فين تاجى - راح فين

السلام والتحية لكل من يزور مدونتى الصغيرة أتانى أكتر من تاج من أكتر من صديق - شنكوتى وعبده محتاس وترو لف - بيبو - وكنت بحاول أهرب بصراحة ولكنهم تزايدو كثيرا وأصبحوا ثلاثة ولقد أجمعت أسئلتهم جميعا ولأننى أعتبر التاج ما هو إلا مرآة لوصف صاحب المدونة – فلقد أجبته بمنتهى الأمانة والصدق – فقط أحب أن أخبركم إننى أحبكم جميعاً فى الله ============================ اسم مدونتك؟ Doba

لماذا اخترته.. وماهي نيتك من وراء اختياره؟

برىء يا بيه والله – بس ده اسم الدلع بتاعى من وانا صغيرة

هل فكرت في إغلاق مدونتك؟ والسبب؟ لا حول ولا قوة إلا بالله – انا مفكرتش بصراحة بس النق اللى بينزل فوق نفوخى ممكن يخلينى فيوم افكر

صورتك في المدونة ورمزيتها ؟؟ أنا حاطه صورة مرسومة لبنت انا مسمياها نور – حبيت الصورة دى قوى ومن يوم مشوفتها وهيه معايا عالموبايل والديسك توب فى الكمبيوتر وكمان على المدونة – حساها فيها نفس بصه عينى وشايفانى من جوايا قوووى

لما دخلت عالم التدوين من الاساس؟

جلست لساعات وأيام وأسابيع مجرد قارئة ومتابعة للكثيرين واستمتعت بقراءة موضوعاتهم كثيرا وبمشاركتى بتعليقى على موضوعاتهم ومن هنا جائتنى رغبة ملحة للمشاركة بشكل فعال – واهو ادينى بحاول وسط العمالقة – بس انا عارفة نفسى مش كاتبة ولا نيلة بس بحب المدونيين وكتاباتهم جدا

جمله قيلت لك فى وصف مدونتك؟

مش قادرة اقول كلمة محددة ولكن يكفى أن بعضهم يستمتع بها وهذا يكفينى

التعليقات بالنسبه لك ,اهميتها؟ مشاركة وتبادل آراء وصداقة متنوعة الأفكار والمشاعر

احلى بوست كتبته ...ضع اللينك , ثم اذكر لماذا؟

أحلى بوست على الرغم من مرارته جوايا كان – البحر ما أحلاه – لكنه كان بيعبر بشكل قوى عن كل ما دار بمشاعرى فى ذاك الحين – فأشعر بأنه يمس قلبى كلما قرأته == ملحوظة == مش هعرف احط اللينك لانى مبعرفشى قوى فى حركات المدونة – يكفينى حبها – مش لازم بقى التقنيات العالية دى

أفضل بوست قرأته؟ وضع لينكه؟ صعب أنه يكون بوست واحد لأن لو الواحد كل مهيدعبس جواه هيلاقى حاجة احلى – حاولت اطلع حاجة واحدة بس لا يمكن

أفضل مدونة قرأتها؟

كثيرووووووووون ولكن كل منهم أوقات يضع أشياء تتوافق معك ومع شخصيتك واوقات أخرى لا تجد نفسك بين السطور وتجد التعليق الوحيد لديك هو – لا تعليق – جميع المدونات التى توجد فيها تعليقاتى فجميعها قريبة من قلبى

حد قل ادبه فى التعليق إيه رد فعلك؟

والله موضوع قله الأدب دى برده مجرد آراء ثم فى الأول والآخر اللى بيقل أدبه فهو اللى قليل الأدب انا اتضايق ليه – يروح يظبط أدبه وييجى – لكن الكلام بشكل موضوعى متحضر – ما أجمله ويا أهلا ومراحب كمان

