتحق بها.. أو كلم الشخص الذي كان لابد أن تكلمه.. روح المشوار اللي كان لازم تروحه.. أو...ابدأ الآن.. انهض وحقق هدفك ألا تعرف أننا نعيش في هذه الدنيا حياة واحدة فقط وأن علينا أن نجعلها أفضل حياة ممكنة؟ ******* -د.شـريف عـرفة-

Wednesday, July 18, 2007

البحر..........ما أحلاه

يمكن أكون هتكلم على نفس الموضوع التابع للمصيف الجميل اللى شاركت فيه ولكن نفسى اتكلم فى أكتر حاجة أسعدتنى للغاية وخلتنى - رغم أنف الآخرين - أستمتع بشكل غير عادى وهو
البحر وأمواجه
سبحان من أبدع هذا الشىء الرائع - أنا نفسى أعرف ايه سر البحر الواحد بيكون جواه طاقة كبيرة ويروح يقف قدام البحر يلاقى طاقته كلها السلبية بتتبدد أمامه وبيمشى من هناك وهو قلبه مفتوح لكل الدنيا والواحد لو كان مبسوط أو فرحان وجواه مشاعر جميلة بيروح قدام البحر وبيحس أنه قادر جدا ونفسه قوى ياخد البحر كله بين أحضانه وبيبقى جواه طاقة وحب تقضى الدنيا كلها
فى اليوم الكئيب الذى مررت به إنهالت دموعى بقوة وبغزارة ولم أحتمل الإنتظار فطلبت من زوجى الذهاب للشاطىء وبالفعل ذهبنا معاً - ولكننى وفور أن نظرت لأمواجه المتلاطمه على الصخور الكبيرة المكعبة - بدأت فى ثورة من البكاء والنحيب المتواصل وكأن البحر يأخذنى بين أحضانه ويشعرنى بمدى إحساسه بمشاعرى وكأنه يبدأ فى الطبطبة على أكتافى وتمتزج دموعى بمياه بحره الواسعة - شعرت وكأننى أفرغت كل شحنة البغض والكراهية التى كادت وأن تعتصرنى من داخلى لشعورى بأننى مقهورة داخلياً وليست لدى القدرة حتى على التنفس
ولكن سرعان ما بدأت فى الهدوء وكأنه يقول لى هيا فلتهمى ولتقفى من جديد لتخطو وكأنك طفل يبدأ فى المشى خطوة خطوة فتهدأ رياحك التى تجتاحنى ولتبدأى الآن ومعى فى بث نسيمك الجميل الذى عهدته معكى طوال السنين - تعالى مرة أخرى إليا لبثك الحب والطمأنينة والشجن اللذيذ ولتستمتعى مرة أخرى بكل ما أقدمه إليكى - هيا فلتثبتى ولتعرفى أنكى أقوى من أن تكسرك الظروف والبشر وضغائنهم الضعيفة التى مثل السوس الى ينخر فى البنيان القوى
هيا ومن الآن فلتعاهدينى على أن تكونى قوية وألا تجعلى رياح السخط والغيرة والامتهان أن تعلو فوق حبك وأملك ورضاكى بكل ما يكتبه الله لكى ولتعلمى يا صديقتى الصدوق أن الله لا يبعث لكى إلا بكل ما يفيدك فى الحياة وأنه ربما وضعك بهذا الموقف لتتعلمى من القريب ومن البعيد ويوضح لكى نوايا الآخرين فرب ضارة نافعة
بدأت فى أن ألملم دموعى ومشاعرى المبعثرة مرة أخرى وقررت أن أخوض المعركة للنهاية ولكن وأنا فى منتهى القوة فلقد بعث الله لى برذاذ المياه المنبعث من الأمواج المتناثرة لتجلعنى أفوق من أحزانى ووجدته يقدم لى الزهور والرياحين ويقول لى أنها الدنيا الفانية فلتفرحى بما أنعم الله به عليكى وبدأت فى الحديث مع نفسى ومعه ومرت ساعات وأنا أمامه ووجدت نفسى فى النهاية وأنا أخطو خطواتى للرجوع لما كنت فيه - وجدتنى قوية متماسكة واثقة من كل قدراتى علمت مكامن القوة لدى وتمسكت بها وأدركت نقاط ضعفى وتغاضيت عنها لرغبتى الشديدة فى الإستمتاع بوقتى للنهاية - رغم أنف الآخرين - وبالفعل رحلت وأنا ضاحكة سعيدة شاكرة حامدة متوسلة لله رب العالمين - الله الذى حبابنا بهذه القوة المهولة والتى تسمى البحر
ومع يوم آخر يمر وجدت نفسى كلما نظرت إليه ابتسمت ووجدتنى أشكره لوقوفه معى ومشاركته لأحزانى قبل أفراحى ووجدتنى أبتسم مرة أخرى وأجدد معه عهدى على التمسك بالسعادة والأمل والرضا بقضاء الله فى أى وقت
جلست فى هدوء وسط فنجان القهوة الخاص بى وكتاب شيكاجو الذى أقرأه لأول مرة بعدما وجدت الكثيرين يفضلونه وتركت نفسى بين يديه تأخذنى لعالم الأحلام الجميل الملىء بالسعادة ترى هل يفعل بى البحر كل هذه الأفاعيل لى وحدى أم أنه يشارككم أنتم أيضاً أوقاتكم وأحلامكم - خبرونى بالله عليكم لأعرف هل حقيقى ما أشعر به من حب شديد وتعلق أشد صحيح أم هو من فعل أحلامى
تحياتى وأمنياتى بتحقيق كل ما هو مبهج وغالى على نفس كل منكم
هبة

