Wednesday, October 17, 2007

سؤال لكل رجل

انا عندى مجموعة من الموضوعات محتاجة مناقشة فى الطبيعة الجدلية بين الرجل والمرأة وسأبدأ بعد إذن الجميع بالرجل وطبعا تعليقات المرأة متاحة فى وضع وجهة نظرها فى طبيعة تفكير الرجل ولكننى لدى بضع تساؤلات وأرغب فى التحاور بشكل ودى مع الجميع عنهم
لكل منا ديانته
ولكل منا آرائه ومعتقداته
ولكل منا طبيعه تربية
ولكل منا ظروف معيشة واحتياجات
ولكن
ما أريد السؤال عنه حقا هو
من خلال كل ديانة وسأتحدث من خلال ديانتى الاسلامية وأسأل عن تشبه الرجال بالرسول فى الطبائع، فهو القدوة التى ينبغى على الكل أن يتبعه وسأسأل عن أشياء بسيطة
أين غض البصر
أين صلاة الجماعة فى المسجد
أين خدمة أهلك بالمنزل ومساعدتهم
لم استخدام الألفاظ النابية والشتائم وخاصة وسط الزوجة والأبناء
أين الحث على حفظ القرآن والصلاة جماعة بين الاخ واخته او الاب واولاده
لم يذهب الرجل الى أن يستخدم قوته مع زوجته بالضرب او مع اخته او ابنته ألم يخلق له الله عقلاً ليستفيد منه ليخرج بأحسن النتائج، لم يستعيض عنه بما لدى الحيوانات من طبيعة همجية نوعا ما بدلا من استخدام العقل
===
أختتم حديثى بسؤال واحد
===
أين القدوة
القدوة التى من خلالها نستطيع تربية أبنائنا بشكل صحيح ومنه الى مجتمع صحى ومنه الى مصر الغالية بمجتمع متحضر راقى يتعاون فيه افراده مع بعضهم البعض بالمحبة والود والرفق واللين
القدوة التى تساهم تنظيم المجتمع وحثه على بناء طموحه وتحقيقه من خلال فكر واعى ومنظم
أين الضمير

86 comments:

على باب الله said...

أنا مبيت قدام المدونة من أول إمبارح مخصوص علشان ألحق مكان في الأول

صحيح .. لكل مجتهد نصيب

---

و بخصوص البوست بتاع حضرتك

الحالة الإقتصادية المتدهورة بتخلي الإنسان سريع الإشتعال

و بيسقط ضيقه و مشاكله الشخصية علي الآخرين و بالتحديد النساء

بتخليه يميل للعنف و التطرف في كل شيء حتي في طريقه فهمه للدين

---

أما بالنسبة لسؤال حضرتك ( هو راح فين الضمير ) فأنا شخصياً ما شفتوش

لكن إحنا ها ندور عليه يمكن يكون إتنطر هنا و لا هناك

رجليك شوية كده يا أخ

قلوب حائرة said...

والله ياهبة جيتي اجدع مني بجد كنت هموت واكتب عن حاجة زي كده هموت وانا بشوف الرجالة قاعدة على القهاوى والاذان بياذن وهما ما بيتحركوش ولو قالوا في فراخ نزلت في الجمعية هيروحوا جري هموت وانا وانا بشوف راجل بيمد ايده على مراته او بيقولها كلمة وحشة حاجات كتيرة مخنوقة منها مشكلتها الوحيدة من وجهة نظري اننا بقينا نقلد اي حد ونبعد عن قدوتنا الي لو اتبعناه والله هتبقى حياة ما بعدها حياة تحياتي ليكي اغالية ولزوجك وليوسف

عصفور المدينة said...

جزاك الله خيرا يا أستاذة على هذا الطرح

أين القدوة في منطقتك أيها الرجل

Lemonada said...

عارفة الموضوع دة مهم جدا
حتى القدوة في الحياة بشكل عام مش بس للراجل
يعني للست لازم يكون في عندها قدوة عشان تربي اولادها و تعيش مع جوزها
والقدوة للمراة الايام دي مش حقولك
يعني لو هيفا هي القدوة الحياة قدامنا بايزة قد اي
المهم بخصوص رسول الله صلى الله عليه وسلم
والقدوة
كان قدوتي في الحياة وقلتلو لما شوفتو هو نجيب سويرس
بس وانا بسمع في التلفزيون عن صفات الرسول الحبيب صلى الله عليه وسلم وان لازم يكون القدوة بتاعتنا سواء راجل او ست حسيت نفسي صغيرة جدا
يعني افكر في نجيب يكون قدوتي وانا الرسول الكريم ازاي
تحياتي واحترامي
متاسفة طولت في الكلام
متشكرة لزيارتك مدونتي

shahy said...

الكلام دة كبير قوي
انا اعتقد ان التربية ليها عامل كبير
وطبيعة بيئة ونشأة الرجل
علشان كدة لازم نحاول اننا نربي اولادنا صح

وبعدين في حاجة كمان
في ناس كتير بيبقى عندها عيوب ومش بتحاول تصلحها طبعا انا قصدي العيوب الكبيرة لان مفيش حد خالي من العيوب بس في عيوب مقبولة شوية

المهم تلاقي بعض الرجالة بيقولوا هو انا كدة وطبعي كدة ومش هاغيرة مع انة ممكن يكون طبع منيل بس هو راجل

وحكاية الصلاة في المساجد لو كلمتي فيها حد يقولك : الهدى من عند ربنا

انا لسة كنت بكلم ماما على التليفون وكانت بتحكي لي على واحد جارنا خبط عليها وهي كانت لسة سامعة حلقة للشيخ محمد حسان عن عقوبة تارك الصلاة
فسألتة هو انت بتصلي
قالها بكل بجاحة : لأ لية؟
قالت : لية ؟ ! وهو دة سؤال
قالها : ومالك مرعوبة قوي كدة لية
قالت : اصلي خايفة عليك من العقوبة
قالها : اي عقوبة اللي في الدنيا والا اللي في الاخرة

يعني عاوزة اقولك انة عارف بس زي مابيقولوا مكبر دماغة
يارب ارحمنا واعنا على طاعتك

انا رغيت كتير بس حقيقي الموضوع كبير قوي


تحياتي يا دوبة يا جميلة

أيامنا الحلوة said...

