Sunday, May 20, 2007

ازاى تقدر تكون سعيد

عندى سؤال محيرنى جدا، كل واحد فيه شىء بيسعده جدا وبيعمل أقصى ما فى وسعه علشان يوصل إليه ودايما بيرهق نفسه جدا للحفاظ على الشىء ده اللى بيسعده.
على الجانب الآخر فيه ناس بتحب الاكتئاب وبتستمتع جدا طول مهيه فى حالة حزن وبتلاقيها متضايقة قوى طول مانتا سعيد او فرحان او بتمر بنجاح
تفتكرو ازاى الواحد ممكن يبقى سعيد وازاى يحافظ حقيقى على الحاجة اللى بتسعده علشان يستمر فى حالة سعادة لأطول فترة ممكنة
عاوزة اشارككم ف حاجة.....انا من فترة كده لقيت الهموم على قلبى بتكتر وان كل قوايا بتنهار ومن الضعف اللى بمر بيه كل حاجة حلوة حساها بتضيع من ايدى وبلاقينى بجرح فى اللى بحبهم غصبن عنى وانتو عارفين ان مداواة الجروح مش بالساهل، فأخدت قراااااااااااار إنى مش هسمح لحاجة بإنها تهزمنى مهما ان كانت وهبسط اللى حواليه على أقصى جهد عندى مهما ان كانوا هما مين او مدى قربهم او بعدهم عنى
تقدرو تقولو عملت مصالحة واهو ادينى بحاول بس كل لما اجى اقع وانهار افتكر قرارى وانى بضعفى هأذى اللى بحبهم من كل قلبى
عاوزة اعرف منكو كل واحد بيتحدى صعابه ازاى وكل واحد ايه الحكمة اللى بتخليه بعد ميقع يقوم ويقف على رجله من تانى ويقول لالالالا انا فى منتهى القوة ولازم اكمل مشوارى ونجاحاتى
والسلام ختام......دوبه

23 comments:

Anonymous said...

متهيألى انا اول تعليق
ياحلوللى
بصى يا هوبه..مافيش حد يقدر يعيش سعيد على طول
وبرضه مافيش حد يقدر يكتئب على طول الخط
انتى لازم تعيشي بين الاتنين
السعيد دايما مش هايعرف طعم السعاده الا لو داق الحزن
بس ده مش معناه انه يستسلم
افتكر وانا صغيره لما كان بيعدى عليا موقف صعب كنت باقول
يارب اموت دلوقتى عشان ما اواجهش الموقف ده
وبعد ما يعدى الموقف وتعدى عليه مده وافكر شويه افتكر الموقف ده ةاضحك قوى واقول
ايه الهبل ده؟..بقى انا كنت عاوزه اموت عشان حاجه عبيطه زى كده؟؟
كله بيعدى..المهم تكونى مؤمنه ان بكره احسن وانه يكون جواكى امل كبير انك هاتكونى احسن
خليكى مبتسمه للدنيا وللحياه
جددى عقد مصالحتك مع كل حاجه
ممكن يكون ده صعب شويه فى ظل الظروف اللى احنا بنعيشها كشعب
لكن قارنى بين حالتك وبين طفل صومالى مش لاقى ياكل
او بين عراقى بيصحى وينام على صوت ضرب النار..او فلسطينى من ساعة ما اتولد وماشافش يوم حلو
عارفه بجد اكتر حاجه بتخلينى قويه واقدر اتحدى اى حاجه ايه هى؟؟
اولا..اشوف الناس اللى حواليا..وما اضيقش نظرتى على نفسي وبس
فيه غيرك بيعانى اكتر منك
ولو بقيتى معاهم هاتنسي همومك وانتى بتحاولى تسعديهم
تانيا.. خليكى عنديه ضد الزعل وضد اى حاجه ممكن تزعلك
اعملى اول حاجه تخطر على بالك تحسي انها هاتسعدك
مهما كانت فى نظر الناس مجنونه او غير منطقيه
وقولى..هما مش حاسين باللى انا حاساه عشان كده مش فاهمين
متهيألى انا رغيت كتير قوى
فكرى فى الكلمتين دول كويس وهابقى اعدى عليكى قريب اتطمن عليكى
سلاموز

Ehab said...

