Sunday, November 4, 2007

سؤال لكل إمرأة

لكل منا ديانته ولكل منا آرائه ومعتقداته ولكل منا طبيعه تربية ولكل منا ظروف معيشة واحتياجات
====
تكملة لمناقشتنا فى الطبيعة الجدلية بين الرجل والمرأة نتناقش اليوم عن المرأة بما لها
من حقوق ومن قبلها الواجبات التى يجب عليها أن تؤديها قبل المطالبة بحقوقها
==
المرأة ذلك الكائن الضعيف القوى
حباها الله بنعمة الأنوثة وما بها من دلال ونعومة وحباها أيضا بعقل راجح نوعا ما تستطيع من خلاله أن ترعى زوجها وتربى أسرتها وتحافظ على كيان الأسرة كصرح ثابت مترابط الأركان
خلقت المرأة لتكون مصدر سعادة للرجل وسكن له ومودة ورحمة
وخلق الله بينكما ميثاق غليظ
سأبدأ بالبنت الآنسة غير المتزوجة فى هذه الأيام والتى يأتى إليها الشبان كثيرا للتقدم لخطبتها وهى ترفض وكثير من هذه الأسباب تافهة للغاية أما تعلم قول الرسول صلى الله عليه وسلم من جائكم من ترضون دينه وخلقه فزوجوه
أى لابد لها من الاختيار والاختيار بعناية فهى ان ارتبطت بمن هو معتدل دينيا وخلقه حسن كسبت الحياة الدنيا وان كانت حسنة العشير له واكتسبت رضاه كسبت الآخرة
-
بدأنا بالاختيار والآن بالتنفيذ
==
بعث الله لكى بنعمة الزوج والحبيب والصديق والعشيق والوالد لاولادك
أفلا يستحق منكى الكثير والكثير للإعتناء به وبمتطلباته ولتعلمى انها ليست بالكثير فبالحب تستطيعى أن تبثى الحب لكل من حولك
-
فهو لا يرغب الا بمن تبثه الحب والرضا وتكون له ملاذ من صراعات الحياة ليختبىء بين ذراعيها عن كل هموم الدنيا فما بالك ان أصبحتى أنتى الآخرى صراع من ضمن هذه الصراعات بالتأكيد سيفر هاربا من هذه الحياة العقيمة
-
نتكلم بالعامية شوية لو سمحت
-
كل واحدة مبقاش عندها غير التضرر وخلاص لازم تقعد تنكد على جوزها وتمسك فى الحاجات اللى بيقولها غلط واللى بيعملها غلط وتقعد تعيد وتزيد وتكبر فى النكد ولو مبتحبش أهله تولعها عليه حريقة - طيب ليه - ده بالكلمة الحلوة ممكن تكسبى كل اللى حواليكى وتضمنى ان معاكى قلوبهم
-
فين انك تخليله بيته جنة فى الارض انك تستقبليه احسن استقبال وانك تقعدى تتكلمى معاه وتهونى عليه وتأكدى انه حتى لو قلبه حجر بالكلمة الحلو والاهتمام المناسب هتلينى وتكسبى قلبه وعقله كل واحدة تقعد ترغى مع اصحابها وتقعد تتشكى وتعاتب وتلوم على جوزها - متعرفيش ان الشيطان هو الملك فى القعدة دى وانه يهمه انه يخسر كل واحدة بيتها وان طول مفيه خناق وقرف فى البيت هو سعيد ومبسوط
==
إلى كل امرأة
أرجوكى
==
إرتدى أحسن ثيابك وأغلاهاه على الاطلاق فان زوجك أحق برؤيتك هكذا عن الآخرين
-
أحسنى أخلاقك بالتقرب الى الله وحسن طاعته والتشبث به والتضرع إليه عند الصعاب
-
زينى بيتك وطريقة تقديم مأكولاتك
-
قابلى زوجك دائما بابتسامة فهى بكل الاحوال صدقة
-
أطعميه بيديكى فان بكل لقمة صدقة وبكل كلمة طيبة صدقة
-
إستمعى إليه فنحن بزمن صعب يكثر فيه الضغوط
-
كونى حسنة القول وذكريه دائما بان لنا الله الذى لا يغفل عن مخلوقاته
-
كونى حريصة على ماله وعلى نفسك ولا تفعلى الا ما يرضيهولتعلمى ان نوم زوجك وهو غير راضى عنك يجعل الملائكة تلعنك من المساء وحتى تصبحى
-
استعيذى سيدتى من الشيطان دائما وكونى قوية لتستطيعى مباراته فى الحياة حتى تصمدى أمامه وكلما آتتك المشاكل والصعاب فلتأخذى قرارك بأنه مهما كانت الضغوط قوية فانتى قادرة على الصمود أمامها ولا تسمحى للنكد والمحن ان تقف او تحول دون سعادتك فى رضا الله ورضا زوجك وان تكونى دائمة سعيدة راضية بما يرزقك به الله
---
أوصيكى بتقوى الله فى زوجك
وفى نفسك
وفى أولادك
==
وللحديث بقية عن تربية الأطفال

53 comments:

Yahia said...

اول تعليق الحمد لله

كل الحكم دي جميله جدا وصعبه جدا

دايما الناس كلها بتنسى الخير فين

بس ربنا يهدي الجميع

على باب الله said...

بوست جميل جداً

لكن أسمحيلي أدي شيء من العذر للآباء اللي بيتقال كتير اليومين دول أنهم بيضيقوا الخناق علي العريس و بيدفنوه تحت
طن من الطلبات و المعايير

الناس دي صدقيني معذورة جداً

هي تريد الأفضل لبناتها .. زينا كلنا

و بتفكر كتير .. يا تري الإنسان ده ها يقدر يعيشها في نفس المستوي الإجتماعي اللي كانت عايشه فيه معانا و لا لأ

و يا تري أبواب المستقبل مفتوحة و لا لأ بالنسبة للعريس أنه يحسن من مستواه و مركزه

--

لكن طبعاً المفروض الحالة المالية للعريس ما تبقاش هي المعيار الوحيد للأختيار

يعني كل شيء بالعقل كويس

---

أتمني لك التوفيق

mohand said...

السلام عليكم

اوصيكي بتقوي الله في زوجك

دي بالمعاني كلها

تحياتي للروعه دي

shahy said...

