Thursday, August 16, 2007

يا ترى تعرفو أيه الأسباب

بقالى فترة بلف داخل مدونات الآخرين ولاحظت بعض التشاؤم والاكتئاب الذى أصابهم جميعاً - هو ليه كل واحد عنده استعداد إنه يتشائم ويكتئب للدرجة دى - على الرغم ان ربنا مدينا نعم كتير قوى بس ليه؟؟....جوايا أسئلة كتير محتاجة لإجابات ياريت لو تقدروا تفيدونى.... وقبل مقولها .....انا بس عاوزة اوضح ان ده مش بوست متشائم او انا بنشره علشان اضايقكم ...انا عاوزاكم تشاركونى بأفكاركم ازاى الشخص يتحايل ويتعامل على الأسئلة دى علشان يعيش كويس ومرتاح ومبسوط......ولا هو الإنبساط والسعادة أصبحو عملة صعبة اليومين دول؟؟؟ الواحدة من دول تقابلنى تقولى الا هو انتى مالك مبسوطة كده ليه متكتئبى شوية وتشيلى الهم كده زينا - واللى تقولك ايوة شكلك متدلعة ومرتاحة علشان كده مبسوطة ....وارد عليهم بأن ربنا ادى للكل حاجات تدلعه وتهنيه بس احنا اللى غاويين فقر وغاويين دايما نقعد نبكى على اللى فات - ويا سلام لو عملت كذا وكذا كنت بقيت ايه........ده لو علمت الغيب لاخترتم الواقع .....ده ربنا كاتب كل حاجة بالمظبوط لكل شخص وكل واحد وظروفه ربنا بيديله عليها خير وثواب كبير ....ولإن شكرتم لأزيدنكم......ثم هو فين الحمد والشكر لربنا.....فين الاستغفار .....اللى يوسع الرزق ويجيب الخير ويمحو السيئات....ليه كل شخص ميعملشى وقفة مع نفسه كل يوم ويحاسب نفسه ويشوف لو عمل صح يحمد ربنا انه هداه للصواب ولو عمل أخطاء يستغفر ربنا علشان يتوب عليه ويمحو سيئاته
عارفة صدعت دماغكو كلكو بس بجد بجد فكرت كتير ومش قادرة اوصل لحلول لأسئلتى اللى تعبتنى وخلتنى اشارككم فيها يمكن نوصل سوا لبر أمان - على فكرة كمان الموضوع مش موضوع مجتمع وبلد وسياسة انا مش بتكلم على الحقوق اللى كل واحد متوقعها ومستنيها وموقف عليها حياته .....انا بتكلم على ان كل شخص بيطلب العدل والصدق والخير والحب والامانة والود والاحترام لازم وضرورى يبتدى بنفسه ويصلح من أخلاقه ....ليه كل البشر بقى جواها هذا الكم من الغضب والضيق والحنق وعدم الرضا .... تلاقيك بتتكلم مع شخص تلاقيه اتنرفز واتلكك وعاوز يتخانق ويضربك ... طيب مانتا ربنا مديلك عقل علشان تفكر بيه ولسان هتتحاسب على كل اللى بيطلع منه متستغلهم الاتنين علشان تتكلم بعقل وتوصل لحلول ....ليه الناس بقت بتفضل انها تستخدم القوة بدل عقلها....الزوج يضرب زوجته....والام تضرب ابنها....والبنت تضرب صاحبتها...والشاب يضرب صاحبه.......خلاص كلنا هنلغى عقلنا وعاوزين المجتمع يروح بينا على فين
أسئلتى كالآتى وحقيقى محتاجة آرائكم الجميلة مش مجرد تعليقاتكم
ليه كل ست بتفضل انها تضايق جوزها وتمسك عليه كل اخطائه وتعيشه فى نكد وقرف علشان هيه تعبانة ومرهقة - ده بدل متروحى تترمى فى حضنه وترميه جواه مشاكله وهمومك وتستخبى جواه وتقوليله انا بجد ضعيفة ومحتاجالك
ليه كل راجل بيفضل وبيحب يشيل الهم وخاصة بعد الجواز وكأنه شايل مسئولية البلد على أكتافه على الرغم ان ربنا مديله مميزات كتيير من زوجة واولاد وبيت وحب ومودة ممكن يستمتع بيهم ويراعيهم ويهذب أخلاقهم بدل مهو عمال يجرى وكأنه مربوط فى طاحونة لمجرد انه يجيب اوراق مالية لا تمس القلب بل انها وبفضلها تقسى القلب وتسبب الجفا والبعد ... ده انت ربنا مديلك نعمة كثير من الشباب اللى مش مرتبطين هموتو ويتجوزو ويتذوقو معنى الاستقرار بس اول ميتجوز الراجل من دول هووووووووب تلاقيه بيلعن اليوم اللى اخد فيه القرار وضحى بعذوبيته فيها
ليه الشباب كلهم فى الوقت الحالى بقت دماغهم فاضية مبقاش فيه شباب يغض البصر أو يقرا أو ينزل يتعلم حاجة جديدة ويطور من امكانياته ومهاراته بدل من قعدة القهاوى والبصبصة مع البنات وكل واحد يقولك مانا مش عارف اعمل ايه ليه كل واحد اختار انه يعيش بدون دماغ بدل ميستغلها صح فى انه يكون شخص صالح
ليه ناس كتير بقت عندهم قسوة فى قلوبهم من تجاه والديهم....منتهى الفتور والعجرفة فى التعامل ...ده برضاهم الواحد يترمى جوه الجنة.....ولا تقل لهما اف.....ولا تنهرهما....وقل لهما قولا كريما....مين اللى بيتقى ربنا فى والديه وبدل ميقول لا مش عاوز ولا وانتى مالك أو متدخليش فى حياتى يقول لو سمحتى ومن فضلك ويبوس ايديهم وراسهم ويهتم بيهم وبصحتهم ....دول داقو المر علشان الواحد يبقى شحط عليه القيمة كده
ليه الناس مبقاش عندها وعى دينى وكل شخص تبع ديانته انا مش هتكلم فى ديانات انا هقول ان ربنا رب الكل وفى كل ديانة مذكور بشكل مفصل الصواب والخطأ .....الحلال والحرام....ليه كل واحد بقى بعيد كده......وما خلقت الأنس والجن إلا ليعبدون.....يعنى ربنا خالقنا علشان نعبده وبس ......من خلال تعاملنا مع الناس ومن خلال اشغالنا ومن خلال تربيتنا لأطفالنا ومن خلال صلة الرحم والمحافظة على رعاية الجار علشان يكون فيه الود والحب والتراحم والمواساة والرحمة والخير والألفة
ليه الناس مش بتتقى ربنا حق تقاته علشان يفوزو بجنة عرضها السموات والارض ....ده الواحد عمال يجرى ويجرى ويجرى لكن علشان يروح على فين....مجتمعنا بقى بيستسهل كتير فى انه يكون تابع للشر او الشيطان على انه يختار الخير والحب
اللهم أبلغنا رمضان ... فيه الواحد بيحس ان الناس بيطلع منها الخير كل الخيراللى بيقدروا عليه ولا يكلف الله نفساً الا وسعها....بس مهى شهور السنة كلها بتاعت ربنا والايام والساعات فليه الخير ميبقاش فى كل وقت.....تلاقى كل واحد ماسك مصحف وبيقرا فى المترو والشارع وكأنه سباق لختم القرآن ....القرآن ختمته تكون بهدوء وبتأنى وبحب وبتمعن فى الآيات مش مجرد قراءة....ده مش ذنب الواحد شايله انه يختم القرآن كام مرة ....الواحد بيقرا لربنا...وتلاقى الواحد يقولك انا ختمت كذاوكذ ولا ييجى عشرة مرات ....طيب انت بتقرا علشان الناس تعرف وتفرح بيك ولا علشان ربنا يرضى عليك ويتقبله منك
تفتكرو ممكن من خلالنا نحن المدونون والاصدقاء والأحباء فى الله نتحد وندعو اكبر جمع من الناس على حب الخير وحب الحب والمودة والوقوف بصدد اى شر والنهى عن اى منكر يستطيعون تغييره من الآن وحتى يجمعنا الله فى يوم لا ظل الا ظله ... حقيقى أتمنى ...بحس ان جواكم طاقة هايلة تستطيع تغيير الكثير والكثير
تحياتى إليكم جميعا وأمنياتى بكل الخير والحب والسعادة والأمل
هبة