يعني ده اسمه كلام انا كنت هاعلق الول وبعدين هوب الصفحه حملت حاجه كده اتاري الست وينكي دخلت تعلق قبل مني انا هاروح اشوف مين ونكي دي وهاقطعها لو معجبتنيش مدونتها
المهم صحيح ان احنا ساعات بنحس باليأس والإكتئاب بس لازم نقف تاني على رجلينا ونخبط في الدنيا بكل عزمنا عشان تفتح الباب تاني لينا وتخش نلعب في الجنينه بتاعتها
وانتي فكرتيني مره اختي العبقريه هبه كنا هاننضرب من بابا واحنا صغيرين راحت قالتلي متخافش عشان لو انضربنا هتبقى خفت و انضربت لكن لو منضربناش هتبقى خفت على الفاضي اما لو انضربت وانت مش خايف تبقى انضربت بس يعني وفرت الخوف
المهم ان احنا انضربنا في الخر برده
سلااااااااااااااااااااااااااااام
عشان اروح اشوف الست وينكي اللي سبقتني دي

Doba said...

أهلا وينكى

نورتى بيتك ومطولتيش ولا حاجة
كلامك جميل قوى، انا نفسى حقيقى اجمع حاجة زى جبل يخلى الانسان فى منتهى القوة للتصدى لاى شىء يضايقه او يخليه تعيس. أشكرك على زيارتك

ويا مراحب بيكى فى اى وقت
سلامى

Doba said...

يا شنكووووووتى يا كبير قوى

براحة على وينكى، واوعى تزعلها
حلو برده انك سمعت كلام اختك ولكن للأسف على العلقة السخنة واهو كويس انك مخفتش برده

ودووووووس ولا يهمك عالدنيا

تحياتى وسلامى

الطائر الحزين said...

السلام عليكم ورحمة الله
انا اللى عاوز اعرف شعورك لما كتبتى حاجة تخصك - شفتى اد ايه جميل ان يكون هذا الشىء نابع منك مهما كانت درجتة
المهم
فى قاعدة اساسية
انك رضا الله اسهل بكثير من رضا الناس
اعتقد ان كل عملنا ان كان خالصا لله لن يضرنا شىء ابدا ولن نعبأ بمن احزنونا
"ضرب الله رجلا فيه شركاء متشاكسون ورجلا سلما لرجل هل يستويان مثلا
يعنى لو فيه رجل بيأخذ اوامرة من رؤساء كثير وواحد تانى بياخذ اوامرة من واحد بس هيبقوا زى بعض
تحياتى

Doba said...

n@hotmail.comايها الطائر الحزين

اشكرك لمرورك، وحقيقى معاك كل الحق، اللى يقنع ويرضى بما أقسمه الله فو فى منتهى السعادة

أهم شىء الرضا

تحياتى

Anonymous said...

hotmail.comالسلام عليكم
اللي بتعاني منه دا مش انتي لوحدك للاسف معظمنا بقه كده يعني انا مثلا الحاله دي بتزيد لما عمرنا بيعدي قدمنا ومش عارفين احنا عايزين ايه اهم حاجه نحاول نقرب من ربنا و نحاول نحس بالرضي
والله انا حاسس بيكي بس هو دا حالنا ,كمان علشان اللي حوالينا بياثروا فينا فنحاول نفصل شويه و نبص احنا عايزين ايه و من مين

أحمد

Ehab said...

يا سلام يا ولاد على النور اللي جه عندنا النهارده ده انتي نورتيني بكلامك الرقيق يا هبهوب
يا سلام لو تبقي تيجي تاني وعشان خاطرك انا هاكتب البوست بتاع ولا غنى عن القبلات اصل انا كتبته قبل كده وخفت انشره لحسن تقولولي يا واطي
يا ريت تبقي تيجي تشوفيه
واتمنى نبقى نتقابل على الشات
وهادوووووووس على الدنيا
سلااااااااااااااااااااام
على فكره انا مقطعتش وينكي عشان خاطرك بس

Van Gogh said...