كلامك جميل زيك يادوبة
وهو طبعا صعب التنفيذ شوية لان
الزوجة بيبقى عندها مشاكل اولادها و وجع الدماغ طول اليوم مع العيال واللي بيلعب واللي ضايق مش عارفة مين
دة غير مشاكل الاهل والاحباب
وانا شايفة ان النكد دة بيبقى طبع في بعض السيدات حقيقي في ناس بتيقى عاوزة كدة
بس لو الواحدة حطت في دمغها انها تتغير هاتقدر

انتي عارفة في سيدات بتخاف تشكر في ازواجها قدام حد ودة اكيد علشان الحسد فتقعد تقول : دة قرفني ...دة انا عايشة معاه علشان خاطر العيال... يعني حاجات من دي

ربنا يهدينا ويهدي كل فتاة وسيدة

يارب كل اللي يقرا كلامك يستفيد بية ويحاول ينفذة
جعلة الله في ميزان حسناتك
ودايما عامر

رحــــيـل said...

موضوع هايل بصراحه
وبما انى لسه متجوزتش
فبصراحه اكتر حاجه شغلانى وشايفه انها فعلا مشكله
الاختيار
ثم الاختيار
ثم الاختيار
وبعد كده ربنا يسهل
خالص تحياتى لك
على اختيار مواضيعك

a Dreamer with feet on the Floor said...

very Good advices,,but as it is said( Easy 2 say hard 2 do) R U married...do U do that with Ur husband,,
R Not U married...do U guarantee that U can do in Ur future with Ur man what U advice people 2 do naw...
I hope U can ..as If a woman like that Excists...Her husband will B her slave with his free willings..
I wish U that happiness.

الطائر الحزين said...

جميل
مازلت مغرم بوصية هذه الأم لاينتها
امامة بنت الحارث

http://www.sunna.info/Lessons/islam_719.html
تحياتى

Misrdream said...

مبروك المدونه وبالتوفيق

احساس لسه حى said...

عزيزتى
كلامك جميل اوى بس ليه ملاحظتين الاولى
مبقتش البنات دلوقتى ترفض بسهوله عريس علشان حالة العنوسه الموجوده فى البلد بس المشكله الاهل دايمن معقدين الدنيا ومش عاوزين راجل اقل منهم ماديا ولا اجتماعيا وكمان اللى حولينا اللى بيخلى البنت ترفض عريس علشان محدش يقول انها واخد واحد اقل منها ده بخصوص البنت
اما الزوجه برضوا عندها مشاكل يا زوج متحجر المشاعر وتعبها ومهما تحاول ترضيه مفيش فايده يا اما الحاله الاقتصاديه اللى خنقه الناس ومخليه الزوجين اعصابهم مش مستحمله
بس احب اقولك زوجات المصريين جدعات اوى وحمالين قسية ومهما كنا بنسمع عن مشاكل بين الازواج فالغالبيه عندهم مشاكل كبيره اوى ومستحملين
موضوع جميل بس محتاج كلام كتيييير
سلام

Anonymous said...

هوووووووووووووووووبة ارفع قبعتي احتراما لكلماتك الي في الجون واسال الله ان تجاهد كل انسة او زوجة لتعود نفسها عليه اعلم تمام العلم ان هذا الامر ليس بالهين ويحتاج الي بذل الكثير من اجل ان نصل اليه من اجل ان نصثل الي رضاء الله وهذا كفيل بتحمل كل المتاعب التي توجهنا وعجبتيني قوي في قولك الكلمة الحلوة بتلين اي قلب ومعاكي قوي في القول ده وعن تجربة بجد بوست من اروع ما كتبتي حفظكي الله لنا اختا وصديقة تمدنا بالمفيد الدائم سائلة الله ان اتحلى بهذا

Anonymous said...

موضوع رائع اكيد كتير هيستفيدو منو
بس احب اقولك يادوبا بالنسبة للبنات اللي بترفض العرسان اكيد البنات دي عايزة الاستقرار والرفض مش بمزاجها بس على الاقل تلاقي الشخصية اللي تناسبها واللي ترتاح ليها بدايتها تكون القبول والتكافؤ لابد منو ... بالنسبة للمتزوجين ياريت كل زوجة تعمل النصايح بتاعتك دي بس بردو عشان تعرف تتقنها كويس لازم تلاقي زوج يساعدها علي كده

تحياتي

أبوسويلم said...

أقول أيه بس
فعلا هى دى النصائح اللى المفروض كل فتاة تسمعها وتعيها جيدا وتطبقها
واكيد هتسعد فى حياتها وهتسعد زوجها
تدوينة جميلة وكلمات موفقة جدا
تحياتى
والسلام

ody911 said...

دودا


بجد أشكرك على المعلومات والنصايح المهمة لكل بنت وست


بجد بالطريقة دى بس هنعرف المقبلين على الزواج بجد إزاى يتعاملوا وإزاى جوازهم ينجع

شكرا حقيقى وأول زيارة ولقيت مهم بجد إنى أعلق وأشكرك


وعادى بقة
أودى

كاميليا بهاء الدين said...

استعيذى سيدتى من الشيطان دائما وكونى قوية لتستطيعى مباراته فى الحياة حتى تصمدى أمامه وكلما آتتك المشاكل والصعاب فلتأخذى قرارك بأنه مهما كانت الضغوط قوية فانتى قادرة على الصمود أمامها ولا تسمحى للنكد والمحن ان تقف او تحول دون سعادتك فى رضا الله

دوبا
وقفت كثيرا امام هذه الجملة لأقارن بين كلماتها ومااحاول ان افعله فى الفترة الحالية
انا حاليا اقوم بتغيير كل شئ حولى, حترى المكان ساغيره, كل شئ , حتى ابدأ من جديد, واعود كما كنت قوية ومتفائلة وسعيدة, واطوى الصفحة المحرقة تماما من حياتى

لك تحياتى
كاميليا

Soooo said...