الموضوع كبير كبير كبير بجد الغريبة ياهبه اننا في رمضان تلاقي الرجالة معظمهم مش هقول كلهم بيكونوا ملتزمين وفي المواصلات ولا بيلمسوا واحدة بالخطأ بعد رمضان تلاقي حجات غريبة ولا كأن الانسانة اللي في الموصلات دي ممكن تكون في موضع زوجتوا او خطيبتوا او من اي حد من اهل بيتوا

وفي رمضان كمان كنت بلاقي في عز صلاة التراويح الرجالة قاعدة على القهاوي والشيشية طبعا والتليفزيونات ربنا يرحمنا ولا كمان اللي بيحلف على مراتو بالطلاق عشان الكحك والبسكويت وبتوصل كمان للضرب والشتيمة ياااااااااااه حجات كتيرة سيئة بجد

لو الراجل فعلا ملتزم من جواه وعارف يأدي دوروا كويس في المجتمع مكنتش هيبقى سؤالك ده مطروح

مش عايزة اهاجم الرجل اوي بس بجد انا بشوف نماذج سيئة فعلا ربنا يرحمنا
ومش معني كده ان الرجالة كلهم بالمنظر ده بس للاسف معظمهم كده
تحياتي

Hadota .. حدوتة said...

اضم صوووووتى لصوتك

والله القدوة الحسنة دى لو اتحققت هنبقى بيوت سعيدة

فمال بال لو قدوتنا رسول الله صلى الله عليه وسلم افضل البشر كلهم

طبعا لو اتحقق دا هنلاقى ازواج وزوجات سعيدة وابناء على قدر من التربية والنجاح والصحة النفسية

بس نقول ايه

على فكرة مش هنعمم ونقول الكل ملوش قدوة

بالعكس فيه ناس كتير عندها قدوة واتمنى اللى معنهمش يعملوا زيهم


تحياتى ليكى وسعدت جدا بزيارة مدونتك

وان شاء الله نبقى صحاب
:)

أبو سويلم said...

اخيرا يا ست هبة
والله وحشتنينا وحشتنا كتاباتك الجميلة
واتمنى ان الغيبة دى ما تتكررش ان شاء الله
كلامك صحيح لدرجة كبيرة
والسبب على ما اعتقد هو غيابنا عن الدين وعن النماذج الصحيحة من القدوة
ده السبب الاول
وكمان فيه اسباب تانية فرعية
منها الاوضاع الصعبة ونمط التربية
وغيرها وغيرها
انا اتكلمت باريحية شديدة ولم اتعصب لجنس ما
وبالتالى منتظر تناولك للجنس الناعم
والسلام

e7na said...

راحوا يجيبوا حاجه وراجعين

البرديــــــة المصرية said...

كلام جميل جدا , والسلوك ده موجود لنفس الاسباب اللى قالها الاخوة وبالذات التربية اللى للأم دور كبير فيها .
الموضوع ده ممكن يفتح فى مواضيع تانية
وياريت تكتبى فيها مرة تانية وتالتة

الطائر الحزين said...

حضرتك طرحتى أكثر من موضوع

الرجل فى بيتة
* مع زوجتة
* مع ابناءة
* مع اخواته
الرجل فى الشارع

الرجل فى العمل

ارى ان الأمر فى الاستغلال الأمثل للقوامة وليس النظر اليها على انها تفضيل مطلق دون العمل بمتطلبات هذه القوامة والنظر الى أحقية الرجل بها من بالانفاق وبما فضل الله به

الضمير هو رسالة الحى

وهناك اشياء مشتركة بين التصرفات الفردية والمجتمع تحتاج من المجتمع تهيئة الجو المناسب للصلاح لاقامة الحجة على الافراد هذه ليست دعوة للانحلال بحجة المجتمع لكن لكى يقوم كل بدورة

طبعا الموضوع يحتاج تفصيل اكثر
لكن اعتقد ان وجهة النظر وصلت
بارك الله فيك

Yahia said...

يا ست هبة دايما كده موضوعاتك شائكه ومحتاجه مقاله للرد مش مجرد تعليق بس المهم هحاول اكون مباشر ومختصر وواضح.
أولاً: من خلال النظرة التحليلية لواقع مجتماعتنا اليومين دول اقدر اقول على طول ان المجتمع وبصراحة بايظ ومش هقول ادله على الموضوع ده عشان اكيد واضح للجميع.
ثانياً: السبب في البوظان ده هو البعد عن الدين (أي دين) وفي بعض الحالات تطبيق الدين بشكل خاطئ.
ثالثاً: الحل أيه ؟ اعتقد ان الحل ان كل واحد يعرف عيوبه ويحاول يغيرها مش بس يبقى شايف عيوب الاخرين وشكرا على كده !! لازم يكون عندنا مجموعة قييم ومعايير ثابته في حياتنا نتعمل من خلالها زي الحق والفضيلة والعدل والتسامح ومش عايز اكمل عشان الفلاسفة ميزعلوش. كمان لازم جدا نرجع للدين. واتمنى ان يجد كل شخص قدوه أو قائد يمشي على خطاه وده هيخليني اتطرق لموضوع الأمامه في الإسلام ومكانة الأمام بين جموع المسلمين ، بس كده انا هكتب مدونه تانيه ، على العموم تحياتي.
(انت ليه موضوعاتك دايما مركبه كده وبتحتاج رغي كتتتتير ... الرحمه يا رب)

رئيس جمهوريه نفسى said...

هى بصراحه شويه اساله فى الصميم وحجاوبك
بالنسبه للقدوه موجوده وبكثره فى اشباه الرجال فى واحد زى تامر حسنى الدنيا اتقلبت لمجرد انو اطبق عليه القانون
فى واحد زى محمد ابوتريكه لاعب الاهلى لمجرد انى هو مع ربنا قالو عليه انو عضو فى جماعات اسلاميه
القدوه موجوده فى حكومه بتلم من المساجد الى بيصلى
موجوده فى قنوات الاغانى الى بتمحى الشخصيه العربيه عموما وبتامرك كل حاجه فى حياتنا
علاقه الراجل بالمره طب تيجى ازاى وبصراحه احنا فى المجتماعات الشرقيه بنربى على انى الراجل ليه كل حق ومش ممكن طبعا حتى يفكر يرتب الاوضه بتعته بدل والدته موجوده ولا اخته( على فكره انا مش برتبها )
يارب اكون قدره اوصل ليكى اجابات على جزء من اسالتك

تامر حسين said...

ياااخ
ضمير
انا سمعت الكلمه دي قبل كده بس فين مش فاكر
تحياتي

الشنكوتي الكبير said...