اقترح عليكى بوست كتبه واحد من اكتر الناس اللى بحترمهم فى عالم التدوين

harmless

http://harmless2000.blogspot.com/2007/04/blog-post_21.html

الفكرة ببساطة المشى هو عبارة عن سقوك متتالى

يعنى عشان تمشى
لازم تقعى

جميلة مدونتك
واكيد هتشوفينى تانى

انتظار مؤقت said...

شوفي يا ستي الحكايه باختصار ان انا من الناس الي دايما بيبدا من جديد يعني دايما في فشل و بدايه جديده عارفه قصة القائد الي شاف نمله شايله حبة قمح و بتحاول تتسلق بيها الرمل و كل ما توصل حته عاليه توقع و ترجع تشيل القمحه و تحاول تاني مره و اتنين و تلاته لغاية ما تحقق هدفها دي حكمه جامده جدا بجد هيه الدنيا لازم تكون كده وقوع ووقوف و بعدين مين الي قال ان الدنيا حلوه على طول او وحشه على طول حلاوتها في تغيرها من حال لحال اذا حطيتي قدامك ان استمراريتة الحياه و جمالها بكل ما فيها وحش او حلو حترتاحي و اهي دنيا و ماشيه و ياما بدق على الراس طبول و بتعدي...و اهي ماشيه

Amr Mohy said...

مش عيب ان الانسان يزعل ويكتئب بسبب حادثة مؤلمة عليه او موقف تسبب فى صدمة فــ ده شعور طبيعي زي ما فى الخير في الشر وزى ما في الفرح في الحزن

لكن لازم تمر قترة الحزن بسرعة ونتجاوزها بدون تطويل ولا مط لان الدنيا عجلة ماشية مش بتقف على حادثة أو موقف وكله بينسي

الجميل انك تبتسم فى وجه الاخرين فالضحكة فى وجه اخيك صدقة .. لكن الغريب ان فى ناس بتحب دور الكآبة والحزن عشان يكسبوا تعاطف الاخرين واهتمامهم !!

Ehab said...

هبهوب يا لذيذ اعتقد شخصيه عندها كل الروح الحلوه دي جواها مينفعش احنا نقوله على اللي يقويها انتي قومي اشخطي فينا وقولي لكل واحد يعمل ايه عشان ينصلح حاله ويبقى بجد انسان من جديد
لكن لو بجد عايزه نصيحتي حاولي تروحي اسكندريه مش عارف ليه بحس انها بلد مسحوره وفيها حاجه غريبه
هاحاول اسال الأسكندرانيه لو حد فيهم ممكن يفهمنا
سلاااااااااااااااااااااااااااام

Doba said...

Spyfun او أحمد
أشكرك على كلماتك الرقيقة
هو انا مش متضايقة دلوقتى - حسستونى انى بشد فشعرى ياعينى - بس انا بحاول اجمع تعليقات لو الواحد فى لحظة ضيق او تعب يبصلها يقدر يقف من تانى ويقول انا اهو

علشان الواقعة متستمرش كتير والواحد يقعد يعيط على ليلاه كتير- يبقى الواحد عارف فعلا زى مقلت هو رايح فين وليه ولمين

سلامات

Doba said...

Van Gogh
حكمة جميلة حقيقى - لسه بصراحة مقريتشى بتاعة هارمليس بقى اوعدك هقراها حالا

اكيد هتشرفنى بوجودك دايما - بس متنساش تجيب حاجة حلوة فايدك

سلاموووووز

Doba said...

انتظار مؤقت

الواحد اه بيعمل زى النملة بس النملة نملة مش انسان

الواحد اوقات بيفيض بيه فبيقوم هادد الجبل ويرمى القمحة ويروح على اقرب كوبرى وينط من فوقه

بس فعلا هيه الدنيا كده حبة فوق وحبة تحت مرة تطلعنا للسما وبعدها ترجع تفكرنا ان فيه ارض علشان لما نطلع السما تانى نقدر ونعرف هيه قد ايه جميلة قوى ونستمتع بيها اكتر واكتر

اشكرك.....سلام

Doba said...