كلاام جمييييييييييييل
بس سوري .. كلام انشا

نتكلم بالبلدي .. والبلدي يوكل
انا لي اربعه صحاب انتيم
من ايام ثانوي
والحمدلله كلهم عارفين ربنا
والحمدلله ظروفهم معقوله
اقولك حاجه
الاربعه دول .. اتنين منهم طلقو ستاتهم .. وواحد على وش طلاق .. والرابع قبل ووافق ان الحياه تمشي .. بس بشروط كتير زي انه مايروحش لاهله ايام الاجازات ويقضيها مع اهلها .. وزي انه مايروحش يصلي في الجامع ويكتفي بالصلاه في البيت ولو اتأخر بعد صلاة الجمعه بتبقى في مشاكل .. ولما بنقوله انت مستحمل ازاي .. يقول عشان الولاد .. وعشان ما يحصلش زي مابيحصل ما فلان وعلان .. واللي هم صحابنا ومش بيعرفو يشوفو ولادهم بسبب مشاكل الرؤيا وكده

تقدري تقوليلي .. ليه؟؟
بلاش ليه دي عشان انتي وكل الناس هتقول كل واحد وليه ظروفه

طب تقدري تقوليلي .. لما واحده تسجل مكالمة لجوزها وهو بيشد مع والده في الكلام .. وده بيحصل عادي ان اي واحد يشد مع والده في الكلام .. انما اللي مش عادي .. انها تسجل المكالمة دي لجوزها وتروح لاهلها وتقولهم اهه .. ادي جوزي اللي انتو بتقولولي استحمله .. ابن عاق وبيتخانق مع ابوه
!!!!!!

واحده تانيه .. بتصحي جوزها يوم الجمعه الساعه 7 الصبح يا مؤمنين .. مع العلم انه في ايام الشغل مش بيصحى قبل الساعه 9 الصبح .. مراته بتصحيه الساعه 7 الصبح ولما قالها في ايه مصحياني بدري كده ليه قالتله عشان ماما جايه تتغدى معانا وعايزاك تساعدني في تنضيف الشقه .. قام هو قالها وهو نايم على روحه طب خليها كمان شويه تعبان وعايز انام ساعه ولا حاجه .. تقوم تقوللو تنام ايه نامت عليك حيطه
!!!!!
بلاش كوووووول ده .. واحد بيحب واحده .. وعادي الحياه بيس وفل مابينهم ومستني ظروفه تتحسن شويه عشان يتقدملها وكده .. لما اتزنق شويه في الشغل لقاها بتتصل بيه بتقوللو انت نسيتني ومش عارف ايه .. قاللها ابدا بس انا مشغول وعايز اثبت نفسي لغاية ما اقف على رجلي وكده .. تقوم تقفل السكه في وشه
لما اتصل بيها قالتله انا كنت باهزر .. وبعدين انت اصلا ماعندكش دم عشان تنساني الفتره اللي فاتت دي

طب ايه يعني
لا بجد ايه
لما تقفل السكه في وشه بهزار .. وتقوللو انت ماعندكش دم .. وهنمشيها انها قالت كده في هزار برضه
ايه اللي يضمنه انه لو اتجوزها مش هتقوللو نامت عليك حيطه زي الاخت اللي قالتلها لجوزها
ولا ايه اللي يضمنه انها مش هتتلكك ليه وتسجللو اي حاجه وتروح توريها لاهلها عشان تقولهم ادي فلان اللي بتقولو عليه كويس

بصي يا دوبه
انا عن نفسي واحد شايف ان مافيش حاجه اسمها حب .. ومش شايف انه في لازم للجواز دلوقتي واحنا اصلا مش طايقين ولا قادرين نعيش عيشه محترمه

موضوعك جميل .. ممكن يكون يفيد البنات والشباب والحياه
بس انا لي دماغي .. وانتو ليكم دماغكم


سلامووووووووز

بتاع العسل said...

بعد السلام

جزاك الله كل خير على النصائح
ال بتقدميها للناس
ولو كل الناس عملت بها
اكيد حال المجتمع هيتغير
وينتشر الحب والامان

تحياتى

Anonymous said...

احنا دائما وابدا عارفين الصح والغلط ورغم كده بنختار غلط ليه منعرفش

simple girl.. ..simple dream said...

كل كلمة قولتيها بتصب فى كبد الحقيقة
فعلا انت طرحتى افكار كتير بداية من تقدم العريس حتى معاملة الزوج
دوبا كلامك فى الصميم
بوست هايل مووت

klmat said...

السلام عليكم
نصائح جميله جدا وفيها كل الحكمه
بس النصائح دى ممكن تبقى للرجل والست
الزوجه من حقها ترى زوجها مهندم
ومهتم بمظهره والطرفين بيعانوا
فى الحياه الصعبه
مطلوب من الطرفين
التعاون والموده واللين
فى المعامله ايد لوحدها مااتسقفش
واعتقد ان المرح والنكد
استعداد شخصى فى رجاله بردوا نكديين
اما بالنسبه لطلبات الأهل من العريس
اعتقد انها قلت لعزوف الشباب
عن الزواج للغلاء
وطبعا انا شفت نصايحك للرجال هائله
احييك على مواضيعك الشيقه
تحياتى لك

الربان said...

تحياتي

موضوعك جميل و عقلاني...و أشكرك عليه.

المشكلة في رأيي ان بعضنا عنده مشكلة اسمها الندية...يعني زيي زيه...انا مش اقل منه...

و العلاقة الزوجية علاقة معقدة و سهلة في نفس الوقت...لو كل من الطرفين جعل همه اسعاد الاخر...دون النظر لاي اعتبار أخر...

الرجل سيسأل عن زوجته و ابنائه..و كذلك الزوجه...

العلاقة بين الرجل و المرأة ليست صراع و لكنها علاقة تكامل و تفاعل....تبدأ بالحب و تدعم بالمودة و الرحمة الي انت تستقر علي كونها سكن.....

ربنا يهدينا جميعا و ينور لنا بصيرتنا و يعلمنا ما ينفعنا و ينفعنا بما علمنا....

تحياتي و تقديري

Ehab said...

والله برافو عليكي يا هبه

ياريت فعلا كل بنت تدور على اللي يحسن حياتها مع جوزها
وياريت لما تختار تختار صح

ولو ان معظم الحاجات الي بتقولي عليها دي
بتحصل بسهوله قوي من الزوجه لو بتحب زوجها فعلا
ولو هو حسسها انها فعلا مهمه عنده
لكن مش عارف ليه كتير من الجوازات دلوقتي بتبدأ بحب وعاطفه حلوين قوي
وبعد الجواز تلاقيهم زهقوا
كأنهم بقالهم سنين متجوزين مع انهم بيكونوا معداش عليهم سنتين تلاته

حاجه غريبه
بس جايز لأنهم مبيفكروش في حكاية ان كل شيء محتاج عنايه
الحب قوي طبعا لكن برده محتاج رعايه واهتمام
محتاج منهم هم التنين يحافظوا عليه
مينفعش طرف واحد يحاول والتاني واقف بيتفرج

ما علينا
ربنا يوفق الجميع

ادعيلي في جوازي اني اكون زوج صالح

سلاااااااااااااااااااام

Unknown said...