67 comments:

klmat said...

ازيك يادوبه
كل سنه وانتى طيبه
البوست جامد والاجوبه
صعبه وعايزه بوستات
بس يمكن افتقادنا للقدوه الحسنه
اغلب اللى متمتعين فى بلدنا
من رموز الفساد دول
بقوا المثل الاعلى
لو شاب خريج جديد وكفء
وعايز يشتغل ممكن من غير واسطه
طب لو بنت مؤدبه ومحترمه
ونفسها تتجوز بقى عمله صعبه
المناخ العام مش تمام
الحمد لله على كل شىء الصحه والستر
بس لما كل يوم تقراى ان واحد مات من التعذيب
لما تشوفى الناس عطاشانين
وناس حراميه فى البسين
كل ده بياثر على نفسيتنا
ربنا يقوينا ونغير ما بانفسنا علشان
يتغير حالنا
بوست قوى
تحياتى وسلامى

عصفور المدينة said...

ما هي دي وظيفتنا بس بالتدريج مش حنحاول نحل مشاكلنا كلها في كلمتين ولكن الأهداف العامة التي ذكرتيها لازم ما تغيبش عن عينينا دايما ونركز عليها ويكن لنا هدف في كل تدوينة أن نبني جزء من هذه المطلوبات

أما موضوع النكد فيه ناس بتتلذذ بالحزن وعيشة حالة الظلم والقهر

3abdo me7tas said...

ياااااااااه
كل ده جواكى وانتى شيلاه
كلامك كله صح ومفيش فيه اى اكتئاب ولا حاجه لا بالعكس
دا فيه حزن على الناس اللى بدأت تبعد عن ربها
يوم القيامة قرب يا أم يوسف
دلوقتى الابن بيضرب اخوه والاخ بيقتل اخوه والابن بيطرد امه
طبعا مش كل الناس انا بقول فيه بعضهم وكل يوم بنشوف فى الجرايد واللى واللى واللى
ربنا يرحمنا يا رب
يا رب اهدينا جميعا وارحمنا واكرمنا يا رب
طبعا فيه كلام كتير فى الموضوع ده كتير اوى كمان
ربنا يسهل ونقدر نقوله
جزاك الله كل خير وربنا يكرمك يا رب
وسلميلى على الواد يوسف

rack-yourminds said...

كلنا عندما هموم ومشاكل لكن بنضحك ولو الواحد فينا استسلم للاحزانه وهمومه مش هيلاقي نفسه


كل سؤال طرحتيه يحتاج بوست لوحده



لانها ست غاويه نكد وزي مقلتي ليه متروحش تترمي في حضن زوجها وتبث اليه همومها وحزنها

ليه الراجل بقي بيشيل الهموم بعد الزواج انا معاكي انه غلطان في كده بس بجد الظروف الايام دي وحشه

وبيقي خايف علي مستقبل ابنائه ولقمة عيشه لان الاسلاه ملهاش غيره

بس برده هو غلطان ولازم يكون فيه ثقه في ربنا والارزاق دي بيد الله بعد مناخد بالاسباب عشان كده لازم يسيبها علي الله ويحاول يسعد زوجته ويسعد اولاده ويبطل قلق

انا شايف ان الشباب كويس بس قوليلي شاب خلص تعليم ومش لاقي شغل ولا قادر يتزوج وبعد التعب اللي تعبه في الدراسه هتتوقعي منه ايه

لو الشباب ده اتوظف وعاش حياة كريمه هتشوفي شباب زي الورد


الاساءه الي الوالدين من الكبائر وفيه غضب كبير من الله علي اللي بيؤذي والديه

بس اتمني كمان يفهموا الابناء ويحترموهم ويبروهم كمان الايام دي بنطالع كتير من الاخبار مدي قسوة الاباء علي الابناء

اتمني ان الاباء يساعدو الابناء انهم يبروهم ويطيعوهم


للاسف فيه فراغ ديني واللي بنشوفه ده مش جوهر الدين تلاقي مئات من الناس في المساجد لكن للاسف قلوبهم خراب ومش عامره بحب الله وبطاعته

طبعا الصلاه عماد الدين بس انا بحكي علي ان الناس دي ان الصلاه لم تمس قلوبهم

ليه الناس مش بتتقي ربنا ده سؤال صعب بس أعتقد ظروف الحياه الوحشه جعل الناس تتكالب علي الدنيا وتنسي ربها واصبح تفكير الناس طول الوقت في الماده


يا رب اعنا علي طاعتك وبلغنا رمضان واغفر فيه لنا ذنوبنا

معلهش طولت شويه بس موضوعك هو اثار اكتر من شئ

تحياتي لكي

موضوعك جميل جدا

shahy said...

