Wednesday, July 11, 2007

آه يا قلبى

أدينى رجعت وياريتنى مرجعت للأسف صوت النكد والقرف والملل كانوا أقوى بكتير قوى من قوتى - ومقدرتش استحمل - سامحونى غبت عليكم بس غصبن عنى
حقيقى أعصابى لدلوقتى مش عارفة ولا قادرة أرجعها زى مكانت - مش قادرة اعرف او افهم ليه الناس بتحب تعيش فى النكد والقرف بدل متستمتع بالجو الساحر والطبيعة الى ربنا حبانا بيها - مفيش فى قلبى والله او على لسانى غير ربنا يسامحهم أو يسامحها هيه بشكل خاص - حماتى طبعا - على فكرة انا عمرى مسميتها حماتى من يوم متجوزت دايما كنت لما بتكلم كنت بقول انها والدة زوجى - لكن من اليوم هى حماتى وفقط
مش عاوزة أكئبكم بتفاصيل مزعجة أو كلمات سيئة ممكن تطلع لأنى فى شدة غضبى ولكننى إفتقدتكم كثيرا - وأقسم بالله ما فى شىء كان يهون عليا لحظات الكآبة المستمرة هناك غير كلماتكم الرقيقة وأهتمامكم بى
لكم منى كل الحب والأمل والآمنيات بتحقيق أغلى الآمال والأحلام
قريب قوى انشاء الله هتلاقو حاجة جديدة وأتمنى تكون سعيدة تحياتى للجميع ولسؤالكم الغالى عنىبحبكو كلكو جدا والله
هبة

20 comments:

سندباد said...

العزيزة هبة
هوني علي نفسك وحمدالله علي السلامة واحنا كمان افتقدناكي
تحياتي

طهقان said...

اووووبا

انت انضربتي عين من البوست اللي فات

وبعدين
ولا يهمك
من الحموات

رغم اني اعاني ماتعاني انت منه
ورغم ان مراتي بتعاني من نفس الشيء
انما
بأرجع واقول
حط نفسك مكان الست دي
وبس

المهم
الحمد لله على السلامة

وربنا معاكي

Seren said...

اولا حمد الله على السلامة وعقبال عودة بس تكون سعيدة (: المرة الجاية ان شاء الله
المدونه بتاعتك حلوة اوى وكلها تفاؤل وواضح انها بتعكس شخصيتك المرحة

مع ان مش واضح ايه اللى حصل بالظبط بس واضح انك اطرقعتى حلو اوى (: وواضح بردوا انك اخدتى عين حلوة اوى زى ما قال طقهان

بلاش تزعلى وحاولى تعوضى فترة النكد الاخيرة باى حاجة حلوة بتحبى تعمليها ولا اقولك ممكن تروحى لوفاء صاحبتك اللى انتى حكيتى عنها واضح انها انسانه رائعة وممكن تخرجك من المود ده

اما باه بالنسبه لحماتك فاعتقد انها زى اى ام كبيرة فى السن بيكون ليها تحفظات ونظره خاصة شوية يعنى ممكن يكون خرج تصرف منك ضايقها على الرغم من انه موقف عادى وبسيط فى نظرك

ومع ان الامهات بيكونوا اكبر فى السن بس فعلا بيكون دماغهم ضايقه اوى وبيبصوا على الحاجات الصغيرة بعكسك انتى مثلا اللى ممكن تشوفى الامور بسيطة وتافهه وبتتصرفى على الاساس ده عشان كده لازم تكونى هادية معاها الفترة اللى جايه وسيبيها لحد ما هى تحس انها فعلا ضايقتك وهى ان شاء الله هاتصلحك وهاتراضيكى

تحياتى

truelove said...

ايه يابوب احنا حسدناكي ولا ايه معلش ياقمر هي عيون المدونين السبب وبعدين مش بشوفك اون ليه اليومين دول وحشاااااااااااااااااااااااااني قوي

Anonymous said...

انتى يابت
اطلعى من المود ده وخرجى العفاريت من دماغك
على فكره
انا عامله تجمع بلوجرى جامد جدا بمناسبة نجاحى وتخرجى على خير
التفاصيل على مدونتى الصغنونه..اللى من غير فذلكه

Ehab said...

حمد الله على سلامتك يا جميله
وحشتيني مووووووووت
معلش انا عارف انك تعبتي في المصيف وجالك نكد المصايق المشهور بس معلش انتي اقوى من كل الهم ده احنا كلنا معاكي
عشان كلنا بنحبك وعارفينك دايما عاقله وعسوله اصبري عشان خاطر يحي
ويوسف
اتمنى ليكي السعاده وبكره لينا كلام مع بعض
سلاااااااااااااااااااااام

الطائر الحزين said...

حمدا لله على السلامة
يا شيخة انتى بتتكلمى عن مشكلة عند 99.9999 % من الناس
بس الشطارة انتى تروضيها

واوعى تأخذى على اعصابك

تحياتى

shahy said...

حمد للة على سلامتك يا جميلة يا حبيبتي

ولا يهمك وفرفشي كدة وارجعي هبة الضحوكة العسولة اللي مش بتحب النكد وبتنصح كل الناس انهم يبحثوا عن السعادة وينسو النكد

ان شاء الله هاكلمك بكرة

سلام مؤقت

3abdo me7tas said...

أولا الحمد الله على رجوعك بالسلامة
ثانيا دى مش هبه اللى كنت بشوف ضحكتها علطول فى كل كلمة بتكتبها
شكلك اتحسدتى يا هبه بجد عايزين نجيب خرزة زرقة هنا فى البلوج يا جدعان مينفعش كده
لا اله الا الله
ربنا معاكى انا عارف والله متخيل منظرك وانتى بتكتبى البوست
ربنا يهديها يا رب ويهدى الجميع
آمين يا رب

Doba said...