أسوأ مدونة؟ إلى الآن قرأت الكثير من الموضوعات ولكن أكثر ما أزعجنى هو إنتشار الحديث عن المثليات والخروج عن الآداب العامة للدين – فجميع الأديان تتسم بالسماحة والوضوح ولا داعى للمهاترات – فأى مدونة تتطرق لمهاترات وضيعة فلا يوجد مكان لى بين سطورها

أسوأ بوست أسوأ مدون؟ مليش الحرية انى أعلق لأى شخص بالدرجة دى وإنى أحكم عليه بأنه الأسوأ – ولكن كل ما يسعنى أن أحتفظ بتعليقى لنفسى ولا أدخل مدونته مرة أخرى

هيحصل ايه لإيميلك لما تموتى ؟؟ الله أعلم – بس هكتب فى وصيتى أنه يتقسم على الورثة – هههههههه مش عارفة بس أعتقد أنه لا يوجد من يهتم أن يتطرق لمشاعرى وأفكارى لهذه الدرجة – فهيروح مع اللى راحو – او احسن اكتب فى الوصية يشغلوا فيها قرآن ويسيبوها

اديتى الباسوورد لحد قبل كده؟

لالالالالالالا

كانت إيه طبيعة علاقتك بيه؟ سبق وإنى قلت لأ – هقعد بقى أعيد وأزيد – أجيب صحة منين لكل ده كح كح كح كح الصحة ولت بقى يا اولاد – يلا حسن الختام بقى اسمك ؟ هبة – والدلع دوبه واللى يحب يقول حاجة من عنده أهلا وسهلا فيه لقب تانى الناس بيقولوهولى دلوقتى وهو لقب عزيز جدا طبعا وهو أم يووووووووووووسف

اسم مشهور ببيه وسط اصحابك؟ هبة

عمرك؟؟ سبعة وعشرون عاما ونص شهر كده بالتمام والكمال والله

برجك ؟؟ برج السرطان دراستك؟؟ مجالك؟؟ ليسانس آداب – قسم حضارة أوروبية قديمة – جامعة عين شمس Sales Coordinator

شخصيتك نوعها إيه؟ إنسانة متشائمة فى الظروف الطبيعية ولكن بشكل عام متفائلة جدا - بحب جوزى وابنى وبيتى - وبحب الحياة وعارفة ومتأكده ان ربنا مدينا نعم كتير قوى لازم نستمتع بيها على قد منقدر – بحب الناس قوى وخاصة المقربين جدا

السفر بالنسبة لك؟ أى مكان فيه بحر بالنسبة لى مكان ممتع للغاية – السفر خارج مصر – بصراحة مبقدرش ومبتجيليش الجرأة إنى أفكر فى الموضوع ده

وقت فراغك بتعملى فيه إيه؟ مج نيسكافيه أو فنجان قهوة مظبوط كده مع كتاب حلو ومكان هادىء وموسيقى مميزة وده يبقى احلى وقت – يقما بقعد ألعب أنا والواد يوسف ابنى – او أخرج مع صديقات السوء أنتيماتى المود بتاعك؟ متقلبة المزاج دائما وأبدا ممكن حاجة عبيطة قوى تخلينى فى منتهى السعادة وحاجة كبيرة قوى المفروض تزعلنى تلاقيها مبتأثرشى خالص – بس لما دماغى بتقفل ببقى عندية بشدة وده بيطلع أسوأ ما فى هبة

الاكلة المفضلة؟ هو أنا بحب حاجات كتير مفضلة وبستمتع بيها قوى بس أكترهم يعنى واسمحولى اخليهم ثلاث أكلات وهم الجمبرى – السمك – الفراخ المشوية

الصفات اللي أخدتها من بابا؟ بصراحة معرفهوش لأنه توفى وانا عندى سنة ونص لكنهم بيقولولى إنى أخدت عناده وطيبته الشديده

الصفات التي أخدتها من ماما ؟ ماما حبيبتى علمتنى أنا وأخواتى ازاى نحب بعض بجد ونخاف على بعض – وازاى نتعامل مع المجتمع بنوع من التسامح والود والكلمة الطيبة – ربنا يديلها الصحة ويدخلها الجنة يارب