واللهي يا هبة مش عارفة اقولك اية
كل اللي قلتية للاسف مظبوط
بس انا رأيي ان التغيير لازم يجي من الانسان نفسة
يعني لو كل واحد راقب نفسة واتقى ربنا في شغلة وبيتة وبلدة كنا هانبقى احسن امة في العالم بجد

واخيرا
الرضا بما قسمة الله لكي نكون اسعد الناس

MaMaDo said...

هو الجز الاوانى كانت حاجه شغلانى برده
انه معظم البلوجات متجه نحو الحزن تحسى الناس الوقتى بنبر الحزن الى فيهم مش عارف ليه
هو الفكره مكن انهم فضلو يستسلمو لفكره الحزن
لحد ما بقت طبيعه بيتجه ليها عقلهم بحركه لا اراديه بعد كده
فتلاقى حيتهم كلها حزن رعم انهم عيشين حياه سعيده بس هما اتعودو على الحزن


تحياتى

smraa alnil said...

ايوة اه
ماهي ناقصاكي يا ست هبه
:)))

بصي يا سيتي
كل اللي اني قلتي عليه دة ملخصه شئ واحد
وهو ان الناس دي مش عندها صدق رجاء في ربنا

ومش عندها ايمان بفرجه قريب عشان كدة الناس بتشيل الهم
ياريت الكل يبقي واثق من رحمة ربنا اكتر من كدة
ساعتها بس هنام واحنا مطمئنين

ومرتاحين
ومتغطين كمان
:))

Anonymous said...

كل سنه وانتى طيبه يا احلى دوبا فى الدنيا كلها
طبعا انا مش هاقدر ارد على البوست واقول اسباب اكتئابى لأنى نادرا لما باكتئب والحمد لله
بس بجد جيتى على الجرح
افتكر السنه اللى فاتت فى رمضان ماحدش كان طايق حد والخناقات كانت ماليه الشوارع وكنت باسأل نفسي
ازاى الناس دول صايمين ؟
الملاحظ ان مابقاش فيه حد مستحمل حد مع انه لو ابتدى يومه بابتسامه كل شيء هايبقى اجمل
لكن احنا شعب نكدى من اللى لما يضحكوا شويه يحسوا ان فيه حاجه غلط
ويقولوا خير اللهم اجعله خير
ليا عتاب عندك
بقى تحطيلى كل الاعلانات دى وماتجيش مسرحيتى؟؟؟
بجد كان نفسي اشوفك قويييييييي
عموما ربنا يسهل واقدر اجيب نسخه منها وانزلها عندى
الف بوسه ليكى يا قمرايه

Rosa said...

بوست حلو قوي يا دوبا و في الصميم
يمكن الاجابه عن اسئلتك دي في اعتقادي هيا الافتقار الى التدين الحقيقي , الحقيقي الي من جوا , مش تدين الظاهر الي معظم الناس بقيت بتتبعه
اعتقد ان كله بيرجع لنقص الرضا يا هوبه
عشان السعاده في الرضا
والرضا في ان يسكن الله قلب المرء
لكن دوري في قلوب كل الناس الي ادتي امثال عليها و شوفي هل ربنا ساكن القلوب دب بجد ولا لأ؟؟
ربنا يهدينا جميعا و يرزقنا قناعة القلب و اللسان
مرسي على البوست الجميل داا

قضية عم أحمد Ahmed Case said...

عظمة ع العظمة يا ست

كلام صح اوي واخيرا لاقيت حد لابس نظارة فاتحة

اخيرا حد بيدور على السعادة فين ويجرب وراها .

انت طبعا دخلتي اخر بوست عندي كنت بتكلم عن نفس المعني .

بس انت عارفه لو كل واحد فينا قرر انه يكون صانع للسعادة للى حواليه والله هتفرق كتير لو كل واحد كان حريص انه يخلق السعادة وقت الحزن هتفرق كتير

للاسف اغلبنا بيعمل العكس زي ما نات تكوني مبسوطة والناس تقولى انتي ايه اللى بسطك كده
او حتى العادة الفرعونيه المصرية ان لما حد يضحك يقول خير اللهم اجعلة خير وكأن الحزن ملازم للضحك .

تحياتي للبوست الرائع

Ehab said...

يعني انا اجي الاقيني هاكتب الكومنت رقم 11 ماشي هاكتب برده مش مشكله
الأول هي الست مش بتتصيد الأخطاء ولا حاجه هي بس خايفه قوي لأن كلنا دلوقتي مش حاسين بالأمان كل واحده خايفه حتى من الأنسان اللي المفروض يكون اقرب شخص ليها بس للأسف اللي بيحصل كل يوم في دنيتنا خلى الناس تخاف من بعض والست خايفه تغفل عن اخطائه لحسن تقوم تلاقيه بايعها

التاني الراجل لما بيتجوز بيكون حاسس بمسؤليه كبيره قوي وخوف شديد من اللي ممكن يحصل بعد كده فبيحاول يشتغل زي التور في الساقيه عشان يحس انه بيعمل اللي عليه ومش مقصر مع اهله واسرته الجديده لكن طبعا للأسف بينسى تماما انه بكده بيخسر اجمل سنين عمره واحلى فتره في الزواج لكن صدقيني بيكون غصب عنهم انا حضرت فرح واحد صاحبي وكان مكشر جدا ولما اتكلمنا معاه مالك كده ده انت كنت هاتمومت عشان تتجوزها قال انا مش عارف استمتع بالفرحه من خوفي من المسؤليه ومن كتر اللي سمعته من الناس عن المشاكل اللي ممكن تحصل بسبب الفلوس والمسؤليات لكن الحل ان هي تساعده يتخطى خوفه وتطمنه وتفكره ان الرزق بإيد ربنا لوحده وانها مش هاتحس انه مقصر ابدا معاها وتحاول تخرجه من المود ده