يا سلام يا هوبه
سؤالك بسيط ومباشر واجابته سهله جدا
الموضوع ببساطه ان لكل شيء اصل وسبب واذا عرف السبب بطل العجب يعني مثلا بتسالي فين غض البصر اقول لحضرتك وهو يعني ازاي الرجاله تغض بصرها وتتجدعن كده وتلم عيونها على ما احله الله ليهم وتبعد عن ما حرمه ما دامت الفتن واقصد النساء اللي لابسين من غير هدوم دول كأنهم بيندهوا علينا علشان نبص عليهم تلاقي بنت لابسه مايوه تقرييبا والمفروض انه لبس عادي ولذيذ وتقوليلي عيب غض بصرك انا عارف اني لو غضيت بصري جزائي عند ربنا عظيم من ترك شيء لله .... مش حافظ النص بتاع الحديث بس هو الجزاء بيكون عظيم قوي
المهم يعني قبل ما تحاسبي اللي بيبص حاسبي الهانم اللي ماشيه وفاكره ان عوراتها من حقها تكشفها على الملأ كده وكأنها بتاجر فيهم وقبل ما تحاسبي الهانم دي حاسبي امها اللي نسيت تعلمها في صغرها يعني ايه جسمه كبنت يبقى غالي عندها ولا ترخصه للناس كده وقبل ما تحاسبي امها حاسبي ابوها اللي شايف بعينه بنته لابسه ما يثير شهوة اي رجل ولأنه هو كمان رجل اكيد عارف يعني ايه شهو الرجل ونظرات الرجال يبقى لازم نحاسبه علشان طلع والعياذ بالله ديوس لا يغار على عرضه المباح لكن قبل ما نحاسبه نحاسب اللي خلاه ينسى كرامته وعرضه وشرفه ويتلهي في الشغلانه اللي بيموت نفسه فيها ويروح الشغل من الصبح لحد العشاء ويرجع مش شايف قدامه علشان يادوب يوفر المتطلبات الأساسيه لبيته يبقى نحاسب اصحاب الأعمال اللي واكلينها والعه ومش بيدوا الناس حقها لكن ازاي نحاسبهم والقانون بيسمحلهم يعملوا كده هم ماشيين تبع القانون يبقى نحاسب القانون اللي سمح ليهم يعملوا في الناس كده طيب مين اللي عمل القانون ده يا ناصحه الناس اللي بتسن القوانين وال....اللهم احفظنا طيب قبل ما نحاسبهم ليه منحاسبش نفسنا على اننا سمحنا نتهان كده ونضيع حقنا

يعني هي عامله زي اغنيه بابا كان بيحفظهالنا زمان البيضه عايزه فرخه والفرخه عايزه قمحه والقمحه عند الفلاح و....... وخلاص مش فاكر
الا هو الموضوع كان عن ايه اصلا
سلااااااااااااااااام

اه صحيح نسيت افتي واقول الحل ايه
وطبعا الحل مش في الدره زي اعلان كريستال
الحل نبدأ بنفسنا ونربي ابنائنا صح
يمكن المجتمع بيهم بكره يتغير
سلااااااااااااام

RealMan said...

اعتقد ان السؤال ده اطرح كتير قبل كده وهيفضل يتطرح كتير بعد كده لنهايه الكون الستات عيزين الرجاله يبقوا زي الرسول يعني يقتدوا بيه في اخلاقه وتعاملاته يعني من الاخر يطبقوا السنه النبويه الشريفه. طيب ممكن يا ست الكل تقوليلي الست فين دورها يعني هيا تقعد كده زي الباشا وتعمل الي هيا عيزاه من غير ما حد يحاسبها وتقول اصل الرجاله مش بتطبق السنه فاحنا خلاص زعلنين مش هنعينكم عليها. حضرتك مفروض تعيني زوجك او اخوكي او ابنك علي حب الطاعه ده ابدي بابنك وفهميه يعني ايه يقتدي بالرسول يعني ايه يحب الرسول. ولا انتي نسيتي ان في مصر الست هيا المربيه الاوله في البيت هتقوليلي طيب الراجل فين هقلك طالع عينه وعين الي جابوه من الحاله الاقتصاديه في البلد واعتقد انتي عارفاها كويس. يا ريت تبدئي دعوه بين كل سيدات مصر انهم يبدئوا في تربيه ابنأئهم تربيه صحيحه علي السنه يعني نلحق الجيل الي جاي مش بتحاولي مع جيل خلاص قرب يودع الاصلاح يبداء من التربيه الي الست مسئوله عنها. مش دفاع عن الرجل بس ده واقع حياتنا الست هيا المسئوله عن التربيه الفعليه للابناء وبلاش نقول والراجل ما يساعدش ليه والله نفسه يساعد ويقعد في البيت بس ابقوا دوروا علي حد يصرف عليكم يا ست الكل. وربنا يكرمنا جميعا بصحابيات ولا دول كما ننسيتيهم

Tamer Nabil said...

القدوة موجودة


المشكلة فى البعض الذى لاقدوة لة

كما نقول مع نفسى ولة دماغة وتفكيرة الخاص

انا اتمنى اصلاح الحال للجميع

تحياتى

غمض عينيك said...

الضمير موجود عند ناس كتير
وناس كتير بتراعي ربنا في حياتها وبيتها ودينها وشغلها
لكن اوقات الدنيا بتغلب
والواقع بيفرض ظروف تخلى الانسان يخرج عن شعوره
بس انا اللي عايز اقوله ان الضمير لسه موجود والرجالة في منهم ناس كتير ممكن يكونوا قدوة

تحياتي ليكي ياهبة
محمد سمير

ابو تريكه said...

http://www.iffhs.de/?b002ec70a804f4cd003f09 صوتو لابو تريكه

doha said...

انا شايف
انى الانسان عمره مايحتذى بحد
ويبقى قدوة ليه الا لما يكون بيحبه
فاللى تلاقيه يعمل حاجات الرسول صلى الله عليه وسلم نهى عنها
دليل عملى انه حبه للرسول مش اللى هو
لانه لو بيحب الرسول بجد
كان هيبقى قدوته الحقيقية
تحياتى
دوحة

Soooo said...

اقولك حاجه ياهبه

زمان واحنا صغيرين لما حد كان بيتصل بحد من اخواتي او بابويا .. مثلا يعني .. ويسأل عنه وبتاع .. كانو بيقولولي ساعات .. قلهم مش موجود
هي حاجه صغيره صحيح .. بس لو قستي عليها هتلاقي حاجات كتير
نفس الكلام ده هتلاقيه كان بيحصل معانا كلنا .. مش شرط في كدبه في التليفون بس ممكن في مواقف تانيه

القدوه بقى ضاعت في وسط ده كللو
الضمير اندثر في الليله دي وتاه
السؤال بقى .. هو احنا لو ربنا كرمنا مثلا مثلا وعرفنا نتجوز في الايام الغبره دي ..
هل هنعمل كده في ولادنا ولا ايه .. وايه الحل وازاي


والسلامووووز ختامووووز

Rosa said...

بوست في الصميم يا دوبا بجد
الفكره رائعه و اكيد هتابع سلسلة البوستات دي
المشكله يا دوبا ان الناس بقيت بتاخد الي هيا عيزاه وعلى مزاجها و الي مش بمزجها بتنساه او تتنساه
الي يقدروا عليه و الي ميقدروش يتجاهلوه
زي انه ياخد عن الرسول سنة تربية الدقن وغير كدا مايعرفش حاجه يهين مراته و يضربها و يحبسها
و يوممايجي يطلقها يخرجها من بتها مع انه بنص القرآن ماحدش يخرجها من بيتها
هنقول ايه بس
موضوع رائع يا دوبه كالعاده

mohamed said...

