Wednesday, June 13, 2007

عن العشق والهوى

كنت فى يوم بتفرج عالتليفزيون ولقيت القناة اللى بتعيد الافلام دى طول الشهر بتذيع عن عرضهم لفيلم عن العشق والهوى - كتير من المقربين لينا كانوا شافوه وشكرولى كتير قوى فيه - يومها كنت فاضية قوى وزهقانة ولما اتعرض الفيلم شوفته يومها 3 مرات لما قعدت مثلا اسبوع بعدها كل احاسيسهم متعلقة فنفوخى واقول هو الشخص ده غلط فى ايه ودى عملت ايه بصراحة اللى عجبنى قوى كمية الأحاسيس اللى فى الفيلم كتيييييير قوى تاخدك كده لعالم تانى - للى شاف الفيلم تقدرو تقولولى مين الشخصيات التلاتة من البنات اللى اتظلمت اكتر منى زكى - منة شلبى - بشرى وعاوزة رأى الشباب فى دور طارق لطفى - الأخ - اللى من وهو صغير بيحب مرات أخوه وكمان رأيكم فى أحمد السقا ورد فعله لما ساب منى زكى علشان سمعة أختها وساب زوجته واتجوز من ست تانية لمجرد انه مقدرشى يلاقى الحب معاها وانها كانت مرحلة علشان يخرج من ازمة فراق حبيبته بيها ودور خالد صالح مين فيكم يقدر يقوم بيه - أو بمعنى آخر مين اللى عنده وشايف فى نفسه المقدرة انه يتزوج من امرأة لها ماضى ويكون عنده منتهى الثقة انها مش هتخونه على الرغم من انه ممكن ينالها لكنه ومع كل أمواله يخاف الله - بصراحة الدور ده عجبنى جدا وحيرنى كتير قوى انا شايفاه شخصية فى منتهى القوة وجديرة جدا بالاحترام والتقدير

24 comments:

الشنكوتي الكبير said...

ايه ده دا انا اول كومنت الحمد لله
اولا فكرة ان احمد سابها عشان ماضيها برغم كل الجنتله اللي عندي والدماغ المتفتحه احب اقولك انه كان معاه حق
عشان هو لو كان كمل معاها كان هيشك فيها طول الوقت وكان هيظلمها لحد ما هي ممكن تقرر تثبتله انها ممكن تعمل اللي هي عايزاه من غير ما يعرف وصراعات كتير بقى وقرف يعني كده احسن شيل ده من ده يرتاح ده عن ده
المهم بقى البيه اللي بيحب مراة اخوه ده طبعا لو بيحبها جوه مشاعره اعتقد كل واحد حر في مشاعره انا ممكن احب واحده ومتجوزه وعارف انها عمرها ما هاتخون جوزها عشاني لكن دي مشاعري محدش يحاكمني فيها مادمت مش باذي حد ماشي لكن لو حاولت اضيع حيات اخويا بحجة انه هو مش بيحبها ومش بيديها حقها يبقى انا بخدع نفسي عشان احلل لنفسي الغلط
اما دور الكينج خالد صالح حبيب قلبي فهو عمل حاجه ممكن تنفع في بلاد بره
انما هنا ما اعتقدش ان انا ممكن اتجوز واحده منحرفه عشان انا بثق فيها من اللي شوفته بعيني ده من رابع المستحيلات ان ديل الكلب ينعدل
لكن لو بصينا بالراحه لموقفه هنلاقي ان هو عمل احسن حل لموقفه بما انه مش قادر يستغنى عنها وضميره صاحي يبقى يتجوزها وامره لله ونرجع نقول ان التوبه متاحه للجميع عشان ربنا رحمته واسعه قوي
لكن عن نفسي مقدرش اعمل اللي هو عمله
اسئلتك جميله قوي يا دوبه
تسلم ايديكي ودماغك يا عسل
سلااااااااااااااااااااااااااااام

Mirage said...

خالد صالح ده اصلا دوره صعب قوى حد يقوم بيه فى الواقع

truelove said...

هوبة الجميلة سعيدة باننا فيه تشابه كبير ما بنا في الاحسايس والمشاعر اما بالنسبة لفيلم العشق والهوى هو عجبني كتير وصدقيني انا مع موقف احمد السقا لما ساب مني زكي لان الزواج في الاصل هو مش علاقة بين اتنين وبس دي علاقة تمتد للاسرتين اما طارق لطفي فهو مرتكبش شي يؤلم عليه لانه حب ولكن حبتته كانت بتحب اخوه ففضل يشوف سعادة حببته حتى لو على حسابه أما لموقف خالد صالح فده موقف انسان يملك من التسامح مالا لايملكه الكثير من البشر
تحياتي ليكي ياهوبة وياريت تبعتيلي ميلك

Mohamed Hamdy said...