التالت يعني حضرتك عايزاه يلاقي الدنيا مقفوله في وشه ومفيش شغل غير بواسطه والغلاء والدنيا زفت وقدامه البنات عماله تحلو وعماله تستثيره وتثير كل غرائزه من التلفزيون والدش والنت واللي ماشيين في الشارع انيل وكأنهم معندهمش بابا وماما يقولولهم ايه اللي انتو بتعملوه ده وبعدين يسيب كل ده ويروح يطور نفسه هو اصلا عامل زي اللي واخد قلم على وشه منسيه اهله فطبعا عينه مش في وسط راسه عشان يدور على مصلحته وده مش عارفله حل غير ان يحصله حاجه تجبره يفوق ويدور على هدفه يا اما بلوه كبيره يا اما حب كبير والأتنين ميختلفوش كتير

الرابع ناس كتير بيقسوا على اهلهم لأن اهلهم اصلا نسيوا في زحمة الحياه انهم يربوا ابنائهم صح ويزرعوا الرحمه والدين والخير في قلوبهم هو انتي بتحسبي اللي بيربي ابنه على انه يضرب زمايله في المدرسه ويقوله شاطر يا حماده اضربهم كلهم واضرب زميلك المريض والضعيف واخطف حقوق الناس لما بيكبر بيعطف على ابوه ويقول الله يكرمه بابا هو اللي علمني اكون انسان زباله

الخامس مفيش حد بيهتم بدينه دلوقتي لأن الأنسان بطبيعته بيكره التكليف فبيبعد عن كل ما هو ملزم له بواجبات واطاعات ولأنه اصلا بيكبر يلاقي اهله مكبرين دماغهم شويه عن الدين فهو بيكبرها خالص يعني مثلا لو ابويا بيصلي الخمس صلوات على بعض لما يرجع من الشغل اكيد انا لما اسيب صلاه خلال اليوم مش هاصليها اصلا

السادس نفس ما سبق

السابع الناس بتحب التقليد قوي يعني ماشيين بسياسة القطيع اول ما يجي رمضان كلنا نقلد بعض ونغيظ بعض باللي عملناه وطبعا النتيجه اننا بنتنافس في عدد مرات القراءه مش في التدبر والفهم وبالمثل بنتنافس في كمية الشراء والأكلات والعزومات وما ادراكي بعزومات رمضان انا جعت على السيره

الأخير
اتمنى فعلا نقدر نغير حاجه ونفيد الناس بكلامنا لكن احنا نفسنا برده بنغلط ونعك كتير قوي واتمنى اننا نهدي نفسنا قبل ما ندعوا غيرنا عشان مااكونش جسر يعبر عليه الناس للجنه ويلقى به للنار ربنا يحفظنا جميعا

عموما انا طولت عليكي احسن برده تستاهلي بس فعلا بوست جامد
سلاااااااااااااااااام

NeRmeeN said...

ربنا يكرمك يا دوبة ...موضوع الرضا ده بجد بقينا محتاجينوا اوى...وفعلا فى حالة اكتئاب ماشية اليومين دول

ده مايمعنش اننا بنقول الحمد لله..بس الاكتئاب ده بيبقى حاجة غصب عن الواحد...بس الواحد لما بيقعد كده يفكر مع نفسه فى نعم ربنا عليه و يسنى شوية همومه ..وبيقول ايه ده ما ربنا مغرقنا بنعمه اهو...مفيش رضا ابدا!! ربنا يسمحنا بقى ..و يدينا الرضا ...لاننا سواء رضينا او لا لا ....قضاء ربنا ماشى ..فنرضى احسن و ناخد ثواب
واللى يبص لبلاوى غيره تهون عليه اوى اوى بلوته
انا عندى اقتراح عشان نعلم نفسنا الرضا او على الاقل نتكسف على دمنا لما نلاقى الشيطان سودهالنا فى وشنا
كل واحد يمسك ورقة و قلم و يقسم الورقة الورقة نصين بالقلم و يكتب فى ناحية مشاكله و همومه و الناحية التانية يكتب نعم و فضل ربنا عليه..وهيلاقى الرضا على طوووول

على فكرة دى مش اول زيارة ليا هنا..بس اول تعليق وان شاء الله مش هيكون الاخير

تحياتى يا جميلة

Shreif fahmy said...

من غير تشاؤم ولا حاجة مش عارف إذا كنتي حضرتك فكراني ولا ءلاء
على العموم منتظر تعقيبك على البوست الجديد
http://sfahmy78.blogspot.com/

تخاريف خاصه! said...

البوست اكتر من رائع يا دوبا..والاسئله جامده جدا...وفعلا من واقع الحياه جدا...
بس صدقينى كل الاسئله اجابتها واحده..عدم الرضا و الانانيه...

فى كل شئ بقى...

فى الزوج اللى مش طايق مراته وحاسس انها ولا حاجه..فى الست اللى حاسه ان جوزاها مايستهالهاش..
مع انهم هما اللى مختارين بعض منن الاول..!!
فى الاهل اللى مش راضيين عن عيالهم وحاسين انهم مش كويسين..مع ان ده نتاج تربيبتهم هما..مش تربيه حد تانى..!!
فى الاولاد اللى حاسين ان اهلهم خهنقوهم وانهم عايزين يعيشوا حياتهم بقبى بمزاحهم..مع ان اهلهم دول اصل هما السبب فى وجودهم فى الحياه..اللى عايزين يعيشوها دى..!!
فى الموظف اللى بيروح ينام فى شغله ويقرف فى خلق الله..ويجي يتبتر ع المرتب فى الاخر..مع انه ماشتغلش بربعه..!!
دورى فى كل الادمغه الفاضيه ..هتلاقى عدم الرضا والانانيه.. هما اللى مالينها...

وبجد تحياتى ع البوست الرائع ده...!!
هبقى ارجع اقراها تانى ..ويمكن تلاقى كومنت تانى لو حسيت ان ممكن يبقى فى اجابات تانيه...
:)
دمت بالخير

طهقان said...

الله
دا انت تقصديني انا بقا يا دوبا


الراجل اللي متجوز ومش عاجبه


لا....