بوست جميل يا دوبا وربنا يبارك فيكى وانا شايف يا اخ على باب الله ان الحالة الاقتصادية الممفروض متاثرش على تعامل الواحد مع مراته مش هو ده نفس الشخص اللى بيكلم زميلات العمل بلطف وكانه ملاك ولا هى الحنية جت على مراتك ووقفت

أوشــــــه said...

الضمير واخد أجازه
والرجاله كمان واخدين أجازه من المسؤوليه :ازواج وآباء وشايفين انهم طاما بيجيبو فلوس وشايفين طلبات البيت
يبقى مش مهم المتطلبات العاطفيه للي جوه البيت
لا رحمه بالزوجه ولا يعلم شيء عن الأبناء
وبيتفننو من الهروب من تلك المسؤوليه بل يتملصو من الاعتراف بأي خطأ
والسبب زي ما تفضل الأخوه في ضعف الايمان والانقياد لوساوس الشيطان
ربنا يهدي الجميع

ولــــــــــو said...

بحثت عن اجابه لسؤالك
فوجدتني بدوري اتسائل
ولم اجد لنا اجابه مقنعه
بوست اكتر من هايل

Mirage said...

طيب انا عايز اسألك سؤال

انتى لو جوزك اتجوز عليكى هيبقى شىء عادى ولا مش هتقبلى حاجة زى كده ؟

Doba said...

على باب الله

شاطر والله بس شكلك اخدت برد من البياته قدام المدونة وعديتنا

هطشوووووو

هو حقيقى وبعد قراية كل التعليقات من الواضح ان فعلا الحالة الاقتصادية بتاعت البلد هيه اللى مخليا الرجل بقى حاسس دايما مربوط فى الساقية وعمالة تدور بيه لدرجة انه مبقاش ماسك بزمام الامور كما ينبغى ان يكون

يا ترى لقيت الضمير ولا لسه
يييييييييييه ريحة شوراب ريحته افيييييه

تحياتى

Doba said...

قلوب حائرة

ان كان على قاعدة القهاوى يا بيبو فحدث ولا حرج - القهاوى بقت ملية البلد ومبقاش فيه اكتر من الكافى شوب علشان يضيع الرجالة والشباب فيهم وقتهم

ومدام مفيش تفكير ولا وعى مهو لازم هيروح لمراته الزهقانة فى البيت هيلاقيها بتنكد عليه قيوم ممسيها بالعلقة التمام علشان متضيعلهوش دماغ الشيشة اللى عاملها

ربنا كريم
اشكرك وتحياتى

Doba said...

عصفور المدينة

سؤال جميل تطرحه أوجزت بيه كل موضوع البوست - بس انا معرفتش برده رأيك الخاص

يهمنى اعرفه
تحياتى

Doba said...

lemonada

عارفة ان الست برده لازم يكون عندها قدوة والست بإذن الله موضوه البوست الجاى لانها بيقع تحت عاتقها الكتير

بصراحة نجيب سويرس شخصية هايلة ودماغ محترمة جدا انا عن نفسى بحترم دماغه وجرأته وطموحه بس هو نجيب سويرس شخصية تحتذى فى النطاق الخاص بالعمل والطموح - وانا بتكلم فى الناحية الشخصية والتعامل مع المجتمع واعتقد برده انه ناجح فى ده

نورتينى ويارب دايما منورانى
تحياتى

Doba said...

shahy

مشكلة التربية دى
كل واحد بيكون عنده جواه اعتقاد او راى شخصى بيبنى اولاده عليه وبيريهم بيه - بس مين فى اللى حواليكى حاولو يقرو فى تربية الاطفال وان ازاى الطفل يطلع شخص سوى ودماغه وتفكيره منظم ومحترم

هو ليه بقى العند فى الغلط
يعنى انت غلطان وعارف انك غلطان بتكابر ليه بقى - متعتذروالموضوع هيخلص - لكن للأسف تلاقيه بيتمادى فى الخطأ وخلاص

اعتقد ان الشيطان بيكون مغطى دماغ الناس دى وعامى عيونهم وقلوبهم عن اتخاذ القرار الصواب

نورتينى زى مبتنورينى دايما
تحياتى

Doba said...

أيامنا الحلوة

لالالالالا
المواصلات دى موضوع تانى خالص ومحتاج بوست لوحده - انا بطلت اركب اتوبيسات خلاصص - يقما ميكروباص او مترو لكن غير كده نو نو نو

بصراحة معاه حق بقى بتاع البسكويت ده - اومال يفطر بايه بس فى العيد - والله حاجة تحزن - الواحد بيتمسك بحاجات فرعية وبيتخانق فى مهاترات بجد مهاترات

وطبعا مش كل الرجالة كده - الحلوين كتييير قوى وربنا يبارك فيهم

اشكرك يا برنسيسة
تحياتى

Doba said...

حدوته

اهلا بصوت جديد فى كوكبة دوبا
وطبعا طبعا لو القدوة اتحققت هنكون افضل وافضل وخاصة بالرسول

ربنا يبارك فيكى يارب
ويسعدنى ويشرفنى نكون اصدقاء

تحياتى

Doba said...

أبو سويلم

انا جيت يا اولاد زقططوا يا اولاد
فوووووووووووو

ربك كريم بس الوقت كان ضيق شوية حقك عليا ومش هتأخر تانى هبقى اجى نص ساعة بدرى

دين وتربية ونموذج صحيح للقدوةواوضاع صعبة - انت ذكرت دول كأسباب

تفتكر دول ربنا مدلناش عقل كافى اننا نتحاور ونتفاعل علشان نتعامل بالحاجت دى لمصلحتنا فى اننا نكون افضل الامم

انا هتكلم فى البوست الجاى عن الجنس الناعم وهشرحهملك كلهم

تحياتى وشرفتنى

Doba said...

ehna

كل ده وانا قاعدة مستنياهم يرجعو ومرجعوش وبعدين هنستنى كتير بقى ولا ايه

ممكن حاجة ساقعة عقبال مييجو وحبة لب اهو نتسلى

تحياتى

Doba said...

البردية المصرية

اكيد هكتب فى الموضوع مرة تانية لان فعلا التربية والام من اهم العوامل

اشكرك لمرورك الكريم ونرجو تكرار الزيارة

تحياتى

Doba said...