الفيلم دة جميل جدا رغم أنف المعترضين , الفيلم فكرته بسيطه , لكن جوة بساطه الفكرة فيه تعقيد كبير أوى فى الأحداث , تمثيل السقا جه بسيط ومقنع , طارق لطفى اثبت للمرة الالف انه يستحق القمه , منه شلبى حببت الناس فى شخصيه الزوجه التانيه , منى زكى بجد كانت متألقه ...

لا ينافس الفيلم سوى إسلوبك الجميل فى الكلام عنه , ووصفك الرائع لكل شخصيه فيه ..

تقبلى تحياتى

Doba said...

الشنكوتى الكبير

هاى يا جنتل يا كبير - مانتو ومقصدش انت طبعا بتظلموا بنات كتير قوى فى المجتمع لكن تصحيح الاخطاء مش من مسئوليتكم - فعلا معاك حق مش اى حد عنده المقدرة دى من التسامح القوة

تحياتى يا متفتح
======================
mirage

هو فعلا فى منتهى الصعوبة على الرجل الشرقى انه يقوم بالدور ده الا فى الخفاء طبعا او فى الحرام

اشكرك
=================
truelove

انسان يملك من التسامح مالا لايملكه الكثير من البشر

معاكى حق قوى فى دى قدرة الآخرين على التسامح ضعيفة قوى

ايميلى موجود فى المدونة ويسعدنى نتعرف اكتر.........هبة
======================
mohamed hamdy

حقيقى الفيلم اعمق بكتير من الظاهر انا شفته 3 مرات وفكل مرة كنت بشوف حاجة جديدة زى الولد اللى ادمن وانتحر فى الاخر فى اخر مرة شوفت الفيلم حسيت انه ضعيف قوى لان روحه امتلكتها امراة وده نوع من الادمان من المستحيل او من الصعب جدا انه يبطله زى هو مقال

انا معاك فى ان منه شلبى حببتنى قوى فى دور الزوجة التانية وان اوقات الراجل بيكون معاه حق فى انه يتزوج بأخرى على أن لا يظلم الأولى

اشكرك على زيارتك ........تحياتى

الطائر الحزين said...

السلام عليكم
من غير أفلام ولا حاجة الأمور معروفة و الدين لم يترك شاردة ولا واردة الا وقالها يعنى ليس هناك مانع ان يتزوج الرجل بامرأة كانت متزوجة او مطلقة
ما دام لا يمنع هذا شرع الله
ام اذا كنا نخجل من الشرع ونلتمس الحق فى شىء اخر فنفعل ما نيرد ونتحمل العبء وحدنا
تحياتى

Spyfun said...

ازيك وكيفك
خالد صالح دوره انا قومت بيه بس مش زيه بالظبط بس نفس الفكره بس بصراحه كنت علي طول مضايق بس الحمد لله البنت طلعت مش من النوع اللي بيتوب لان الشخصيات دي في الحقيقه مختلفه عن الافلام يعني مش ينفع تبيع نفسها مهما كان الا لو كانت مالهاش اساس في حياتها
الللي اتظلم بقه هي بشري و عصام جوز منه شلبي بس بشري هي اللي ظلمت نفسه لما اتجوزت واحد هي عارفه انه مش بيحبها
لكن عصام دا بقه ضحية
انا كتبت عن الفيلم دا هو حلو اللي ضايقني فيه اننا في الحقيقه في امثله زيه
احنا خلاص مابقاش عندنا رادع ديني وبقينا بنتكلم عن اللي بيزني و يخون باسم انه مش لاقي الحب و بيدور عليه علي انهم دا الطبيعي بتاعنا
واحده بتخون جوزها علشان مش بتحبه
والتاني بيخون مراته لنفس السبب مع العلم انهم محدش ضربهم علي ايدهم للجواز

انا مابقيتش فاهم حاجه

.:.-=- ELGaZaLy-=-.:. said...

السلام عليكم

ما لم ينهة عنة الدين فلاا خجل ولا جدال

Sharm said...

الفيلم ده رهيب

bastokka طهقانة said...

الفيلم ده فرسني موووت
الراجل متجوز ست زي الفل و راح يحب عليها
رجالة عايزة الفرم



اوروفوار

Doba said...