يسلم فمك يا هبه
ايوه كده الله يكرمك اديهم
على الله يوصلهم حاجه
مستنيه تربية الاطفال لانى بدور فى الموضوع ده دلوقتى
بعد العدة قبل ما اتأهل للجواز والذى منه

سندباد said...

ربنا يجزيكي خير موضوع ممتاز فعلا
ربنا يجعله في ميزان حسانتك ونستفاد كلنا منه
تحياتي

حبة حاجات (ايمان) said...

اصعب قرار ممكن ياخده البنى ادم هو الارتباط والجواز
الاختيار ابـــــــــــــدا مش سهل

محتاج معجزه عشان تقدرى تحكمى على اختيارك اذا كان صح ولا لا

تحياتى ليكي

kikooooooooo said...

بوست جاااااااامد موووت
أنا عجبني حقيقة طريقتك في الكلام لأنك كلمتي كل البنات في كل الأعمار
أي واحدة هتقرا البوست ده هتحس إنه متوجهلها
علي فكرة أنا ولد مش بنت لاحسن تلخبطي ولا حاجة بس أنا عجبني البوست بجد
كان معكم ..,
كيكووووووو

محمد على ..هي كده said...

بوست جميل حقيقى


اول مرة اجى هنا بس مش الاخيرة ان شاء الله

جميله اوووى السلسله دى ربنل ينفعنا بيها

Hannoda said...

أعتقد ان كل امرأه هي أنا
و أنا أتمنى أن أسعد زوجي و أرتقي ببيتي و أنت منه ثمارا طيبة لوطني
فنلقى كلنا ربي .. راضي عنا و راضين عنه

هذه أحمي
يقدرني عليها حبي.. وسلامي مع نفسي و مع الدنيا و مافيها
و رباطي مع ربي

ان إمتلكتهم
فما أسهل ما تدعو اليه تدوينتك
و ان تشوهوا- وما أسهل أن يشوهوا- فهو صعب جدا

تحياتي

ما علينا said...

ربنا يجازيكي خير بكل نقطة في التدوينة دي

ولا أروع ولا اجمل من ذلك ممكن ان يقال

تخيلي لو ان الجميع عمل بنصائحك
وكذلك الزوج
وكل فرد
تخيلي لو كل انسان اتقى ربنا في اهل بيته وصلة رحمه وجيرانه

ياه دي الحياة كانت تبقى جميلة جدا
جدا


جزاك الله كل خير
وجعلها في ميزان حسناتك

البِـئرُ والظمّأْ said...

سلام الله عليكي

هوبا
ازيك الاول يا رب تكوني بخير
بصي كلامك سليم قوي و يا رب كل واحد يقدر ينفذ ده بجد



تحياتي ليكي يا قمر
زيزي

جنة said...

وماله اسألى كل مرأة لكن خدى بالك فيه فرق بين النظرى والعملىوعلى العموم ربنا يوفقك ويكون كلامك كأفعالك

قلب يحترق said...

سعاد ة الانسان في دنياه و آخرته بتقوي الله
ان اتقي كل انسان الله في كل من هم حوله أعتقد أن ذلك الانسان سيتذوق طعم السعادة التي أصبح تعملة نادرة هذه الايام و سيعرف الجنة علي الأرض قبل بلوغها عند الله سبحانه و تعالي

أحييكي علي البوست الرائع

NeRmeeN said...

طبعا يا دوبا كلامك مية و مية...وكلام واحدة اصيلة فعلا

بس نفسى حد يعمل بوست عن واجبات الزوج بردو...مش عارفة ليه بنلاقى مية 100درس عن ان ازاى لازم الست تكون كويسة و هادية و كل الصفات الحلوة فيها..فى الوقت اللى مش بسمع نص الكلام ده بيتقال عن الزوج...يعنى لما راجل يشتكى من مراته...الدنيا كلها تقوم وماتقعدش...ودى ست مش عارفة ايه...دى نكدية دى مش بنت اصول...ومش بعيد ينصحوه يطلقها او يستحملها عشان العيال و يتجوز واحدة تانية...لكن لو الست اشتكت او فتحت بؤها

معلش استحملى..اهو برده تعبانوشقيان..كان الست قاعدة طول النهار رجليها فى مية و ملح..مش بتشتغل عشان تساعده فى مصروف البيت و تاخد بالها منه ومن احتياجاته جوه البيت....ويقعدوا بقولوا انتى بردو حاولى تغيرى من نفسك ..وخدى بالك من منظرك ..غيرى فى شكل البيت و الاكل...وكان الست دى آلة ماعندهاش دم ولا كرامة

انا معاكى ان فى ستات نكدية و بتفتكر لجوزها الوحش بس والرسول عليه افضل الصلاة و السلام قال علينا

يكفرن العشير

لكن بردو اكيد المعاملة اللى الست بتلاقيها من جوزها فى بعض الاحيان بتخليها كده او بتساعد على انها تكون نكدية ومش مهتمة بنفسها

انا شايفة ان كل واحد من الزوجين يتقى الله..يعنى زى ما ربنا امر المرأة على زوجها...الرسول عليه افضل الصلاة و السلام وصى الرجال قبل ما يتوفى ...وقال رفقا بالقوارير...وقال خيركم خيركم لاهله وانا خيركم لاهله

صدقت يا رسول الله

لكن صدقينى يا دوبة ...الست مهما حاولت تكون تعامل ربنا فى جوزها و تكون كويسة.....لازم بردو جوزها يديها معاملة حلوة..ويحترمها...اى حاجة من طرف واحد بس مش بتستمر و تدوم

سورى على التاخير

تحياتى ليكى يا دوبتى

Anonymous said...

ممكن أستغل المساحه دى واعمل اعلان صغير
16 نوفمبريا جماعه..مستنياكو يوم الجمعه الجايه الساعه 8 م..قاعة الحمكمة بساقية الصاوى
هانتقابل ونحضر حفلة لفرقة أيامنا الحلوه..واحده من اكبر التجمعات البلوجرية المهمه
تعالوا وقولوا للحبايب

قطوف said...