الطائر الحزين

كلامك فى الصميم
ربنا أعطى للرجل القوامة مش من المفروض بقى انه يحترم ده ويكون قدها ولا يترك الشيطان يدير الدفة لحياته كما يشاء ويهوى

وبالطبع لن ينصلح حال المجتمع الا بصلاح احوال افراده وسلوك كل منهم والقيام بدوره على اكمل وجه

اشكرك كثيرا كثيرا على مرورك الكريم
تحياتى

Doba said...

yahia

احب كل شخص ان يعطى مقاله الخاص لنعلم جميعا الصواب والخطأ من وجهة نظر الآخرين واختلاف الآراء لا يفسد الود بيننا - ولكن ليستفيد كل منا برأى الأصدقاء

أولاً: طبعا معاك حق ان المجتمع بايظ ودى مفيهاش كلام

ثانيا: اكيد الدين اهم عامل فى المعاملات بين البشر وبدونه يحدث خلل

ثالثاُ: يارب كل شخص يقدر انه يتمسك بالقيم والمعايير التى تعينه على ان يصبح شخص اكثر نفع للمجتمع ويكثر من القدوة فى مجتمعنا وياريت تبقى تكتبلنا اكتر عن الامامة فى الاسلام ومكانة الامام بين المسلمين

موضوعاتى مركبة ومحتاجة رغى كتيير علشان أستفيد انا واصدقائى واديك بتعليقك الكريم اكيد فيه كتير استفادو

اشكرك لمرورك وتحياتى

Doba said...

رئيس جمهورية نفسى

مع احترامى ليك وحتى لو الحكومة بتلم النناس من المساجد فده لانهم بيعملوا حاجة مش مظبوطة وبيقعدو لبعد مواقيت الصلاة

انا مش بقولك بات هناك انا بس بطلب ان الواحد ينفذ سنة نبيه واقرا فى فقه السنة هتلاقى ان صلاة الرجل لابد وان تكون بالمسجد وان يكون مسجد عامر بالناس

وبرده حتى لو تامر حسنى وابو تريكه وقنوات الاغانى هما اللى بقو مسيطرين ومن خلالهم بنحكم ونعيش فليك حرية الاختيار انك تتفرج ولا لا او تسمع ولا لا

ربك هيحاسبك على عيونك اللى شايف بيهم شفت ايه وودانك اللى سمعت بيهم سمعت ايه - اعتقد انه برده ادانا عقل وهيسالنا وجهناه لفين علشان نستفيد

هقولك برده مجتمع شرقى وبيطلع الرجالة مبيساعدوش واديك انت بتقول اهو انك انت شخصيا مبترتبش اوضتك وانت عارف ان ده مش صح - مبتختارشى ليه انك تبقى على صواب وتقوم ترتبها ولا هيه انتخه وخلاص

وده اللى انا بقول فيه - شغل عقلك واعرف فين الصح والغلط علشان تمشى مظبوط لكن طول مالواحد بيتفرج عالغلط ويقول وانا اعمل غيره ليه مهو كلهم غلط فاعرف ان ربنا هيحاسب الكل

اشكرك على مرورك وتحياتى

Doba said...

تامر حسين

انت مين
نت ليه
انت كام

انت ازاى اصلا
خليك كده عايش فى الغيبوبة

سلامى وتحياتى

Doba said...

الشنكوتى الكبير

الحل نبدأ بنفسنا ونربي ابنائنا صح
يمكن المجتمع بيهم بكره يتغير

بصراحة تعليقك هايل
مش قادرة اقولك غير اننا حتى ولو كل الظروف دى موجودة لازم نعمل زى مقلت نبدأ بنفسنا ونغير سلوكيتنا اللى احنا عارفين انها غلط ومنكابرشى وكمان نتعلم ازاى نربى ابنائنا بشكل سوى يغير من شكل مجتمع بكرة

اشكرك يا صديقى
وتحياتى

ممكن ازاة كريستال لو سمحت
يلا باى

Doba said...

realman

انت طبعا معاك حق فى ان المرأة ليها دور كبير جدا جدا وانا هقطهملكو كلهم فى البوست الجاى بإذن الله

بس انت برده ليه رميت الكورة فى ملعب الست - ياترى ده نوع من الهروب من مسؤولياتك كرجل - رميت الكورة وخلاص

الرجولة مش مصاريف وبس على فكرة
الرجولة قوامة وقيادة وفكر واساس وعماد اسرة ورجل دينى متحضر

اشكرك كثيرا لمرورك
وتحايتى

Doba said...

تامر نبيل

تفتكر فعلا القدوة موجودة
احسن انا فعلا ابتديت اشك ان مبقاش فيه واضم صوتى معك بصلاح المجتمع

أسعدنى مرورك
ارجو اللاستمرار

تحياتى

Doba said...

غمض عينيك

معك كل الحق بتعليقك ولا تعليق لدى بعده ولك منى كل الاحترام والتقدير

اشكرك
هبة

Doba said...

أبو تريكه

انى اصوت لابو تريكه فليه خير يعنى ثم انا مليش فى الكورة

شكرا

Doba said...

doha

مش معنى ان الشخص يتخذ الرسول قدوة وميعملشى حاجات بيتبعها الرسول يبقى الشخص مبيحبهوش صح

لا خالص
ده اجتهاد من كل شخص ويفرق بين كل شخص وشخص

ثم انت ناسى ان فيه شيطان بيلعب فى نفوس البشر وبيأثر فى تعاملاتهم كلها

الواحد بس على قد ميقدر يجاهد مع نفسه فى فعل الصواب

اشكرك على مرورك
تحياتى

Doba said...

soooo

والله الموضوع كله جهاد مع النفس وانك تتجوز وتربى فبرده مش بالساهل

فهل هتختار الصعب ولا هتستاسهل زى بقيت الناس

معظم الناس بتكدب لمجرد الكدب
رايحة فين يا ماما - هاخد حقنة يا حبيبى
متعرفش انها بكده أذت مشاعر ابنها وكمان هيه كدابة واخدت سيئة عاللى بتقوله

دى مبادىء لا تتجزأ
يارب ربنا يقدرك وتكون اسرة مستقرة نفسيا

اشكرك وتحياتى عالمرور الكريم

Doba said...

rosa

نورتينى يا ارق روزا
فعلا الواحد بيمشى على سطر وبيسيب سطر وكله بمزاجه واهى ماشية معاهم وخلاص - ده حتى وما يلفظ من قول الا لديه رقيب عتيد - يعنى ده حتى الكلمة

اومال بقى كل الكوارث اللى احنا فيها دى ايه

أسعدتنى يا قمر
تحياتى

Doba said...

mohamed

والله معاك حق وفعلا الظروف ملهاش دعوة بحاجة - هو ليه الناس بتنسى ايام الرسول وان مكنش فيه ايامها حاجة يعيشو بيها او منها

بيقولك ظروف اقتصادية وهما عندهم اكل وشرب ولبس وسكن ومواصلات ودهب ومع ذلك عمالين يجرو ويجرو وخلاص

اومال ناس زمان كانوا عايشين ببركة ربنا والرزق اللى بيبعتهلهم ازاى

ده شعب نفوسنا ضعيفة جدا
يلا حصل خير ان شاء الله

شرفتينى ونرجو تكرار الزيارة يا افندم
تحياتى

Doba said...