كله كوم وتقولي مش عاجبة

انا
مش عاجبني
بس
مش بمزاجي
:)

المهم

الحمد لله على سلامتك
.

انتظار مؤقت said...

دوبه يا اجمل و احلى هبه في الدنيا ازيك و السره كلها يا رب تكونو بخير انا لسه راجع من الاجازه الطويله الجميله و حبيت اعدي اشكرك على سؤالك عني و مرورك عندي مصر كانت جميله و تحفه و اتمنيت لو افضل فيها مااخرجش منها بس اكل العيش حنعمل ايه
تحياتي ليكي يا قمر و لينا لقاء

الراقـــص مع الذئـــــاب said...

السلام عليكم ورحمة الله وبركاته

شوفي يا ام يوسف
هي الدنيا كدا
لازم هتلاقي فيها الراضي وهتلاقي الساخط
هتلاقي كل الاصناف
بس يمكن عشان الناس مش بتقول الحمد لله بيقين وصدق بيحصل كدا
احنا بنقول الحمد لله واحنا جوانا مش راضيين علي الللي احنا فيه
مع اننا في نعم كتير اوي غيرنا مش لاقيها
الحمد لله علي نعمة الاسلام وكفي بها نعمة

الموضوع جميل يا ام يوسف والحوار شيق اوي

جزاكي الله خيرا

Anonymous said...

ازيك الاول احب اشكرك شكر خاص جدا جدا
دا احلي بوست قراته في حياتي
اللي احنا فيه دا ثمار تربيتنا ومجتمعنا المتشائم الجاهل بظروفه ودينه
انا علي فكره مثال واضح للبتكتبي عنه دا
بس بحاول والله
انا كتبت بوست ياريت تشوفيه واسمع تعليكك
اخوكي احمد

Ehab said...

هو حضرتك فين يا استاذه ما علينا المهم دلوقتي انا دبستك في كتابة جزء من القصه اللي بنكتبها وبدأت عند كده سبونسر مرورا بقلم رصاص وجومه وبعديهم سفاح كرموز وبعدين انا الدور عليكي تقرأي الأجزاء التلاته وبعدين تكتبي الجزء الرابع متتأخريش
سلاااااااااااااااااااام

safa7_karmooz said...

يا حراااااااااام

جزء مدبس عك فى عك
الله يكون فى عونك وانتى بتكتبى باقى القصة

Doba said...

klmat

وانتى طيبة وبخير وسعادة دايما يارب
معك كل الحق فى افتقاد القدوة الحسنة فى المجتمع وطبعا المناخ العام مش تمام زى مبتقولى بس لازم السعى مهما حصل لان دايما هيكون فى شر مش هنقعد نحط ايدينا على خدنا ونستنى لما الشر ولفساد ينتهو من المجتمع - لازم كل شخص يجاهد مع نفسه لاستخراج افضل ما عنده

تحياتى

Doba said...

عصفور المدينة

هيه فعلا وظيفتنا اننا نساعد اللى حوالينا على قد منقدر بس المهم نبنى مش نحطم - نتعلم مش نكسر ونأذى - وبالنسبة للنكد - فليتلذذوا به كم يشاؤوا دون المساس بناوالتجريح فى مشاعرنا

تحياتى واشكرك لمرورك الكريم

Doba said...

عبده محتاس اللى محتاس ومغلبنا معاه دايما - منورنى يا بيه يا مختفى

هو فعلا الحزن فى ان الناس بتبعد عن ربنا جدا - اللهم عافينا يارب

طمننا عليك يا استاذ لو سمحت وبلاش الغيبة دى كلها

تحياتى

Doba said...

wahed

انا معاك فى ان الشباب زى الورد فعلا لو وجدو كل الفرص اللى تنجحهم - انا بتكلم على اللى دايما حاطط ايديه على خده وقاعد مستنى الفرج ولما تجيله فرصة حتى لو مش على قده يقوول لالالا انا منفعشى فده - انا بقول ارضى باللى ربنا يقسمهولك مش يمكن يكون فيه كل الخير ليك

وطبعا ممكن الاولاد يكونو غير باريين بآبائهم لان النشأة نفسها سيئة - بس انا بتكلم عن اللى ربى وتعب وشقى علشان يطلع شخص كويس واول مربنا يفرجها عليه ينسا اللى تعبو معاه - ده ربنا قال انه لازم نطيعهم فى كل حاجة ما عدا الشرك بالله - يعنى طاعتهم واجبة فى كل شىء - ربنا يقدرنا ونربى صح ونطلع اولادنا قلوبهم علينا ومتبقاش جافة وجاحدة

ومع احترامى الشديد ليك - ظروف الحياة لا تجعل الانسان لا يتقى الله فى كل تصرفاته - ده لما تتقى ربنا صح هو اللى بيصححلك كل مادياتك وحياتك

يارب ابلغنا رمضان واغفرلنا جميعا
تحياتى

Doba said...

shahy

معاكى طبعا كل الحق فى ان كل شخص يجب ان يبدأ التغيير بنفسه اولا وان كل واحد يراقب نفسه وتصرفاته ويتقى ربنا صح - يارب اجعلنا من الراضيين

تحياتى يا قمورتى يا حلوة

Doba said...

mamado

الانسياق فى الحزن والانغماس فيه لا تنبعث منه الا الكآبة والحزن والفراغ العاطفى والدينى

ده ربنا جميل ويحب كل ماهو جميل وحبانا بكل الاشياء الجميلة اللى تسعدنا وتبهرنا دائما

بس المفروض ان كل شخص يوجه الحب اللى جواه لكل الاشخاص اللى حواليه - يبتدى بنفسه على الاقل

تحياتى

Doba said...

samraa alnil

ايه بس يا سمرا زعلانة منى ليه - مقدرشى على زعلك ابدا ابدا

حلوة قوى كلمتك صدق الرجاء فى ربنا - وكمان الثقة فى رحمة الله ومعهم الرضا - الانسان ساعتها ومع كل ده هيحتاج ايه تانى - ده هيكون فى منتهى منتهى السعادة

تحياتى واتغطى كويس

Doba said...