والله ما هو نفاق
بوست حكايه وهادف جدا
انا أحييك على النصائح الغاليه دى
أنا دارس مجال أسرى بس مدرستوش بالسهوله دى
نصائحك دى ياأستاذه هبه المروض تتوزع على كل البنات فى الجامعات
أسلوبك تحفه فى إلفاء النصايح
وتسلسك فى الموضوع عجبنى
بجد انا مهما أقول مش واحد زى انا
يقدرك
بكرر إعجابى بالبوست
وأرجو منك زيارة مدونتى
رأيك يهمنى جدا على البوست الاخير عندى

سها السباعي said...

جميل جدا
هي المساله كلها تتلخص في كلمتين
حب لاخيك ما تحب لنفسك
يعني لو انا وحشة مع جوزي واهله في الكلام والمعاملة
ارضى انه يعاملني بالمثل؟
لو انا باشتكي منه لطوب الارض
انا بقى اللي كاملة مكملة؟
كلنا له حقوق وعليه واجبات
ولو اتقينا ربنا بجد في ازواجنا وزوجاتنا واهلنا واولادنا
مش هيكون فيه اي مشاكل والنماذج كتير

فاكرين وصية اعرابيه لابنتها ليلة زواجها؟

تحياتي للبوست الجميل

سها السباعي said...

لو سمحتيلي انا نزلت بوست له علاقة بنفس الموضوع واشرت لتدوينتك فيه لانك الهمتيني اكتب فيه
وكان الموضوع بالصدفة مناسب للسياق
فارجوا السماح لي مع خالص الشكر

فى القلب said...

الله يا دوبا بوست جميل أوى أوى

أولا بعتذر عن التأخير فى التعليق

بصى يا ستى لو كل أمراه عملت كده فعلا فعلا سوف تعيش فى سعاده و هناء

بس يا ريت بعد ماتعمل كل الى قلتى عليه تكتبى بوست للراجل أزاى يرض لمراته جزء من كل

مدحت محمد said...

اولا السلام عليكم
برافو عليكى انك تكلمتى عن واجبات المراة والله
بس انتى شاعرة بجد
عجبتنى اوى الجملة وانتى بتقولى
وتكون له ملاذ من صراعات الحياة
ليختبىء بين ذراعيها من كل هموم الدنيا
التعبير جميل اوى
والاسلوب رائع
وممتع
بجد تحياتى ليكى

hoda omran said...

جميل جدا
بس انا قريت مقولة قبل كدة بتقول ان المرأة النكدية سببها الزوج
افعال الزوج اللى الست مش بتقدر تواجهه بيها بتفرغها عن طريق النكد

وأكيد سبب الفشل مش المرأة بس
اكيد الراجل ليه دور ودور كبير كمان

Doba said...

Yahia

نورتنى بأول تعليق يا غالى
هيه طبعا صعبة جدا

بس دايما الوصول للحول والصعب مش بالساهل ولا انت رأيك ايه

يارب يهدى الجميع فعلا
اشكرك وتحياتى
-----------------


على باب الله

أشكرك على تعليقك
بس زى مانا عاوزة الافضل لبنتى يبقى مختارش واحد عنده شقة بس اخلاقه تبقى زفت يبقى انا كسبت ايه لبنتى - اربع جدران من الاهانة والالم

امنياتى لك بكل التوفيق
تحياتى
----------------

mohand

اشكرك على تعليقك يا مهند وبالطبع لو كل شخص اتقى ربنا فى اللى بيعمله هيكون افضل حاجة - سواء فى العمل او مع زوجته او فى عمله او المرأة فى الحفا على بيتها واسرتها وراحة زوجها

لك منى كل التقدير
تحياتى
------------------

shahy

شكرا يا أبلة شاهى والحمد لله ان البوست عجبك وطبعا هو صعب التنفيذ بس رضا ربنا أعظم وأحلى

مع كل احترامى ليكى بس ربنا أعطى للمرأة القدرة على استيعاب الكثير من المتاعب والصعاب ومشقات كتير - اقصد انه تقدر جدا توفق بين جوزها وولادها وبيتها بس الموضوع محتاج تنظيم شوية وسعة صدر وقلب محب

وبالنسبة للى بتقعد تتشكى فى جوزها وخايفة من الحسد فلازم تتأكد انها زى مبتسمع كلام الشيطان فى القاعدة دى هتروح تلاقى الشيطان مستنيها فى البيت

العقل والحب مبيتجزأووووش كلهم على بعض يا تحب يا تكره

ربنا يهدينا جميعا للخير والصواب
اشكرك حقيقى على تعليقك

تحياتى
-----------------

raheel

ربنا يوفقك يارب ويرزقك بالزوج الصالح وزى مقلتى اهم حاجة الاختيار ولكن أوصيكى بصلاة الاستخارة قبلها - دى خير ربنا باعته لييكى عشان تعرفى الخير فين

اشكرك لمرورك
تحياتى
---------------
a Dreamer with feet on the Floor

أشكرك على تعليقك
هو فعلا الكلام سهل والتنفيذ صعب جدا جدا واكتر مما تتخيل - انك تحافظ على نفسك من النكد والقرف والملل ده مش سهل ابدا وبالطبع اوقات بتنجح وبيبقى شىء جميل للغاية واوقات تانية بتفشل - بس مدام فى عقلك الاساس هو انك تكون سعيد يبقى هتقف على رجلك بسرعة وتبص لقدام - مش هتقعد تبكى على اللى فات

انا متجوزة اه - وعندى يوسف 3 سنوات والحمد لله بعمل كده مع جوزى على قد ميقدرنى ربنا - لانى بخاف انه ينام غضبان عليا - انا بحبه جدا واحب انى دايما اشوفه سعيد وفرحان ومش قادرة اقولك انى لما بلاقيه متضايق ساعتها بس بحس ان الدنيا وحشة ولازم نتعامل مع مرها

اشكرك حقيقى على تعليقك ومرورك
تحياتى
---------------------
الطائر الحزين

الوصية دى من احسن ما سمعت حقيقى جميلة وكل ما فيها لا يعلى بعده اى كلمة

اشكرك وتحياتى
---------------
misrdream

الله يبارك فيك بس ده انا بقالى كتير
بس كل سنة وانت طيب عموما

اشكرك
--------------
احساس لسه حى

اشكرك على تعليقك جدا
مفيش حاجة اسمها مبقتش ترفض عريس علشان العنوسة - انا لو الشخص مش هيتناسب معايا هاخده ليه - هخف اعنس - مع احترامى ليك ده اكرملها بدل متاخد واحد يبهدلها - وحتة انه يكون اقل ماديا - مع احترامى كل اب وام مبتدوش السلم من اخره - عنى لازم كل ام وكل بنت تعلم بنتها ازاى تقف مع جوزها علشان تطلع معاه السلم خطوة خطوة والا هتكون فين المشاركة