أوشة

انا بجد اوقات بحس ان الرجالة بيهربو بمبدأ انا بخرج علشان اجيبلكم الاكل والشرب والفلوس - طيب فين المشاركة والتربية والرعاية ولا كلكم راع وكل مسؤول عن رعيته دى كلام فى الهوا وخلاص

الرعاية مش بالمال
وربنا يهدى الجميع زى مقلتى

اشكرك لمرورك وارجو تكرارها
وهعزمك على قهوة يا ستى

تحياتى

Doba said...

ولو

يعنى ملقيتشى غير تساؤولات برده
ايه الحيرة دى ياربى

بعد كده هاعمل الاجابات بفلوس علشان نطلع طاقة اكبر فى الحل

او ممكن اللى يكسب ياخد شكولاتة او بنوبنى وابقوا اصطفو بقى مع يوسف

اشكرك على مرورك
تحياتى

Doba said...

mirage

يعنى تغيب تغيب ولما تيجى عاوز تجوز جوزى عليا ماشى انا هقطعك

الا هو ايه علاقة سؤالك بالبوست
ما علينا

انا هرد عليك وده لانك صديقى

الموضوع عندى ليه نقطتين ولكل منها رد فعل وهما كالآتى

الاول: لو عرفت فجأة انه اتجوز وده انا لن اقبله لانى لا احب الخيانة وبالنسبة لى ده نوع من انواع الخيانة لان الاسلام بيح للمرأة او بمعنى اصح للزوجة الاولى انها تعرف قبل الزواج بأخرى وانها توافق او ترفض انها تكمل حياتها مع هذا الشخص

الثانى: لو هو جه وقالى انه عاوز يتجوز وانا عندى استعداد اكمل فهكمل لان دى من الحاجات اللى ربنا اباح له بيها وانا مليش انى اقف امام شرع الله

ولو مش هقدر يبقى هنسحب من حياته وهكمل مع حد تانى

انا عاوزاك تاخد من شاه و تقرا فصول القصة السابقة وتكملها بدل شاه لانه واضح انه مشغول ومش هيعملها فلو تحب ابقى بلغنى

اشكرك يا ميراج
تحياتى

الشنكوتي الكبير said...

ميراج

يا ابني يا حبيبي بطل تلعب في عداد عمرك كده كخ يا حبيبي لما تقولها جوزك يتجوز عليكي وبعدين هي تخبطك بحاجه تفتح نافوخك وجوزها يحي اصله صعيدي وانا عارفه ممكن يقولك جبت الكلام ده منين يا ابني وكمل على دماغك يعملك تربنه في المخ وبعدين هوووب يجي الواد السكر يوسف ابنهم ربنا يحميه ويرزعك شلوت في مقتل يخلص على اللي فاضل منك يا فالح هتعمل ايه ساعتها

انا اللي اقصده يا عزيزي ان فكرة الزواج من اتنين دي مبتجيش للتسليه كده ومش اي حد بيقدم عليها لما بتكون الأسره مترابطه صح ومبنيه على اساس صح يبقى ايه الداعي للزوجه التانيه
ربنا شرع لينا الزواج من اكتر من زوجهعلشان يعفنا من الخطأ وانت اكيد عارف في كام زوج في العالم كله بيخون زوجته مع اكتر من عشيقه ويديلك ميت الف حجه لفعلته ويقولك اصلها وفصلها طيب لما ربنا يرحمنا ويدينا مجال اننا منقعش في خطيئة الزنا اللي هي حرام في كل الأديان واظن في المسيحيه خطيئة الزنا خطيئه رهيبه
يبقى لما الحياه الزوجيه تبوظ والحل الوحيد هو الزوجه التانيه يبقى اتبع الشرع ابلغ زوجتي واعرض عليها واخيرها وبعدين اتجوز
ولازم العدل بين التنين
الموضوع يطول شرحه ومحتاج كلام كتير قوي
بس خلاص انا مش عايز ازهق البنت مننا ومن رغينا
سلام يا فقري
سلاااااااااااااااااااااام

Mirage said...

لأ هو كان مجرد سؤال وكان فيه نقطة وراه ليها علاقة بالموضوع بتاعك

خلاص انا هقرا فصول القصة بقى من اول وجديد وهكملها إن شاء الله

وميرسى على صداقتك الغالية

بجد بعتز بيها جدا

Doba said...

الشنكوتى الكبير

ايوة كده ادى التعليقات يا بيه
متيجى تنضم الينا ونقطع ميراج ولا نسيبه ليوسف وخلاص هيطلع منه الشيكولاتة والبونبونى بطريقته

اشكرك
سلام

Doba said...

ميراج

اشكرك بس انا عاوزة اعرف انت تقصد ايه بسؤالك وايه علاقته بالبوست بتاعى

انت صديق من اول التدوين يعنى بقيت من المسجلين خطر عندى

انت انسان كويس وانت عارف كده اينعم لاسع حبتين بس مش مضر يعنى

ههههههههههه

هستنى التفانيين بتاعت القصة والحركات عاوزة فصل بقى انما محصلشى نكسر بيه الدنيا

سلام يا صديقى
تحياتى
هبة

آلام وآمال said...

القدوة موجود فعلا الحمد لله وترك فينا ما لو كنا تمسكنا به ما كنا ضللنا ابدا
ولكن للأسف لم نتمسك به
إلا من رحم ربي

الاخلاق والقيم ضاعت لما استهترنا بأمور الدين وطلع علينا الرويبضة يقولولنا ان بعض أمور الدين من القشور

ربنا يرحمنا ويردنا الى ديننا ردا جميلا

فى القلب said...

أنتى عارفه الرجاله ألى بالمنظر ده أحنا الستات ألى بنربيه على كده من صغره

المفروض أحنا نعلم و لدنا الذكور يحترمو أخواتهم البنات و الأم و البنات بصفه عامه
و الراجل ألى ما حلتهوش غير العنف ده ناتج عن خلل و ضعف فى الشخصيه و عدم ثقه فى النفس

احساس برضوا حى said...