وينكى

حبيبتى الامورة الصغنونة - والله متزعليش مقدرتش اجى بس كان عندى مناسبة عائلية - مقدرش على زعلك ووالله حقيقى كان نفسى اجى جدا جدا


يارب دايما سعيدة ومتفائلة كعادتى بيكى ودايما بتبثى الامل والحياة والسعادة للكل يا صغنونة من غير فذلكة

وفعلا لو كل شخص ابتدى يومه بابتسامه اكيد يومه هيبقى اجمل

تجيى نعمل المقولة دى على يافطاط ونعلقها فى الشوارع - تفتكرى ممكن تفرق؟؟ مش عارفة

تحياتى يا بنوتى يا حلوة

Doba said...

rosa

اهلا اهلا بالمتدلعة هانم - منورانى طبعا
الدين والرضاوالقناعة - اصبحت عملات نادرة فى المجتمع - يارب تبقى سلعة متواجدة دايما يارب

تحياتى واشكرك

Doba said...

احمد رفعت

عظمة ايه بس يا عم - ده احنا نقطة فى بحر جنبك - ده انت بتخلينى فرحانة قوى باللى بتكتبه - انا ممكن اشاركك فى اى حاجة ممكن نقدر بيها نساعد ونسعد اللى حوالينا - لو فيه اى حاجة اقدر اعملها ابعتلى بس اى عيل صغير يندهلى

انا معاك وزيك - اخدت قرار انى اعيش سعيدة رغم انف الاخرين جميعا - وادينى بتحدى الجميع وربنا يقدرنى

يلا دعوة منى ومنك لكل المدونيين نصنع بايدينا السعادة ونبثها لكل من حولنا

تحياتى واشكرك لمرورك الكريم

Doba said...

الشنكوتى الكبير

طبعا انت مفصص كلامى كلمة كلمة ورديت عليا بنشرة اخبار مفصلة بدون الموجز بس طبعا البيت بيتك وتقدر تقول وتبدع براحتك لثقتى فى آرائك الغالية

تنور يا باشا الكومنتات ان كنت الاول او المائة بس المهم البوست يكون متضمن تعليقك - وبصراحة انت فصصت البوست بتعليق مميز للغاية

تحياتى يا اخى العزيز

Doba said...

nermeen

حلوة قوى موضوع ان كل واحد يمسك بورقة وقلم ويكتب كل المشاكل والهموم والناحية التانية فضل ربنا - حقيقى فكرة جميلة توصل الانسان للرضا - تيجى بجد بجد نعملها؟؟ قوليلى رايك

ياريت دايما تكونى منورانى بتعليقاتك
هستناكى دايما

تحياتى

Doba said...

shereif fahmy

فاكراك طبعا وهاجى اقرا البوست الجديد حالا بالا - تحياتى ونورتنى

Doba said...

تخاريف خاصة

بصراحة تعليقك احلى من انى ارد عليه رديتى بتفصيل جميل وبخلاصة عدم رضا وانانية - ربنا يجعلنا من الراضيين دايما ويبعد عننا الانانية دايما يارب

نورتينى وتحياتى

Doba said...

طهقان

ايوة هو البوست كان عليك - الزوج اللى مش عاجبه ايوة هو انت - ده انت معاك حتة سكرة - الله يسلمك ياافندم وشكرا على سؤالك وتنويرك مدونتى المتواضعة - سلامى لبستوكة لو سمحت

تحياتى

Doba said...

انتظار مؤقت

الحمد لله على سلامتك يا استاذ
الغيبة طولت قوى - بس انا مش فاهمة هو انت قاعد بعيد وجيت مصر لفترة ولا ايه النظام

عموما منتظرن الجديد يا استاذ بسرعة عاوزين نشوف الهمة

تحياتى ومنورنى

Doba said...

الراقص مع الذئاب

على فكرة رغما عن انف الكثيرين - انا عاجبنى قوى الاسم اللى انت مختاره لنفسك - حقيقى جميل

ومعك كل الحق - الحمد لله على نعمة الاسلام وكفى بها نعمة

منورنى وحمد الله عالسلامة - الا ازى الصول مصطفى - حبة نكد بقى - وش بغمزة - تحياتى يا اخى العزيز

Doba said...

هانى جابر

اشكرك لمرورك الكريم - بس اسمحلى انا مبحبش افضح حد او اشارك فى فضيحة حد حتى لو ظالم - مبحبش ادعى على حد

اصل ربك كبيييييييير قوى وفعلا يمهل ولا يهمل - تحياتى

Doba said...

spyfun

لا شكر على واجب يا اساذ احمد افندى وعلى فكرة انا سيبتلك تعليقى على البوست الجديد وياريت نقدر نعديك بشوية سعادة على حب على أمل وشوية زغزغة عالماشى يمكن تضحك

مش هتاخد منها حاجة غير بالضحكة والكلمة الحلوة - وتأكد ان اليوم اللى بيعدى من عمرك وانت مش مبسوط خلاص فات ومشى ومش هتقدر ترجعه تانى

فلتعش حياتك ى سعادة وهناء بدلا من أن تقضيها فى تعاسة وشقاء

تحياتى وطمنى عليك

Doba said...

الشنكوتى الكبير

شكرا يا عم عالهدية المقبولة جدا- بس احب انوه انى فعلا وحقيقى احتمال استعين بصديق - لانى مش ماهرة فى الكتابة بس ناوية اجيبلكم حد يعملكو قصة اوعى وشك منها

ماشى يا شنكت اما رديتهالك بقنبلة تنفجر فى وشك بس تكون ملفوفة فى ورق سلوفتش - ماشى ماشى

انا وانت والميدان واسع
سلام يا صاحبى

Doba said...

safah_karmooz

ماشى ماشى - انت السبب
مش انت اللى باصيت ليه الكورة وخليته يعمل كده فيا - روح الله يسامحك

اهىء اهىء

كده خليتنى ابل المدونة بتاعتى - داعية عليكم كلمكم يا مدونيين

روحو الهى تبقو كلكو مبسوطين وفرحانيين
تحياتى

Doba said...

على فكرة

انا بحبكو كلكو والله - بجد بجد انا بقيت بتفرج عليا كل لما بقعد عالمدونة وببقى سعيدة جدا وانا بقرا بوستاتكو الجديدة واقرا التعلقيات

انتو مليتو حياتى هنا وحب وسعادة وامل فى بكرة انه يكون احلى واسعد ومليان شقاوة

تحياتى للكل وبحبكو كلكو فى الله
هبة

keda-sponsor said...