الزوجات المصريات اه كتيرمنهم حلو جدا وفيه برده للأسف كتير بيعشقو النكد

بس زى مالواحد بيتكلم عالمرأة - الراجل برده لو سىء فبتبقى الحياة بشعة ولا تطاق - ايه هيتبقى للست لو فقدت الحضن الدافى والكلمة الحلوة

اشكرك جدا
تحياتى
--------------
قلوب حائرة

الله يخليكى هاتى القبعة احسن الشمس حامية هنا قوى

يا بنتى ده كلام العقل والدين والمنطق - هو انا جايبة حاجة من عندى - احنا بس الى بننسى ولازم من وقت للتانى نفكر بعض وطبعا بالكلمة الحلوة هنكسب كل القلوب المتحجرة بس الصبر عليها والتعامل باللين

تحياتى وعقبال مفرح بيكى يارب
---------------
أيامنا الحلوة

انا معاكى والله يا برنسيسة فى كل اللى بتقوليه - المهم انه يكون عنده المقدرة انه يصونك - انا بتكلم عاللى بيرفضو بشكل ولأسباب تافهة

عقبال مفرح بيكى انتى يا ام قلب دهب
سلامى لبكبوزة

ههههههههههه

تحياتى
-----------------
ody911

اولا انا اسمى دوبه مش دودا
ثانيا نورتينى بمرورك
ثالثا الحمد لله ان البوست عجبك ويارب يفيد الكل

تحياتى
-------------
كاميليا

حقيقى وحشتينى
بجد كل يوم روح اتطمن عليكى ومش بلاقيلك جديد - ياريت تطمنينى عليكى

نفسى اتعرف عليكى اكتر لو تسمحى
لو لا ياريت بس تطمنينى مش اكتر

اتمنى فعلا انك تكونى غيرتى كل حاجة من حواليكى وبقيتى احسن وافضل

نورتينى
تحياتى
-------------
soooo

المشاكس دائما وابدا
فاكر الكرتون بتاع كعبول - انا بحس ان انت فعلا كعبول - حد قاعد ياكل ومأنتخ وبكرش وبيشاكس فى كل اللى حواليه

اوعى تزعل انا بهزر معاك والله

نرجع لموضوعنا

والله يا بنى كلامى مهو كلام انشا بس انا عاوزة اعرف انت يا بنى كل اصحابك كده ولا ايه

يعنى ايه واحدة تصحى من نومه وتقوله نامت عليك حيطة ولا كل الامثلة اللى انت اديتها دى

مع كل احترامى ليك انا حواليا كتير متجوزين ومحترمين جدا جدا فى جوازتهم والحمد لله انا واحدة منهم - اه الحياة صعبة ومش بالساهل الواحد هيعيش سعيد على طول لظروف مجتمعنا ولكن للأسف انا شايفة ان يقما اصحابك مش رجالة صح - اللى يوصل ان مراته تسجله ولا تصحيه بالشكل ده - او اختيارهم للستات كان سىء سىء للغاية

مفيش ست محترمة حتى ولو وصل الأمر للطلاق انها تحرم اولادها من انهم يشوفو ابوهم وسيبك بقى من موال القانون بتاع الرؤية ده لانه سخيف وارجع واقول مهى كده بتربيهم غلط يبقى لما بيكبرو هيكونو ايه

كل واحد ادرى بظروفه ولما اخدنا قرار الجواز انا وجوزى قررنا اننا نتلاشى عيوب الآخرين وعيوبنا اه هو مش سهل بس على الاقل بنحاول نعيش بما يرضى الله ونتق ربنا فى بعض

لو فكرت انك تتجوز - اوعى اوعى تتجوز جوازة والسلام لان اللى بيخلى الواحد يمشى فى حياتى هما حبة الحب والمودة اللى فى قلوبنا لبعض

اشكرك يا سوووو جدا على مرورك وتعليقك وغصبن عنك - عقبال مفرح فيك

تحياتى
----------------
بتاع العسل

وعليكم السلام
اشكرك حقيقى والحمد لله ان البوست عجبك واتمنى ان اى حد يستفيد بيه

اشكرك لمرورك
تحياتى
---------------
رئيس جمهورية نفسى

مش عارفة بالظبط بس اعتقد انه الشيطان - هو اللى دايما بيشدنا للحماقات

اشكرلك مرورك
تحياتى
---------------
simple girl.. ..simple dream

اشكر جقيقى والحمد لله انه عجبك ويارب اى حد يسفتيد واولهم انا

اشكرك وتحياتى
----------------
klmat

بالطبع الحياة ما هى الا مشاركة وحب ومودة ودفء بس الاساس يبقى صح وبعدها يكتمل البنيان على قواعد سليمة

اشكرك جزيلا لتعليقك الجميل ولمرورك
تحياتى
--------------
الربان

اشكرك لمرورك ولتعليقك
موضوع الندية ده محتاج بوست لوحده لانه موضوع شائك جدا وللأسف كل واحد مش بيفهم اللى ليه واللى عليه صح

كلمتك دى جميلة جدا وفيها كل حاجة


العلاقة بين الرجل و المرأة ليست صراع و لكنها علاقة تكامل و تفاعل....تبدأ بالحب و تدعم بالمودة و الرحمة الي انت تستقر علي كونها سكن.....

ربنا يهدينا فعلا جميعا لما فيه الخير والصواب

تحياتى
--------------
الشنكوتى الكبير

جميل قوى انك أثرت موضوع ان كل حاجة حلوة محتاجة عناية ورعاية علشان تتنيها مظبوطة وص ومنورة ومزدهرة

ربنا يوفقك يارب وتكون نعم الزوج لزوجتك وتكون بارة بيك وباولادك

اشكرك وتحياتى
---------------
لماضة

انشالله يخليى يا لمضة يا حبيبتشى والله انا بحس انك بنتى اللمضة - او بمعنى آخر اانا اليومين دول نفسى هفانى على بنت قوى ونفسى جدا تطلع لمضة كده - انا بحب لمضتك قوى

هعملك موضوع لتربية الاطفال بس كمان شوية كده

تحياتى يا سكرة
-------------
sendbad

اشكرك جزيلا على تعليقك ودعواتك وربنا يجمعك على خير انت وجيهان يارب

تحياتى
-------------
حبة حاجات - ايمان

الاختيار فى منتهى الصعوبة بس ربنا سهله بعمل صلاة الاستخارة والارتياح بعدها او انقباض النفس