عزيزتى
شوفى انتى بتتكلمى عن الاخلاق والتدين كده وانتى عارفه صعب نكون فى زمن كل اللى فيه متدينين وكل اللى فيه عندهم اخلاق اه فى ناس كويسه كتير وبتعمل حاجات حلوه بس فى ناس برضوا عندها انحلال وبتعمل حاجات وحشه
وانتى بتقولى القدوة ومحدش لاقى قدوة حيه ادامه ولو لقاها مش بيقدر يعمل كل الاشياء الجميله اللى موجوده فيها
يعنى تانى من كل اللى قولتى عليه فى ناس بتغض بصرها بس مش بتصلى جماعة وناس بتصلى جماعة بس غليظ مع اهله واسررته شويه هى نقط قليله اللى اتكلمتى فيها بس انحلال الاخلاق يا ريت تيجى على انه مش بيصلى جماعة بس ده مش بيصلى من اساسا ولا جماعه ولا لوحده
ومش بيفظ القراه بس ده عمره ما بيسمعه كمان ومش وسط اهله شتايم بس ده كمان بيشرب وبيعمل حاجات وسخه
قولى السؤال للرجال اللى بيصلوا ومحترميين وعارفين دينهم ليه مش بيزودوا من تدينهم
يااه اطولت اسف
الكلام اخدى
سلام

آلام وآمال said...

تعقيبك عندي على مبدأ عدم قبول العوض في محله تماما ربنا يحفظك
انا فعلا كنت هارد على النقطة دي زي مانتي قلتي بالظبط

ربنا يكرمك يارب وأسعدني جداا اهتمامك وردك
:)

دكتور كسلان said...

اول مرور ليا ع المدونة

مدونتك جميلة جدا

كل سنة ويوسف طيب

ربنا يخليه ليكى وتشوفيه فى احسن حال

معلش جت متاخرة

بالنسبة للبوست ده

انا عاجبنى جدا رايك

فعلا احنا افتقدنا القدوة

والاخلاق بقت وحشة اوى

اللهم اهدى شباب ورجال المسلمين

وفتيات ونساء المسلمين


سلاااااااااااااااااااااااااااااااااااام

sendbad said...

احنا عايشين ازمة ضمير
وبعاد عن ربنا اوي
مش الرجالة بس
علشان مبقاش بعمم
ودي مشكلة الكجتمع الذي فقد حاجات حلوة كتير كانت موجودة
تحياتي

كاميليا said...

آهلا يادوبا
الحقيقة موضوعك جميل، وفيه تساؤل مهم جداً
بس الحقيقة كمان إن فيه شباب ورجال رائعين، انا آعرف الكثير منهم،
شباب صالح بمعنى الكلمة، يحرصون على صلاة الجماعة بالمسجد
وآيضاً يحاولون قدر جهدهم إتباع رسولنا الكريم صلى الله عليه وسلم فى كل ماقال، ويتخذونه قدوة، ويتحلون بآخلاق كريمة وشهامة ونبل ايضاً

آدعو الله ان يزيد آمثالهم، ويهدى الجميع

مدونتك جميلة ومتنوعة الموضوعات، قضيت وقتاً طويلاً فى القراءة فيها

تحياتى لك واحترامى

أحمد سلامــه said...

في حاجات كتير في البوست الصغير ده تستاهل مناقشات طويله جدا
بس انا استوقفني منك الجزء ده

لم يذهب الرجل الى أن يستخدم قوته مع زوجته بالضرب او مع اخته او ابنته ألم يخلق له الله عقلاً ليستفيد منه ليخرج بأحسن النتائج، لم يستعيض عنه بما لدى الحيوانات من طبيعة همجية نوعا ما بدلا من استخدام العقل

بجد امتى يجي يوم يدرك فيه كل الرجل حقيقة كون المرأة انسان مثله
بوست جميل وفكرة جميلة
تحياتي لكيي

klmat said...

هبه
كل سنه وانت طيبه
البوست جامد وانا معاكى تماما
وطبعا التعليقات كلها قالت
اللى عايزه اقوله
البدايه من البيت لما الام تربى
اولادها على احترام الغير
والاولاد لما يشوفوا قدوه صالحه
من الاب والام
لكن الاباء مشغوليين بلقمه العيش
والاولاد شايفيين نجوم الجتمع والاغنياء
من المرتشيين والفاسدين
والاعلام مليان بافلام وكليبات
تجيب ورا
تحياتى لك واحييكى على اختيارك

coca said...

ياه موضوع كان واقف في زروي وكان نفسي اتكلم فيه
المشكله ان ناس كتير بيحط القدره في تابوه شكب بس يقلده
وكتييييييييير اوي بينسوا الروح
فمثلا الاقتدار بسيدنا محمد صلي الله عليه وسلم
من اروع الاشياء انك تقدي براجل زي دا بس هو بيقتدي بيه بطريقه متحجره شويه لسا الراجل مفتقد حته الاقتدار بروح الحب روح التسامح روح العفو
بوست جميل

3abdo me7tas said...

اولا ازيك يا ست هبه أخبارك إيه والواد يوسف العسل عامل ايه وطبعا الأستاذ يحي يا رب كلكم تكونو بخير باذن الله
ثانيا متشكرين اوى يا أم يوسف وعقبال كده يوسف ما يشتغل وربنا يوفقه باذن الله
ثالثا انا والله مش بخش نت كتير الأيام دى لان الشغل بخرج من 10 الصبح لغاية 10 بليل يعنى برجع مقتووووووووووول
رابعا بقى وده ردى على الموضوع
مش كل الناس يا أم يوسف بتعمل زى اللى انتى كتبتيه ده لا
فيه ناس كتير عارفه ربنا كويس وعارفه تعامل أهل بيتها كويس
انا مستغلطك فى حته واحده بس
انك كنتى تكتبى بعض الناس
مش سيباها مفتوحه على جميع الناس كده
اه فيه ناس كتير كده بس انا شايف ان حاليا الأكتر للناس اللى عارفها ربها وحقوقها فى البيت إيه
عشان الانسان بينتهى بس اللى بيفضل موجود سيرته وسيرته دى بتيجى عن طريق أولاده يعنى يقولك شوف ابن فلان الله يصلح حاله عمل شئ كويس و و و أكيد انتى فهمانى
ربنا يكرمك يا رب
وسلميلي على الواد يوسف العسل
أوكى
سلام بقى عشان انا تعبان وعايز أناااااااااااااااااام

3abdo me7tas said...

آه صحيح مبروك على الصورة
بس باين عليها مستوردة من بلاد بره عشان الختم اللى على ايديها
:P

تخاريف خاصه! said...

ازيكي يا دوبا..
معلش بقالى كتير ماجتش هنا...
الموضوع جامد جدا..جدا وفى الصميم يعنى...

موضوع القدوه مشكلته كمان مش بس انها معدومه...او مش موجوده..
لا ..
ده تلاقى الناس التعبانه متقمصه بقى دور القدوه...
اب طول اليوم داير يعنينى فى ساقيه الفلوس والام شرحه
مش فاهمين ان اسره يعنى ناس متجمعيين واعيشين فى بيت واحد ..المفروض الف باء الاسره انه يككون فى ود وتفاهم ونيه ان انا عايز اعيش فى مرضاه الله....
لو اتحددت بس النيه دى...
لاهتلاقى زوج بيضرب او بيهين مراته او حتى بيجرحها..
ولا هتلاقى ست ماشيه تحكى للناس كلها على مساوئ جوزها...