الطائر الحزين

معك حق - ان الدين الاسلامى لم يترك ئغرة فى المعاملات الاسلامية الا وفيها شرح وافى لكل الجوانب - اشكرا لك مداخلتك الجميلة - تحياتى
==================
spyfun

انا الحمد لله بخير- انت اللى عامل ايه
انا معاك ان بشراتظلمت بس زى انت مقلت هيه اللى قبلت فى الاول تتجوز واحد مبيحبهاش

بص هو الحلو فى الفيلم ده ان محدش خان الكل كان بيتصرف فى حدود مقبولة - بس لو بتتكلم عالمجتمع بشكل عام فهو فعلا الرادع الدينى بقى اقل كتير

انت فاهم كل حاجة بس عامل مش فاهم
تحياتى واشكرك
==================
.:.-=- ELGaZaLy-=-.:.

اشكرك على المرور ومعك كل الحق
تحياتى وسلامى
==================
sharm

مدونتك جميلة والفلم فعلا رهيب وممتع للغاية وكلهم أدور أدوراهم ببراعة
أشكرك وتحيتى
==================
طهقانة

هو أينعم الرجالة عاوزة الفرم - بس مش كلهم - زى مهو صعب الستات تعيش بدون احساس فالراجل مش بيعيش غير وهو حاسس برجولته وكيانه

تحياتى يا بستوكة
ولكل البلوجرز
هبة

انتظار مؤقت said...

انا مشوفتش الفيلم ..حشوفو و اقولك راي فيه ..
تحياتي يا اجمل هوبه

Rosa said...

انا كمان اتفرجت على الفيلم دا كذا مره و اثر فيا كتير
اكتر شخصيه حساها اتظلمت بشرى بجد صعبت عليا اوي حسيتها مثال للبنت المصريه الي بتعمل كل حاجه عشان جوزها من اول من انها مش حبت ولا شافت غيره لحد ارتباط فرحتها وحزنها فقط بموود حبيبها
اتظلمت جامد
احمد السقا بقا ضايقني جداااااااااا
منى زكي صعبت عليا برده
موقف خالد الصاوي اعتقد انه نادر جدا في الزمن دا
تحياتي يا هبه على البوست الجميل دا . وكمان كنا عايزين نعرف اجابتك عن الاسئلة الي انت طرحاها
تحياتي :)

Doba said...

انتظار مؤقت

منتظرة رؤيتك للفيلم ولتعليقك
تحياتى
===============
Rosa

هو حقيقى بشرى اتظلمت فى الفيلم بس هيه اول واحدة ظلمت نفيها لما اختارت انها تتجوز واحد وهو مبيحبهاش

بشرى عارفة ان اخوه بيحبها الست عندها ناقوس بيدق ويميل ناحية الحب - يعنى لما شرب عصير الطماطم وقالها انتى بتشربيه ازاى وقالتله انت بشربه ليه متشرب غيره - حقيقى هيه عارفة بس عاوزة اللى بتحبه

انا معظم آرائى فى الفيلم رديت من خلال التعليقات اللى جتلى - اكتر واحد معجبنيش شخصية احمد السقا - حسيت انها شخصية سلبية معندهاش القدرة على اخد القرار او التمسك بحاجة

ضحى بمنى زكى فى الأول والتناقض هنا بيبان لما نلاقى خالد صالح افق انه يقوم بالدور بالكامل فى انه يتجوز الشخصية الأساسية غادة عبد الرازق

وبعدين اخد واحدة مبيحبهاش علشان ينسى وده رجاله كتير قووى بيقومو بيه فى مجتمعنا للأسف

وفى الآخر بيتمسك بمنه شلبى اللى هيه برده كانت السبب الوحيد فى نجاح العلاقة زى هيه محكت انها كانت بتخاف وبتتألم وبتغير وبتتعب ومبترضاش تضايقه او تحمله هموم

فهو سلبى - أنانى - خاين وده لأنى شايفة ان كان من حق بشرى انها تعرف وتختار تبقى معاه كمراته او تاخد حريتها وتعيش حياتها بطريقتها

تحياتى ليكم جميعا
وأشكركم
هبة

3abdo me7tas said...

هى قصة الفلم جميلة جدا بس أنا أعرف ناس بتتعلق بفلم معين عشان يمكن شايفه نفسها فى الفلم يعنى انا فيه بعض الأفلام بحب أتفرج عليها جدا وعمرى ما أزهق منها يمكن عشان بشوف نفسي البطل أو مثلا نفس القصة اللى انا بعيشها
على العموم عشان مطولش عليكم أنا قصتى فى البلوج بتاعى عايز رأيكم تنفع فيلم ولا ؟؟؟

Té la mà Maria said...

please visit, thank

ياسر سليم said...