Wednesday, July 11, 2007

آه يا قلبى

أدينى رجعت وياريتنى مرجعت للأسف صوت النكد والقرف والملل كانوا أقوى بكتير قوى من قوتى - ومقدرتش استحمل - سامحونى غبت عليكم بس غصبن عنى
حقيقى أعصابى لدلوقتى مش عارفة ولا قادرة أرجعها زى مكانت - مش قادرة اعرف او افهم ليه الناس بتحب تعيش فى النكد والقرف بدل متستمتع بالجو الساحر والطبيعة الى ربنا حبانا بيها - مفيش فى قلبى والله او على لسانى غير ربنا يسامحهم أو يسامحها هيه بشكل خاص - حماتى طبعا - على فكرة انا عمرى مسميتها حماتى من يوم متجوزت دايما كنت لما بتكلم كنت بقول انها والدة زوجى - لكن من اليوم هى حماتى وفقط
مش عاوزة أكئبكم بتفاصيل مزعجة أو كلمات سيئة ممكن تطلع لأنى فى شدة غضبى ولكننى إفتقدتكم كثيرا - وأقسم بالله ما فى شىء كان يهون عليا لحظات الكآبة المستمرة هناك غير كلماتكم الرقيقة وأهتمامكم بى
لكم منى كل الحب والأمل والآمنيات بتحقيق أغلى الآمال والأحلام
قريب قوى انشاء الله هتلاقو حاجة جديدة وأتمنى تكون سعيدة تحياتى للجميع ولسؤالكم الغالى عنىبحبكو كلكو جدا والله
هبة