زائد طبعا الفتن الرهيييييييبه اللى محوطه الواحد من كل ناحيه....

ربنا يعين الكل يااااااااااااااااارب

son's egypt said...

السلام عليكم
طبيعة العلاقة بين الرجل والمراة جدليه من> زمن
ولكن الاسلام وجاء وحسمها وقال ان المراة ليست من العبيد تستعبد فقط وقال النبي رفقا بالقوارير اي النساء
ولكن للاسف غابت عنا كل ه>ه الامور واصبح الرجل في حالة ضيق مستمر
ولكن لا نريد ان عمم الموضوع فهناك رجال يحترمون المراة ويقدرون مكانتها بين الناس
ونتمني ان تعود الينا القدوة ونضع نصب اعيننا قول النبي علية الصلاة والسلام " رفقا بالقوارير"

Doba said...

آلام وآمال

اتمنى ان كل الناس ترجع تتمسك بالدين او على الاقل نحث من حولنا على ذلك

اشكرك وتحياتى

Doba said...

فى القلب

المرأة فعلا هيه المسئولة عن تعامل الرجل بهذه الطريقة وسأتناول المرأة تفيصلا فى بوست قادم باذن الله

وفعلا العنف ما هو الا ضعف شخصية
اشكرك وتحياتى

Doba said...

احساس برده حى

انا مش هقولك ان القدوة لازم يكون شخص لاننا عندنا الرسول كان قدوة جيدة جدا ولكنى ساعلق بانك من الممكن ان تاخد القدوة من المثل الجيد لكل شخص اقصد يعجبك تصرف هذا الشخص مع اهل بيته فيمكنك اتباعه والاخر يفعل شىء اخر وهكذا - اعتقد هو ده الاجتهاد مع النفس - الموضوع مهواش تقليد وخلاص

اشكرك جدا لمرورك وتعليقك
تحياتى

Doba said...

آلام وآمال

انا قريت اصلى فى التعليقات كتير قوى من الكلمة دى فمقدرتش امسك نفسى بقى

تقبل مرورى واشكرك
تحياتى

Doba said...

دكتور كسلان

اهلا وسهلا بيك وباول مرة فى المدونة والحمد لله انها عجبتك وكل سنة وانت بخير وعقبال منفرح بيك يارب ويرزقك بالذرية الصالحة

اشكرك وتحياتى

Doba said...

sendbad

حقيقى احنا بنفتقد الضمير من المجتمع
اتمنى اننا نصحى بقى

اشكرك جزيلا وسلامى لجيجى
تحياتى

Doba said...

كاميليا

اهلا بيكى صديقة جديدة للمدونات
وطبعا فيه الكثير والكثير من الرجال الصالحين واللى بنفتخر بوجودهم فى مجتمعنا واشكرك جزيلا على مرورك الكريم

تحياتى

Doba said...

أحمد سلامة

والله احنا بنحاول يا احمد اننا نعرف او نوضح للرجال كيفية التعامل بشكل اخلاقى متمدن

اشكرك جزيلا على مرورك
تحياتى

Doba said...

klmat

كل سنة وانتى طيبة يا صديقتى العزيزة
وانا معاكى فعلا البيت هو اهم عامل تربوى فى الموضوع طبعا واكيد ان الاب يكون قدوة حسنة بتفرق كتير فى انتاج شباب مثمر

ربنا يستر عالكل من الكليبات والقرف اللى مالى دماغنا

اشكرك لمرورك وتحياتى

Doba said...

coca

اول مرور وشرفتينى وياريت برده تتكلمى فى الموضوع تانى وتالت المهم اننا نتعلم من بعض

اشكرك كتير كتير
تحياتى

Doba said...

عبده محتاس افندى

اشكرك انا واسرتى الصغيرة على اهتماك بالسؤال علينا وربنا يقويك ويعينك على شغلك الكتير اللى من 10 ل 10 ده مش كتير كده يا بنى عليك - ان لبدنك عليك حق

عموما ربنا يوفقك ويكتر من امثالك يا محمد - بس والله انا قلت بعض مش كل لان بالتاكيد فيه ناس كتير جدا صالحين ومثال جيد جدا للمجتمع

اشكرك وتحياتى وسلامك هيوصل بإذن الله
وتصبح على خير خخخخخخخخخ

Doba said...

عبده تانى

انت منمتش ليه
المهم

الصورة دى عجبتنى جدا وحسيتها شايفانى قوى طبعا انا مستورداها من برده

تحياتى
خش نام بقى

Doba said...

تخاريف خاصة

اهلا بيكى وتنورى فى اى وقت بيتك ومطرحك

يا ستى الوحش بيطلع عالسطح بسرعة
بس فعلا ساقية الوقعى الاقتصادية اللى بنعيشها ليها دور كبير قووى فى غياب دور الاب عن الاسرة

حلوة قوى كلمتك دى
ان انا عايز اعيش فى مرضاه الله

ربنا كريم
اشكرك جدا على تعليقك
تقبلى تحياتى

Doba said...

son's egypt

يااااااااه
انت قلت كلمة جميلة والله نسيت اقولها
رفقا بالقوارير

والله تصدق مهقولك غير ربنا يبارك فيك بجد واشكرك لمرورك وتقبل تحياتى

بس رفقا بالقوارير دى محتاجة بوست لوحده هيه كمان - هنستناك بيه بقى

سلام
هبة

Anonymous said...

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

A片,AIO,AV,日本AV,色情A片,AV女優,A漫,AIO交友愛情館,線上A片,免費A片,A片下載,情色A片,微風成人,嘟嘟成人網,成人,成人影片,成人光碟,成人影城,成人交友,愛情公寓,色情聊天室,情色貼圖,色情,色情影片,做愛,情色,哈啦聊天室,聊天室,UT聊天室,豆豆聊天室,尋夢園聊天室,080視訊聊天室,080聊天室,080苗栗人聊天室,自拍,性愛

情趣用品,情趣用品,情趣,情趣,A片,A片,情色,A片,A片,情色,情趣用品,情趣用品,A片,A片,情色,情色

情色視訊,美女視訊,辣妹視訊,視訊聊天室,視訊交友網,免費視訊聊天,視訊交友90739,視訊,免費視訊,情人視訊網,視訊辣妹,影音視訊聊天室,視訊交友,視訊聊天,免費視訊聊天室,成人視訊,UT聊天室,聊天室,豆豆聊天室,色情聊天室,尋夢園聊天室,聊天室尋夢園,080聊天室,080苗栗人聊天室,上班族聊天室,小高聊天室

will said...

情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品

情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品

情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品,情趣用品