قوليلى هيذيعوا الفيلم امتى تانى .. وانا اتفرج عليه واحللك الشخصيات ان شاء الله ..

kasperb4 said...

أحمد بصراحة كان موقفه صعب جدا
الموضوع مش مجرد ان اختها مشيها بطال وبس
لا
الواحد لازم يعمل حساب ان لو ربنا مثلا كرمهم بأولاد
يطلعوا يلاقو خالتهم لامؤاخذة يعني

وكمان فين النهاردة الاهل اللي هيرضوا يخلو ابنهم يجوز من واحدة اختها شغالة ف بار
إلا اذا كان اهل مش بيهمهم النسب وعلى الاقل يكونز ناس محترمين يعني مش هقول بأه ولاد عيلة والكلام ده

وف الحقيقة بردو عشان نكون منصفين منى مظلومة جدا ف الموضوع كله
بس انا شايف ان احمد معذور
مع اني لو كنت مكانو مكنتش اسيب منى
البنت ما تتعوضش بصراحة
وكان ممكن حكاية اختها دي تتحل بكذا طريقة

....

kasperb4 said...

انا عارف ني بخرف بس الحكاية معقده اصلا

:) :)

Doba said...

3abdo me7tas

انا مش بتكلم عن انى متعلقة بالفيلم لكنى حقيقى لقيت شخصيات مرسومة ومأدية دورها بمنتهى البراعة - هروح اقرا البلوج بتاعك وهقولك ينفع فيلم ولا لأ - تحياتى ليك ولزيارتك
=======================
Té la mà Maria

i will visit you, thanks
=====================
ياسر سليم

معرفشى والله هيتذاع امتى بس هشمشملك كده وهبقى اقولك لو عرفت

تحياتى ومنتظرة تحليلك
====================
kasperb4

منين بتقول ان مينفعشى الواحد يناسب واحدة تكون اختها بتشتغل فى بار علشان النسب - وبعدين تقول البنت رائعة بصراحة ومتتعوضى على منى زكى

اعتقد ان ده نوع من التناقض - مش عارفة بس انا معاك ان منى زكى مظلومة جدا بس الحمد لله ربنا نصفها فى الآخر بالجميل شريف منير - انا كنت هزعل قوى لو محصلهاش حاجة حلوة

الموضوع مش تخريف ولا حاجة بس فعلا هيه مشاعر واحاسيس تخليك تحتار جدا تختار ايه وترفض ايه

تحياتى ليك
==================
هبة

اجندا حمرا said...

عزيزتي هبه
يمكن انا مااتيحتش ليا الفرصه اني اتفرج علي فيلم عن العشق و الهوي
بس عايزه اعلق علي جزئيه احمد السقا
فكره ان الراجل يكون و يقول ان عقليته متفتحه و لما يتحط في موقف زي اللي احمد السقا اتحط فيه اغلبيه الناس بتعمل كده
عشان احنا دايما بيهمنا كلام الناس و حتي لو كنا واثقين في اللي بنحبها برضه بيفضل جزء الشك جوانا و اي حاجه حتعملها حنبتدي نديها الف معني و معني
و خصوصا لو الشاب صاحب تجارب كتيره فلما بيقابل واحده سمعتها مش اد كده بيبتدي يخاف مع انه برضه كان له علاقته بس حنقول ايه الشك بيقتل اي احاسيس حلوه جوانا
و حتي لوالبنت دي لاغبار علي اخلاقها و كل مشكلتها ان ليها حد في عيلتها سمعته مش ولابد بتتاخد في الرجلان حتي لو هي مظلومه
و بتتظلم بالتالي
صعب انك تغيري عقليه الناس لانها جزء من عقليه المجتمع اللي بنعيش فيه
و لما يتغير المجتمع ممكن تتغير عقليه الناس اللي عايشه فيه
تحياتي علي البوست المميز

Doba said...

أجندا حمرا

معاكى فى كل اللى قلتيه - ياريت لو تقدرى تبقى تشوفى الفيلم أكيد هيعجيك وأشكرك
=============
تحياتى---هبة

تامر حسين said...

سؤال بس هو المليون جنيه دلوقتي يعملو حاجا
ده العربيه المرسيدس دلوقتي بتعدي المليون جنيه
والله الانسان عينيه فارغه حتي لو جاله مليون هيعوز دشليون
تحياتي

Doba said...

تامر حسين

أعتقد انك معلق عالموضوع التانى - احم احم هنا عن العشق والهوى مش المليون جنيه

بس معاك حق الانسان فعلا مبيملاش عينه الا التراب

تحياتى وأشكرك للزيارة الكريمة
هبة