أنا ليا الشرف النهارده أني أكتب تعليق عند حضرتك .... أنا قلت لازم أجي أتعرف عليكي

أول حاجه .... فعلا موضوع الإكتئاب ده بقى منتشر جدا و ال أسئله إللي أنت سألاها كتير قوي و عاوزه مدونه لوحدها
يعني ممكن تبعتيها زي التاج كده
هههههه

أنا كنت بدأت حمله مع كوين أيراسير على أساس أن أحنا لسه مدونين صغيرين قوي بعنوان سعيييييييد
بس للأسف محدش أهتم بيها قوي

عموما .... أشكرك على أهتمامك بالقصه إللي بدأتها و بإذن الله نشوفها عندك أحسن و أحسن

شكرا

سلااااام

S H A H said...

فينك يا دوبا ليكي وحشة و الله

Cute Persian said...

فهمت انا بقى كدة خلاص, و جاري تجهيز المؤثرات الصوتية و الكومبارس و كل شوية مولوتوف


سلام مؤقت

S H A H said...

Doba Hanim...
نأسف للخلل الفني

البلوج ده مش بتاعي, ده لزميلتي هنا في الشغل, و انا اللي بعملهولها, و لسة تحت الانشاء’ عشان كدة دخل عندك بالخطا

نأسف للخلل الفني

انا بصيت عندك استغربت بقول ايه اللي هيا كاتباه ده!؟
:)

سلام مؤقت

قضية عم أحمد Ahmed Case said...

هي الناس بطلت تكتب ولى ايه

فين الجديد

الله بقه

3abdo me7tas said...

العنكبوت العنكوب وما أدراك

العنكبوت مخلوق غريب وحنين وجميل وبيحسسك انك مش موجود فى البيت من اساسه
انتى فين يا ست هبه
طمنينا عليكي

Unknown said...

حالة الاكتئاب بقت عادي من كتر الاكتئاب زهقنة منة فا اكتئبنا
الاسئلة دي كل الناس بتسئلها
انا عن نفسي كتير بسئلها
بس ربنا قال لو قوم كانو كويسين هيغيرهم ويجيب قوم تغلط علشان يعفو عنهم
اكيد طبيعت الحياة ان يبقي فية ناس صح في كل حاجة وناس غلط وناس في النص بتلطش
زينا كدا
ولا عارفين احنا فين
ولا عارفين نبقي اية
ولازم نفتكر اننا يوم الحساب لازم الميزان يبقي اتقل في كفة من الاتنين
يمكن دي رسالة
وعندنا حاجة كويسة عيزانا نبقي احسن
ومش لازم نقلد الناس ونقول ما كل الناس بتعمل كدا جت عليا
لية منبقاش احنا العكس وهما يقلدونا
المشكلة اننا في بلد من كتر مشاكلها نسيت عقلها
ربنا يرحمنا برحمتة
والحمدلله علي نعمة
اهمها نعمة الاسلام
ونهمة الهواء
دايما بحمد ربنا ان الهواء مش بفلوس كان زمان الناس كلها ماتت
يلا مهما الانسان اتكلم تحسي انة اناء مليان بركان واتفضي وهيتملي تاني
سلام

Mirage said...

هبة

انا مقدرش على زعلك طبعا

انا باجى دايما عندك بس لما بقيت آخر موضوع ده عن الاكتئاب مكملتش قراية بصراحة لأنى مش ناقص

:)


ومكانك محفوظ طبعا فى العزومة

beroo said...

والله ياهبه الملاحظ ان كل واحد فيه اللي مكفيه بس للاسف الناس عشان فيها اللي مكفيها مابقتش لاقيه وقت تعرف ظروف غيرها بس بوست جميل وواقعي ومعبر وربنا يقدرنا نحن معشر المدونون علي الخير دايما
دي اول زياره لمدونتك وان شاء الله مش هتكون اخر زياره دا بعد ازنك
وياريت تشرفيني بالزياره

L M A R said...

مساء الخير

شخصيا اعتقد انو كمان القنوات التلفزيونية وبالاخص التوك شو إلا بتعكس حالة المجتمع فيها كتير من النكد والهم وقليل جدا من الفرح او الحياة
في النهاية المدونات او البرامج او او كلها مجرد مراية لحال الدنيا إلا كل واحد او كل مجتمع بيعشها ..فمش منطقي ابدا انو نكون غير كدا ..


تحياتى

.العَبدِالرَحَمن

mohand said...

السلام عليكم

تحياتي من الاول علي البوست ده
اسئلتك رائعه بس المشكله اجابتها مش هقدر اجاوبها لاني لسه مش متجوز
لما اتجوز اوعدك هجاوب

بس عموما الاجابة الشامله
هي عدم الرضا
لو رضينا هنعيش مبسوطين
لو مرضيناش ربنا بيزيد علينا البلاء

عجبتني حاجه بس مش عارف تقصديها ولا لا

الشباب بدل ما بيبصبصوا مع البنات

انتي جبتي مع مش علي

ودي معناها انه فيه اشتراك
يعني مش الشباب بس
ودايما الناس بتقع في الخطأ ده
يعني الاتنين مدانين

وانا ديما بقول ان المتهم والمجني عليه مشتركين في الجريمة كلا منهم بشق معين

شكلي طولت

وخرجت عن الموضوع

اللهم بلغنا رمضان
وكل عام وانتم بخير

أبوسويلم said...