اشكرك جدا لمرورك وتعليقك
تحياتى
------------
kikotalaat

والله انا بتمنى ان اى حد يستفيد وأولهم انا - حتى لما بحس انى مخنوقة وارجع لحاجة كتيتها او قريتها وبحبها بلاقينى برجع تانى لنفسى

اشكرك يا كيكووووووووو
ونورتنى
تحياتى
-----------
محمد على .. هى كده

اشكرك لمرورك ولتعليقك
تحياتى
----------
hannoda

يارب فعلا كل واحد يكون هدفه مرضاة الله والله ساعتها هنكون احسن امه بس اعتقد انه صعب مش سهل خالص

اشكرك لمرورك ولتعليقك
حقيقى نورتينى
تحياتى
---------
ما علينا

ربنا يجازينا كلنا بصالح اعملنا يارب
يارب والله اى حد يعمل باى حاجة

والله اه صعب اننا نتينا سعداء واحنا فى رضا الله ولكن حقيقى ما احلاه الوصول لرضاه وحبه وطاعته وتقاه

اشكرك حقيقى
وعقبال مفرح فيكى
تحياتى
--------------
meekneess!!!

وعليكم السلام ورحمة الله
الحمد لله انا بخير ويارب تكونى بخير يارب

اتمنى ان ربنا يتقبل دعوتك يارب
تحياتى ونورتينى يازيزى
-----------
جنة

اشكرك لمرورك
واحاول جاهدة ان يكون كلامى كأفعالى ولكن لأنى بشر والبشر خطاء فانى احاول جاهدة ألا أقع فى أخطائى مرتين

مرورك أسعدنى
تحياتى
------------
dyin_soul

مفيش اهم ولا احسن من ان الشخص يتقى ربنا حق تقاته - ربنا يقدرنا أجمعين يارب

اشكرك لمرورك
وتحياتى
------------
nermeen

والله انا اتكلمت عن الرجل ولكننى اعتقد ان الكثير يقع على عاتق المرأة لانها لا تعلم واجباتها بشكل صحيح ولانها بتغلط بتلاقى كثير من المشاحنات والسيئات تقع فى طريقها

والله وبجد وعن تجربة خبرة بسيطة من بعض المتزوجين من حولى - من يتقى الله فى زوجه ويعامله بما يرضى الله يبعث الله له بخير وبسعادة من حيث لا يدرى

وربنا يهدى الجميع يارب
ويارب يهدى كل زوج لزوجته

نورتينى وبتنورينى فى اى وقت
تحياتى
---------------
وينكى

البيت بيتك استغليه زى مانتى عاووزة
وحشتينى ونورتينى

تحياتى
--------------
سى السيد

اشكرك حقيقى على تعليقك اللى اسعدنى كثيرا وهاجى ازور المدونة واشوف اخر الانباء وافعال سى السيد

ياك بقى تكون مزعل امينة لقطعك - اه دى وراها رجالة

تحياتى
----------
سها

أسعدنى تعليقك واسعدنى اكثر واكثر مدونتك بما تحتويها من بوستات

احسنتى سيدتى فى تقديم افكار جميلة بطريقة سلسة وممتعة

تقبلى تحياتى وتقديرى
-----------
فى القلب

وحشتينى بجد والله
هكتب والله عن الرجل مرة تانية بس ارجع واقول ان الرك عالست - هى الارض اللى بيتبنى عليها كل الحاجات المثمرة

كلمينى اتطمن عليكى وبوسى نفسك بوسة كبيرة وحضن للواد ادم السكر

تحياتى
-----------------
doha

وعليكم السلام
اشكرك كثيرا على تعليقك والحمد لله ان البوست عجبك

مرورك اسعدنى
تحياتى
-------------
همسات

هو اه الست لما بتنكد بتبقى بسبب الزوج بس ده لان الست بيبقى جواها مشاعر وافكار كتير مش قادرة تطلعاها وهو مش بيساعدها على ده فلازم كل واحد يشيل مع التانى شوية ويشيل برده عنه شوية

دى علاق متكاملة جدلية سعيدة وحزينة صعبةوفى منتهى السهولة

لعبة جميلة ربنا مديهالنا بس احنا مش عارفين نمشى على قواعد اللعبة صح

تحياتى يا ارق همسة
هبة

Soooo said...

بقى كده يا دوبا
تشبهيني بكعبول
علمك علمك علمك
الكارتون ده من اكتر الكراتين اللي كنت باكرهها عشان وانا صغير كانو العيال في المدرسه يتريقو علي عشان كنت تخين ويقعدو يقولولي كعبول كعبول الكلب الاكول

وش واحد بيعيط وبياكل شندوشت بلوبيف

وبعدين انتي مافهمتيش قصدي على فكره
انا كنت باقولك انه فعلا اختياراتهم كانت غلط بدليل الحوارات اللي حصلت معاهم
لكن المشكله ياهبه انهم لما ابتدو يتعرفو على ستاتهم واتكلمو معاهم كانو زي مابتقولي كده فعلا وقال الله وقال الرسول
وبمجرد ما خلفو عيال تحول الحب والحياه كلها لولادهم ونسيو جوازهم تماما
ولو حد منهم فكر انه يتجوز يالهوي عاللي هيحصل فيه
طب مش الراجل ده ليه حقوق برضه ولا ايه؟؟؟


حاجه اخيره
نجوم السما اقربلك من انك تفرحي في

وش واحد بيطلع لسانه .. وهو بياكل شندوشت جبنه رومي .. بعد شاندوشت البلوبيف


سلامووووووووووز

Emad Karim said...

احيكي على البوست الهايل وياريت وزارة التعليم تحطة بدل درس نصيحة ام لابنتها
بس انا مؤمن جدا ان المرأة لم تخلق لسعادة الرجل ولا لحد معين
هي اتخلقت شريكة في الحياة
مش ضعيفة ولا تنفع مقارنتها بالراجل
وياريت يجي اليوم اللى تتخلص فيه من كدبة التضحية اللى زرعناها احنا الرجالة(ازواج واباء اخوة وابناء) فيها علشان نتمتع بعبوديتها
اقنعناها بضعفها القوي ففقدت ثقتها بنفسها وقدرتها على تحقيق احلامها وسعادتها من غير مساعده من حد
كلنا ملومين على العقد اللى بتتربي في البنت وهي صغيرة لحد ما تكبر بيها ونفقد الكائن الملايكي اللى جواها

Unknown said...