حقيقى وفعلا وبجد مفيش اى حد يتمنى أصدقاء أحسن من كده - ربنا يخليكو ليا يارب - وان كان فيه حاجة حلوة من الموضوع ده فهو انى عرفت اد ايه انتو بتحبونى وبتخافو على مشاعرى

امبارح كان عيد ميلادى وهيه جت زارتنى وبجد بجد كان جوايا حب وفرحة تملى الدنيا واول مشوفتها حضنتها وبوستها ومفتكرتش ولا حاجة من كل الكلام الفارغ اللى حصل

بحبكو كلكو قد الدنيا زى يوسف ابنى مبيقول ويارب نكون اصدقاء واحباء فى الله فى الآخرة

تحياتى وامنياتى وسلامى للجميع شخص شخص
هبة

Mirage said...

حمدالله على السلامة
هى جت متأخرة شوية بس لانى كنت قاعد مستنى البوست اللى بعده

بس شكلى هستنى كتير كده

زى الهوا said...

الستات الكبار كلهم كدة وبيتعمدوا انهم يزعلوا زوجات ابناءهم , حمد لله على سلامتك

S H A H said...

قعدتي تقوليلي الجو بديع و الدنيا ربيع

اشربي بقى حقد المدونين

حمدالله على سلامتك اولا و كدة انتي رجعتي للوضع الطبيعي للحموات

ربنا يعينك عليها يا رب و لوني مش عارف ايه التفاصيل يا ريت تحكيلنا كدة وتفضفضي

على فكرة
ليكي عندي حتة كبيرة يلا عشان تيجي تكليها :)

S H A H said...

وبعدين حد يبقى سرطان و يزعل كدة

Noony said...

الله يسامحهم كلهم

مرحباً بيكي من جديد
سيبك من حكاية "والدة زوجك"...عيشي حياتك السعيدة

معلش متأخرة كالعادة
:)
نوني

Rosa said...

اولا حمد الله على السلامه
و معلش يا دوبه هوني على نفسك
و بشر الصابرين

Yasser Hussein said...

عمر ما والدة الزوج هتكون أم للزوجة
وعمر ما والدة الزوجة هتكون أم للزوج
كل واحدة منحازة لأبنها أو بنتها
ومش مهم الطرف التاني
أنا كان ليا صديق بينادي حماته يا ماما
ومراته كانت بتنادي حماتها يا ماما
فجأة كده مراته قررت أنها تنادي حماتها بيا طنط
مع إن صديقي لحد اليوم بيقول لحماته يا ماما
م الآخر أهم حاجة علاقة الزوجين ببعض
وطرح أي تدخلات خارجية جانباً
بدون عصبية أو هجوم على الحموات
لأن مفيش راجل هيبيع أمه عشان مراته
ولا واحدة هتبيع أمها عشان جوزها

وربنا يهدي النفوس
خالص تحياتي وأمنياتي بالسعادة الزوجية

الراقـــص مع الذئـــــاب said...

السلام عليكم
سبحان الله حتي بعد كل السنين ديه والوضع هو هو ومفيش تغيير...الحموات مش بيتطوروا

بس يعني اول زيارة كدا الاقي عياط وزعيق وزعل
شكلي وحش اوي

انا بصراحة مجربتش موضوع الحموات دا....يمكن كنت ماشي في مشوار خطوبة ولما باظ مزعلتش علي العروسة...زعلت علي امها عشان كانت طيبة ولذيذة اوي
...تفتكروا هما بيبقوا كلهم كدا قبل الجواز والوش التاني بيطلع بعد ما الواحد رجله تيجي في المصيدة ويتدبس؟؟

مش مهم يا هبة...خدي الموضوع بروح رياضية واستعملي اسلوب البرود والامبالاة...عشان اي تحرج ايجابي منك وإتخاذ مبادرة للهجوم هتزعل منك زوجك
وافتكري ديما ان اولي واحق النساء بالرجل هي امه...واحق الرجال بالنساء هو زوجها
دا كلام الرسول صلي الله عليه وسلم

اكيد حماتك ارحم الف مرة من الصول مصطفي....حسبي الله ونعم الوكيل

معلش طولت عليكي...متزعليش
سلام

Doba said...

أشكركم أشكركم والله من كل كل قلبى
كلماتكم بتدينى طاقة لا تتخيلوها - انا تعبى الشديد كان من عدم قدرتى على المطابة حقى وفى نفس الوقت لأننى لم أخطى تجاهها بأى شىء ولكنها الغيرة يا أخوانى التى تحرق أى نبات أو اى شىء يحيا بأمامها

لن أفعل الأفاعيل ويكفينى رضا زوجى ورضا والدته عليه - هذا وحسبى وأهمهم رضا الله عنى والذى يتمثل دائما أمامى من خلالكم أو من خلال الآخرين

تحياتى لوقوفكم معى للشد من أذرى فلقد كنتم جميعاً نعم الصحبة والأصدقاء

أشكركم مرة أخرى وأتمنى أن أكون انا الآخرى نعم الصديق إليكم

سلامى وأمنياتى --- هبة

Doba said...

أحببت أن أشارككم فى حب شىء غالى على قلبى فقمت بكتابة بوستى الجديد والذى له مقدار كبير بداخلى هو الآخر - البحر الجميل - أتمنى أن ينال رضاكم

تحياتى --- هبة