Wednesday, June 27, 2007

الدنيا ربيع ---والجو بديع

طبعاً طبعاً انا فى منتهى الكدب الشديد لما بقول ان الدنيا ربيع والجو بديع --- ده الدنيا حر مووووووووووت الواحد مفرهد من الحر وعينيه نعسانة وعنده خمول وعمال يتاوب وكسلان حاجة صعبة على بشعة على خنيقة ومقززة فى آن الوقت
إليكم ومن موقعى هذا أحب أن أنوه اننى سأقوم بخيانتكم جميعاً وسأطير مع زوجى وأبنى الحبيب إلى الأسكندرية المارية وترابها الزعفراااااااااان -وأنتو لألألألألألألألألألألألألأ- متتخيلوش قد ايه نفسى بقالى كتير أروح بس أقف الساعة 5 الفجر قدام البحر وميبقاش أى حد هناك منى ليه كده والواحد ياخد من جواه ويرمى ويرمى ويرمى - قال يعنى بيرمى زبالة - لغااااااااااااااية لما الواحد يفضى ويرجع أنصع مالصينى بعد غسيله
هاروح أسكندرية هيييييييييييييييييييه - تصدقو بقالى ييجى حوالى كده 6 سنين مروحتش هناك غير يوم وارجع - بحب جدا أقف عند بير مسعود كده الصخرة اللى فوق والميه عماله تضرب فيها وأوقات بتغرق كل الحبيبة - أقصد اللى واقفين بس بتبقى تحفة - بيبقى نفسى جدا أقوم نطه جوه الميه - مبيبقاش نفسى غير أن أيدى تكون فى أيد حبيبى وجوزى وبس وأنا وهو والبحر والسما والصخور حوالينا والهوا الجيل مالى صدورنا والحب منور قلوبنا - يارب يارب تكون رحلة سعيدة
نفسى تكون رحلة مليانة حب وفرح وهنا وسرور وكل اللى معايا يستمتعو بوقتهم حاكم انتو عارفين فيه ناس غاوية نكد وقرف وملل وكآبة وبعيد عنكم أنا لما بكون مع حد كده أعصابى بتنهار
دعواتكم معايا ومش هنسى ألف وأدور وأجيبلكم من كل حتة بق مية مالحة وسمكاية وبسبوساية ورملايه وممكن حتة قنديل بحر لو حابيين ولو فيه يعنى طبعا مش هستخسره فيكم ده أنتو حبايبى
ها بقى قولولى أنا عن نفسى عاشقة للبحر وبير مسعود وصخرته تحديداً وبستمتع جدا ما بينهم - أنتم بقى بتستمتعو باييييييييييييييه - كل واحد يقول الحق واللى بينبسط حتى وهو بيلعب فى الشارع يقول ميتكسفشى مش هضرب المرة دى
بحبكو كلكوووووووووووووو قددددددددددددددددددد البحر والسما زى أبنى مبيقول
سلالالالالالالالالالالالالالالالالالالاموز
هبة