كلام جميل
ومنظم
واي حد يتمني انة يكون كدا
بس اكيد الزوج بيساعد كتير
ان زوجتة تبقي مهتمة بية والعامل الاساسي علية بردة
يعني لو هو محسسهاش ان كل اللي بتعملة بسطة وكدا هتحس بالاحباط
ولو مهتم هيزداد اهتممها بية اكتر واكتر فا اعتقد انة العامل الاساسي لاي ست
لكن مينعش ان فية ستات نكدية
يلا
تقبلي مروري
سلام

Eric Matt said...


يا سلام

اهو ده الكلام


:)


ربنا يكرمك ويباركلك في زوجك واولادك يا رب

تحياتي من ماناساس البلد

سندباد said...

فين الجديد

son's egypt said...

السلام عليكم
زي ما الناس بتقول المراة هي النص الحلو في حياة الانسان
وزي ما الراجل له واجبات وعليه حقوق انه يحسن معاملة زوجته
برضوا المراة لها حقوق وعليها واجبات
وانا اعتقدت انك وضحتيها الي حد ما كويس

Unknown said...

بجد تسلم ايديكي وذوقك في الكلام
وشكرا على زيارتك الطيبة لمدونتي وسامحيني على البكاء

الـسـيـدة نـون said...

والله كلام مش بطال يا دوبا

بس المشكلة ان الواحد يقدر ينفذ كل الكلام ده
الواحد بيعمل اللى بيقدر عليه والباقى على ربنا بقى

فرنسا هانم said...

ايه ؟
مش عارفه ايه اللى مبهدلنى كده ؟
ضربت البواب بتاعكم
وعوورته فى وشه
علشان
مش عايز يطلعنى المدونه بتاعتك بالعجله
وقعد يقولى
لا
اركنى العجله تحت
وانا جايه وجايبه سمك سويسى معتبر
شويه بورى على سهليه
وحبه كابوريا للقزقزه
مرضيش يطلعنى بالعجله
علمته بالمطواه فى وشه
وهو دلوقتى تحت متكتف

==
قابلى زوجك دائما بابتسامة فهى بكل الاحوال صدقة
احلى كلام قولتيه
فعلا مقابله الزوجه بابتسامه مهمه جدا

دكتور كسلان said...

بوست جميل جدا

جزاك الله خيرا

ربنا يرزقنى بواحدة تسمع كلامك

وياريت كل الستات تسمع الكلم ده وتنفذه


سلاااااااااااااااااام

Doba said...

soooo

بما انك بتكرهه بقى فانا هعذبك بيه
اه عندك مانع

علمك علمك علمك

انا كنت بحب الكرتون ده ومازنجر
متجيب حتة بلوبيف يا كعبول

ثم يا عمونا هما اختياراتهم سيئة اختار انت صح - المشكلة يا سوو فى ان كل واحد بيبقى متوقع انه هيغير العيوب - لكن المفروض انهم يتعاملو مع العيوب ويتفادوها لكن مش نتخانق ونعمل مواويل على العيوب اللى احنا عاوزين ومتوقعيين نغيرها

على فكرة الاولاد برده - بيبقو من الاب والام يعنى لازم الاب والام يتشاركو فى كل حاجة مش الراجل من دول يرمى كل حاجة عالست ويقول مهى معاهم على طول - مهو لو انت شيلت عنها نص المسئولية هتلاقى متدلعة ومفرفشة كمان

هفرح فيك يعنى هفرح فيك وانا بعون الله بعرف اطول النجوم كويس


وهات حتة ساندوتش احسنلك بقى بدل موريلك العين الحمرا بتاعت الستات

وش غضبان وهيموتك
ههههههههههههه

سلام
=============
bondok

اشكرك بس والله النصيحة دى لو كل واحدة عملت بيها فى معظم الاوقات بتصيب مش بتخيب

على فكرة منتهى تألق المرأة وهيه متألقة داخل مملكتها ووقفة جبن زوج ناجح وأطفال متميزين وكلهم يعيشوا فى ظل الرحمن وفى رضاه

اشكرك لمرورك الجميل وتحياتى
===============
my hopes

انا عارفة ان الزوج عليه عامل كبير ولكن المرأة هى الارض الزراعية البور التى تزرع وترعى وينتج لها نبات زى الفل

هو طبعا فيه ستات عاوزة الضرب بالنار بس ربنا هيقوم بيهم دول ملناش دعوة بيهم

مرورك أسعدنى
تحياتى
================
the groom

أهلا عبد الله
الحمد لله ان الكلام عجبك وربنا يبارك فيك ويرزقك بالذرية الصالحة

تحياتى
===============
sendbad

انا جااااااااااى
فرافييييروووووووو

اشكرك لمرورك
===============
son's egypt

قلت المفيد يا استاذ لو كل واحد عمل واجباته والتانى اداله حقوقه والله الدنيا هتبقى زى العسل

مرورك اسعدنى
تحياتى
=============
يوميات عيل مصرى

اشكرك جدا لمرورك وتعليقك واسعدتنى مدونتك على الرغم من بكائى

لك منى التقدير والاحترام
تحياتى
===========
بت خيخة وأى كلام

على فكرة - من مدونتك انا شايفة انك بت بميت راجل واللى ميعجبهوش الكلام يخبط دماغه فى الحيط

اعملى اللى تقدرى عليه فلا يكلف الله نفسا الا وسعها بس تلاشى النكد على قد متقدرى

تحياتى
============
فرنسا هانم

ياختشى والنعمة لامسكهولك وانا وستات العمارة ونقعدلك فوقة لما نبططه - احنا فديكى الساعة لما خالتى فرنسا تزورنا وهيه محملة كمان

بقى تجيبى سمك وكابوريا ويمشيكى ابن الفرطوسة ده - يا ختشى بقى ده يستاهل اللى اكتر من المطوة
=============

مرورك أسعدنى كثيرا واشكرك
تحياتى
هبة

Doba said...

دكتور كسلان

الحمد لله ان الكلام عجبك ويارب يرزقك بالزوجة الصالحة

مرورك أسعدنى
تحياتى
هبة

Unknown said...

هبه انا شيتلك شوية اكسير تفاؤل تعالى بقى خديهم
يلا مستنياكى بسرعه
انتى لسه هنا