طب ليه الكلام اللى يزعل ده بس ما احنا كده حلوين
والله انا شايف ان الناس بتلجأ للتشاؤم لانه بكده بيعطى لنفسه مبرر للتكاسل والتراخى ولكن ده ما يمنعش ان الامور المبشرة والمفرحة اصبحت اقل من الاول شوية
اما الاسئلة
معظم الستات بيحبوا النكد وفى دماغهم ان الالحاح والنكد هو اللى هيحقق لهم مطالبه
اما الراجل اللى بيفترى على زوجته فده يبقى عديم الرجولة لان بالرغم من عيوب الستات الا انهم احلى حاجة فى حياتنا احنا الرجالة ولازم نداديهم علشان الامور تمشى
ومشكلة الشباب الكبيرة انه فعلا مش عارف هو عاوز ايه او ايه امكانياته وده خطأ اساس فى التربية
منالاخر انت كلامك كله صح حقيقى
وربنا يبلغنا رمضان حميعا ويكون فاتحة خير على الامة الاسلامية كلها
ويا ريت تشرفينى بزيارتك الريمة فى مدونتى المتواضعة
السلام

Doba said...

keda-sponser

انا اللى اتشرفت يا استاذ بوجدك وتعليقك عندى - ممكن فعلا اعمل الاسئلة تاج - بس ده هيبقى تاج كئيب برده ومحدش هيعبرنى

الفصل الجديد من القصة نازل اهو يلا تعالى هستناك تقولى رأيك

اشكرك وتحياتى

Doba said...

s h a h

والله انتو اللى بتوحشونى - مبروك مدونة صديقتك اللى تحت الانشاء قولها تدخلها برجلها اليمين- بس ايه يا عم الحركات اللى انت عاملهالها فى البلوج دى - انا هغير ده -- مليش دعوة انا عاوزة من ده يا حزمبل

سلام يا صاحبى

Doba said...

أحمد رفعت

نازلين اهو يا باشا بالجديد عاوزين آرائك الجليلة وشكرا على سؤالك الكرمي

تحياتى

Doba said...

aabdo mehtas

ربنا يخلى العنكبوت اللى ابتدى ييجى عندنا عدوى وهروبا من عندك - انت اللى يارب تكون ظروفك اتحسنت وبقيت بخير

انا اهو ونازلة بالفصل الجديد تعالوووووو زورونا بس متجيش بايديك فاضية - منفضة او زعافة هتفى بالغرض

سلاموز وتحياتى

Doba said...

my hopes

معاك حق فى اننا فى بلد من كتر مشاكلها نسيت عقلها حلوة قوى الكلمتين دول - والحمد لله على نعمة الاسلام - وبجد سبحان الله على نعمة الهواء اللى من غير فلوس - هل ممكن يعبوه فى ازايز هو كمان

اشكرك حقيقى على المرور الكريم ويارب متبقاش اخر مرة

تحياتى

Doba said...

mirage

ماشى ماشى انا لا زعلانة ولا حاجة بس ده كان عتاب أخوة - ازاى ملقيش حتى ازيك واجرى على طول متكتبشى

سلامتك من الاكتئاب - وجاية جاية العزومة طبعا بس هتبقى فى ابو شقرة مليش دعوة - وهجيبلك يوسف يلعبلكو ويوقعلكو الحاجة من عالطربيزة

سلاموز وتحياتى

Doba said...

beroo

يارب يقدرنا نحن المدونون على نشر وبعث روح المحبة والايمان والامل للى نقدر عليهم

تحياتى وتشرفينى دايما بزيارتك
بس تجيبى معاكى شيكولاتة علشان يوسف ميفضحناش

سلامى

Doba said...

A L A B D E L R H M A N

تصدق والله انا اوقات من الاكتئاب اللى بيجيلى من التليفزيون واللى بيتقال فيه والجرايد باخد فترة هدنة ومش بفتح ولا حاجة فيهم - بروح للكمبيوتر واشغل حلقة من فريندز واقعد اتفرج عليه - اصلى بحبهم قوى بقوم مريحة نفوخى

اشكرك لمرورك الكريم يا افندم
تحياتى

Doba said...

mohand

اهلا وسهلا بمهند باشا وعيارين يتضربو لسيادته للزيارة العزيزة

يارب اشوفك كده يا مهند متجوز وراضى عن حياتك ومراتك وبيتك

يارب كلنا نكون راضيين ويبعد عننا البلاء

طبعا طبعا الشباب مع البنات بيبصبصو سوا سوا - انا برده لما قصدت ان الشباب يشتغل كنت بقصد الاتنين - البنات بقت حالها ميسرش ابدا فى الوقت الحالى - ده هما اللى بيعاكسو الولاد يا عم - استخبى بقى انت اليومين دول ليقفشووووووك

البيت بيتك تطول وتقول كل اللى فى نفسك - ويارب يبلغنا رمضان ونقدر نبقى احسن واحسن

سلام وتحياتى

Doba said...

أبو سويلم

معاك حق ان فعلا كل واحد بييأس ويكتئب علشان يدى لنفسه المبرر للتراخى والكسل - وفعلا المحبطات فى المجتمع بقت اكتر بكتير من المفرحات فيه - لكن برده اسعى يا عبد

معرفش ان كان معاك حق ولا لا فى ان الستات بتحب النكد بس يمكن معاك حق برده - كتير من صديقاتى المتزوجات بيحبو وبيعشقو يعيشو فى النكد والقرف على طول - وطبعا طبعا الراجل لازم لازم يتعلم ازاى يدادى مراته حقيقى الست هشه قوى ومش محتاجة اكتر من الاحتواء الصحيح

اللهم بلغنا رمضان جميعا واشكرك لتشريفك عندى واجرى حالا ازروك

سلامى وتحياتى
هبة

الطائر الحزين said...

ونبلوكم بالخير و الشر فتنة

المشكلة فى الصبر على الشر وحمد الخير

بارك الله فيك
تدوينة هايلة

وعذرا على تأخيرى

الطائر الحزين said...

كل عام انت الى الله اقرب وعلى طاعته ادوم

دعواتك

L.G. said...

المدونين أغلبهم حزانى لأن حال البلد يحزن أعتقد أن التعليقات كلها صح وبرضه كلامك صح بس مش كل الناس درجة تدينها واحدة ولا قدرتها على الإحتمال واحدة عشان كده فيه بيقع مبيقدرش يكمل وفيه بيكتئب
مرة مذيعة سألت عادل صادق الله يرحمه الدكتور النفسي الشهير هل المجتمعات تكتئب قال لها نعم لما الانسان يبذل جهد ولا يجد ثمرة كفاحه ويلاقي واحد بالواسطة ياخد مكانه طبعا يكتئب
عن نفسي بفرح لما ألاقي حد مبسوط أو متفائل أو لسه عنده حماسة يعيش لأنه ممكن ياخد بإيد ناس مكسورة ولما بشوف حد مكتئب بعذره لأن بصراحة الدنيا بقت صعبة والمتمسك بدينه كالقابض على جمر من النار
التفاؤل والايمان والدعاء رزق