Tuesday, June 19, 2007

أرضى نعم --- أم لا

إناث كثيرون بنات وبنين - شباب وشابات من العجائز كلهن وكلهم وهؤلاء وتلك الكثيرين والكثيرات لم يكتفوا؟؟ قالت لى صديقة عزيزة جدا على قلبى....أريد أن أرزق بمليون جنيه - فاندهشت كثيراً ونظرت إليها فى عجالة ووجدت لسانى يسبق تفكيرى ونطقت بالكلمات قبل أن يفكر فيها عقلى وسألتها - لماذا مليون جنيه بالذات؟؟ فأجابت فى عجالة نعم أنا محتاجة أعيش زى كل الأغنياء ومن هنا بدأنا نتكلم ونتحدث وكانت كلماتها ناقمة على أحوالها وكانت ساخطة غاضبة حزينة ... وبدأت نبرات صوتها تنخفض ودموع عينيها تسيل على خديها ...بصراحة يا سادة يا كرام ...شعرت بأن قلبى رق لحالها وبدأت أسألها بلطف ورقة...وتحدثت وتحادثت وكان هذا هو الحوار بينى وبينها أنا: لماذا تريدين المليون جنيه هى: عاوزة أعيش أنا: وانتى الآن لا تعيشين هى: ودى عيشه دى أنا: مش فاهمة هى: الدنيا أصبحت نار...الطعام والشراب والعيشة أنا: يا أختاه لما لا تفكرين فى النعم التى حباها الله تعالى لكى هى: نعم ايه دى أنا: أستغفر الله هى: طيب قوليلى ما هى هذه النعم أنا: هل أتاكى ورزقك الله تعالى بصحة صحيحة هى: نعم أنا: هل أتاكى ورزق الله تعالى بعيون لترى بها جمال الدنيا ووجوه أحبائك هى: نعم أنا: هل أتاكى ورزقك الله تعالى بشفاه تتحدثين بها... تضحكين أحياناً...وتبكين أحياناً...وتقولين بها كلمات الحب أحياناً...وتمضغين بها الطعام اللذيذ أحياناً هى: نعم....فعلاً أنا: هل عندك أمعاء ومعدة وكبد وبنكرياس يأكل ويهضم ويحول ويتحول ويصل إلى المطلوب هى: نعم أنا: هل أتاكى الله تعالى تأخذى بهما وتعطى....تأكلى بهما وتشربى...وتستطيعين التخلى عن مساعدات الآخرين هى: نعم أنا: هل أتاكى الله تعالى تسيرين بهما أحياناً فى البر وأحياناً فى البحر وتشعرين معهم بأنكى طائر يطير هى: نعم وقبل أن أكمل الحديث وجدتها تقول لى أنها لم تفكر يوماً فى مثل هذه الأمور ...ولكن كانت تنتابنى حالة من الغيظ الشديد - فسألتها...؟ وأجابت أنا: سوف أعطى لكى هذا المبلغ وربما أكثر بكثيرولكن بشروط هى: فأجابت فى عجالة ....ماذا مذاذ....؟ أنا: أياً من النعم هذه تختارين أن تفقديها فى مقابل هذا المبلغ هى: أنتى تمزحين...!!!؟...ماذا تقصدين أنا: يعنى ممكن مثلاً أن تفقدى إحدى عيناكى أو لسانك أو حاسة السمع أو إحدى قديكى أو يديكى أو أحد أولادك أو أحداً من أهلك؟ فى مقابل أضعاف المبلغ هى:أعوذ بالله....أعوذ بالله أستغفر الله العظيم وقالت وهى تبكى وتبكى وتخجل من نفسها وتستغفر ربها فى صدق صدوق حمداً لله يا أعزائى .....نحن جميعاً فى نعم.....هذه النعم وضعها ربُ كريم جداً وصف نفسه بالكرم وأيضاً بالحكمة.....يعلم ما الذى يسعد عباده....وما الذى يتعسهم... فأعطى لكل منا حقه الكامل المتكامل من النعم التى تكفل له سعادة الدنيا والآخرة أكثر من هذا أو أقل من هذا يصبح عبث - ولنعلم جميعاً أن النعم لابد من الحفاظ عليها وكأنها قطعة من اللؤلؤ - إذا حافظنا عليها تزداد بريق ويزداد قيمتها - وإذا أهملت فأصبحت قطعة لا قيمة لها قولو معى جميعاً.......شكراً لك يا ربى - رزقتنا بشموس وأقمار وأنهار وجبال وهواء وألوان وبلابل وعصافير وأسماك وطبيعة خلابة - وأخيراً سخرت لنا جنة للموعودين - فلابد من زيادة الدم عند البنى آدمين ليا جارتى إنسانة أكتر من رائعة ليها الكثير من الأفضال عليا فى كونى بقيت شخصية أكتر تفاؤل واستمتاع بالحياة وأكثر هدوءاً وتقبلا لكل ما حبانى الله به ورضا بكل ما يحدث لى سواء خير أم شر - هذه المرأة وأسمها وفاء وهي فى غاية الوفاء تكتب كثيراً كثيراً وكل ما تكتبه كثيراً ما يدمع عيناى - فلقد قررت بعد موافقتها على أن تصبح مدونتى البسيطة منبع للنور لخروج ما تكتبه إليكم لعله يكون همسة قلب منها إليكم تعبر لتضىء لكم قلوبكم بكثير من السعادة والشجن أرجو أن تكون تعليقاتكم منها وإليها وأعدكم بأن جميع الردود ستكون من خلالها ولكنى مجرد حامل عبارات من الحنين منها ومنكم - جميع تعليقاتكم سوف أحملها إليها وأعود إليكم بتعليقات تخرج من بنان أفكارها وعقلها وقلبها يسبقهم تحياتى إليكم وأرجو أن تفيدونى هل أستمر أم أتوقف فى تقديم أفكار وأحلام وخواطر.....الغالية وفاء