شاب مصرى
فالضحكة فى وجه اخيك صدقة - كلمة جميلة احييك عليها ويارب يارب كل واحد يتعلمها ويعمل بيها

كل واحد بقى بيخاف يضحك دلوقتى ليقولو عليه مبسوط ويحسدوه بس يارب كل واحد يحطها فى باله دايما ويفتكرها

اشكرك لزيارتك جدا......سلام

Doba said...

يا استاذ شنكوتى

اشكرك جدا علشان نشرت المدونة الجديدة وفضحتنا والحمد لله بس هيه حقيقى جميلة

مقدرش ياعم اشخط فى ضيوفى الاعزاء هما منورين دائما وابدا واصحاب بيت كمان

وبجد بجد بقالى فعلا فترة نفسى اروح اسكندرية وهيه فعلا بتدى طاقة غير طبيبعة لو قدرت تعرف السبب ابقى افتنلى عليه

سلالالالالالالالالام

Ehab said...

انا صلحت اللينك اللي كان غلط كله منها وينكي كنت عايز اقطعها قوم دعت عليا رحت احوليت وحطيت لينكها هي
معلش وعلى العموم مسيري انا وانت نعرف سر اسكندريه
ويمكن نروح نصيف سوا بس انا معنديش مايوه عشان كده هاستنى لما بابا يديني اجيب واحد
سلااااااااااااااااااااااام
__________________
اه صحيح لو مكنتش قولت الكلمتين دول كنت هاطرشق من قلة القب... فإضطريت اقولهم
سلاااااااااااااااااااااام

Anonymous said...

هو شنكوتى زعلان منى ولا ايه؟؟؟؟؟
مين ده اللى عاوز يقطعنى؟؟:(
والله دانا غلبانه وطيبه
اقولك على حاجه حلوه
روح قطع الدكاتره اللى هايمتحنونى كمان يومين
وساعتها هادعيلك من قلبى
مافيهاش حاجه يعنى لما علقت قبليك مره من نفسي
فيها حاجه دى؟؟
ولا هى غيره على الفاضى؟؟
:P
معلش يا هبهوبتى
ان شالله يارب تفضلى مجمعه الحبايب كده على طول

Doba said...

يا شنكوتى

انا ممكن اساهم مع الوالد فى مصاريف المايوه علشان تغير جو

وبالنسبة لوينكى انا وهيه واحد اللينك بتاعى او بتاعها ده شىء يسعدنى برده

والحمد لله انى خليتك متطرقعشى - ياريت متخليش اى حاجة مهما ان كانت تأثر عليك وتخليك تاخد قرار يوصلك انك تطق - قول اللى فى نفسك وولا يهمك من اى حد - ودووووووووس عالدنيا زى مقولنا-----سلالالالالام

Doba said...

أهلا وينكى

شرفنى جدا انك كنتى أول كومنت - ويارب يارب كل أمتحاناتك تنتهى على خير وبكل خير ودعواتى وهقول لمامتى تدعيلك علشان سرها باتع - ههههههه

أوعى تزعلى من شنكوتى ده بس بيناغشك وحط لينكك كمان متعمد شكله كده علشان يصالحك

تحياتى للكل وأطيب أمنياتى
سلام----هبة

Anonymous said...

انا نفسي بجد اني ابقى سعيد وفرحان لكن الطبيعي ان الدنيا السعادة فيها بتبقى معدودة او قليلة لكن منتهى سعادتي اني اشوف الي حواليا سعداء وفرحانين لكن الشئ الي بيقهرني اني مالقيش حد يحس بيا او الي جوايا نفسي الا قي سعادتي وفرحتي نفســــــــي

Anonymous said...

انا عمر :
انا نفسي بجد اني ابقى سعيد وفرحان لكن الطبيعي ان الدنيا السعادة فيها بتبقى معدودة او قليلة لكن منتهى سعادتي اني اشوف الي حواليا سعداء وفرحانين لكن الشئ الي بيقهرني اني مالقيش حد يحس بيا او الي جوايا نفسي الا قي سعادتي وفرحتي نفســــــــي