اكتر ست حاجات بكرهها؟ الخيانة – لأنها بتموتنى وبتقتلنى قوى بجد مبستحملهاش خالص وخاصة لو من حبيب أو من صديق ساعتها هتجيلكم فاجعة بهبة مدمرة تماما الكدب – لأنه بيخلى الشخص اللى قدامى بيسقط تماما من نظرى وساعتها مهما عمل فى المستقبل بيتنيه فى درجة منحطة فى نظرى البخل – لأن البخيل مادياً بيكون بخل فى مشاعره – وأنا مقدرشى أعيش من غير مشاعر حلوة حواليا النكد – بحب الناس تحب حياتها وتستمتع بيها على قد متقدر القسوة – ليه الواحد يقسى على اللى قدامه مدام قادر بكلمة حلوة وبسيطة يزرع الحب والطمأنينه فى نفوسهم إحساسى بالقهر أو إحساسى بعدم مقدرتى على مساعدة الآخرين

اكتر ست حاجات بحبها؟

الله ورسوله والنعم التى حبانا بها جميعا يوسف – إبنى الحبيب يحيى – زوجى العزيز ماما واخواتى نسمة وغادة – اصدقاء العمر

هبة

أصدقاء المدونات

الشغل بالنسبة لك؟ مكان من خلاله يمكن القدرة على التواصل فى الحياة والتعلم والاستفادة بشكل مادى ومعنوى وثقافى انت سعيد؟ الحمد لله على كل شىء عجبت لأمر المرء أمره كله خير إذا أصابه مصيبة صبر واحتسب فكان خيراً له – وإذا أصابه خيراً حمد وشكر فكان خيراً له إزاى بقى الواحد ميكونشى مبسوط بعد ده كله

لو اجتمعت انت وحسني مبارك في غرفة واحده؟

تذكر الله الواحد الأحد واخشاه فإنه يمهل ولا يهمل

لو معاك مليون ونص جنيه......تعمل بيهم ايه؟

كل لما بقعد افر واقول لو ربنا ادانى فلوس اكتر هل هيبقى عندى المقدرة زى دلوقتى على مساعد الفقراء ولا هيصيبنى الغرور وسأصبح بلا قلب – اللهم عافينا يارب تصدقوا – انا مش عاوزاهم خاااالص

بتحب مصر؟ بحبها قوى وبحب ترابها فيكفى قول الله عنها – ادخلوها أمنين خير مصر كبير قوى بس للى بيحمد ربنا وبيتقيه ويخشاه ولا ينقم على حاله

بتحبى البنات؟

بحبهم جدا ونفسى ى بنوته صغنونة العب بيها وأربيها صح علشان أدخل بيها الجنة

مسلم؟ الحمد لله

مين اكتر شخصية ما تقدرش تستغنى عنها في حياتك؟وليه؟

ما نحن إلا ودائع الله على الأرض ولكننى أحب أن يشاركنى دربى يحيى ويوسف وكل شخص يكمن فى داخله حب لشخصية هبة – الحب فى الله – والذى يجمعنا فى ظل الله يوم لا ظل إلا ظله – شخصان تحابا فى الله

ايه اكتر موقف محرج اتعرضت ليه في حياتك؟واتصرفت ازاي؟ يوم لم أستطع أن أواجه من أساء لى وأعلمه بمدى شعورى بالأسف عليه بعتبر ده اكتر احراج ليا فى حياتى ايه الأمنية اللي بتدعي ربنا دايما انه يحققها لك؟ إنه يكون راضى عنى وأنه يحبب فيا خلقه – وإنى أكون زوجة صالحة وأم لديها القدرة على تربية ولدها تربية جيدة يرضى عنها الله ويارب دايما أكون سعيدة وراضية بكل اللى يقسمهولى ويبعد عنى الشيطان اللهم آمين

التاج امرره لمين ؟ إلى كل من يريد أن يضع بصمة خاصة لحياته ليعرف من خلالها أصدقاءه من يكون تحياتى هبة