Thursday, January 3, 2008

وداع يا حب

وداع يا حب
-----
لماذا يموت الحب بعد الزواج
كيف نحافظ على من نحب
كيف نوصل له أمانينا فى أن يبادلنا نفس الشعور والأحساس
----------
كيف وأنا أحبك كل هذا الحب تختار أن تشغلك هموم الحياة
أن تبتعد وتختنق بعيدا
لم تتركنى فى هذا المكان الموحش فى إنتظارك دائما
علك تأتى إلى مشتاق
لم لا تنتظر وتلقى بالهموم جانباً وتشاركنى الحياة والأمل
تشاركنى رحلة الحياة فى سعادة وود
نتمتع بما أعطانا الله من نعم
فأنا أحبك
أحبك كثيراً
وأشقانى جفاءك
وأعيانى طول إنتظارك
عد إلى
فأنا فى إنتظارك
لأحيا من جديد
لأبث لزهورى المحبة بعد طول إشتياق
فى إنتظارك
ولكن
كل
ما أرجوه
ألا تطيل الأنتظار
--
إمضاء
زوجتك المشتاقة

48 comments:

Yahia said...

انا قلت احجز مكان واعلق بعدين على راحتي

Doaa Ebrahim Aaql said...

ازيك ياقمر
كل سنةوانتى طيبة
عام سعيد عليكى يارب

فكرة انتهاء الحب
بعد الزواج
مش لأن زى ما بيقولو
لو دخل الزواج من الشباك
...

لكن الحب اساسا
شعور زى اى شعور
بيجيله وقت
وينتهى
بعد أو قبل الزواج بقا
بينتهى
يمكن بيبدأ حب تانى
حب عشرة او تعود واعتياد
بس الحب الرومانسى وقتى

.
.

عم سعيد يا جميلة

تحياتى

الـسـيـدة نـون said...

ايه ده بقى
انتى يا بت يا دوبة بتلئحى بالكلام على جوزك ولا ده بوست عادى كدة يعنى
عايزين نطمن ان الامن مستتب عندك وان الفاصوليا البيضا تمام

عموما كلام زين والله زين

واعتقد ان سبب الجفاء اللى بيجى بعد الجواز هى الهموم الحياتية
والبحث عن لقمة العيش
وتوفير مطالب الحياة
يعنى الحب بيكون موجود
لكن مشاكل الحياة ومطالبها بتغطى عليه
واحنا بقى بشطارتنا كاستات المفروض نشيل الحاجات دى ونبين الحب اللى موجود فى قلوب رجالتنا
بس يا سيتى
خلاص
وبعدين ده انتى عندك الوصفات كلها بتاعة ال
طبيخ يا ام يوسف
يعنى لو عملتى النهاردة فاصوليا بيضا
ولا عملتى بكرة ملوخية بالارانب
وبعد بكرة عملتى بسلة
ما كل الوصفات دى بتنفع ولا ايه ؟؟؟؟


سلام
اختك خيخة

عصفور المدينة said...

حاجي أعلق بعد ما ارجع من فرح
:)

ghalia said...

ازيك يا هبة
قالو الزواج مقبرة الحب
بس اعتقد ان العبارة دى مبالغ فيها شوية
بعد الزواج ممكن الحب يتغير عن اللى كان عليه قبل الجواز
لكن مش لدرجة انو يموت
يمكن بياخد ابعاد تانية أعمق زى العشرة مثلا زى ما قالت دعاء

وكل سنة وانتى طيبة

DR.HAMAS said...

أخت دوبا

أزوركم لأول مرة

صراحة مظنش ان الحب يموت بعد الزواج

أنا لسة مجربتش الصراحة

بس ده تصورى و تخيلى

أعتقد ان الحب زى أى شئ فى الدنيا بيحتاج
Refresh
و إعادة تجديد و صياغة

ده الإيمان اللى فى القلب نفسه بيزيد و ينقص
و دى علاقة مع الله و بيحصل لها كدة
فما بالك بعلاقة بشر ؟؟

أعتقد برضه ان أحد الطرفين لما يحس بأن فيه فتور
لازم يتخذ اجراءات صارمة
و لا يسمح لحب بنى فى زمن أن يطير هكذا

دى شطارة الزوج أو الزوجة
إنه يشتغل بالمصارحة
و بإبداء المشاعر الطيبة

هو ده التجديد فى نظرى

و بعدين ان شاء الله
لما ربنا يرزقنى واحدة تتقدم لى

هبقى أقولكم تجاربى العاطفية

آدينى قاعد فى بيتنا منتظر

و ربنا يبعت

ههههههههههه



جزاكم الله خيرا

د.حمـــاس

فرنسا هانم said...

اذا ذكر الزواج فخير من تجيب فرنسا هانم
وسع
كله يوسع
انا طبعا
هسجل حضورى بس
اتكلم اقول ايه ؟
ابن الحلال مستنياه من 39 سنه واتاخر
يمكن الموصلات

Soooo said...

ربنا يهدي سركم يارب
ويباركلكم في بعض
ويبعد عنكم ولاد الحرام من الانس والجن


سلميلي على يوسف


كل سنه وانتي ويوسف وابو يوسف طيبين



سلامووووووووز

Anonymous said...

الفاضلة / Doba
كل عام وحضرتك و الأسرة الكريمة بخير ، كل ما أقرأ لكى بوست أشعر و كأنك أم للجميع على الرغم أنك فى مثل أعمارهم أو أصغر لانك صاحبة قلب كبير ، تحياتى و أحتراماتى لشخصك الكريم
أبو خالد..

mohand said...

السلام عليكم

يرجع بالسلامه ان شاء الله

تحياتي

الطائر الحزين said...

بحجز مكان وراجع

كاميليا بهاء الدين said...

اجمل رساله حب
من زوجة محبة لزوجها

ولكن
صعوبات الحياه احياناً تشغلنا
وندور فى فكلها
ولكن بقلب مطمئن بان هناك من ترعى
وتعطى الحب والحنان والأمان
وهى الزوجة المحبة

ولكن
هى ايضاً تحتاج الى الصدى.. فتعطى حب
يكون صداه حب .. امان يكون صداه امان

اسعدك الله واسبغ عليك من نعمه
حب .. وحنان .. وامان
وسعادة دائمة

مع كل حبى

كاميليا

son's egypt said...

السام عليكم
ممكن في كثر من الاحيان الحب بيموت لظروف الحياة ومشاغلها
ولكن علشان يرجع تاني محتاج للتجديد وللتذكير بايام الحب الاولي

رحــــيـل said...

عزيزتى هبه
الحب الحقيقى لاينتهى ابدا
رغم البعد
قد ننشغل عنه ولكن فى لحظه ما وفى مواقف عديده يظهر دائما

ربنا يرجعه ليكى بالسلامه يارب
تحياتى وحبى

Unknown said...

ربنا يارب يديم عليكم نعمة الحب
ويخليكو لبعض ويباركلكوا فى يوسف خطيبى
على فكره انا خطبت يجى 4 دلوقتى من ابناء المدونين
هههههه
ربنا يارب يرجعلك زوجك بالسلامه ويجمعكم على على خير
المهم انا اول جملتين طرحوا تساؤل نفسىبجد ح يجاوبلى عليه
ازاى نحافظ على الحب بعد لزواج وايه دورالزوجه فى ده
؟؟
ياريت ياحماتى تدينى خبرتك

عصفور المدينة said...

أستاذة هبة أحييك على ما تطرحين من مواضيع هامة
وللأسف اكتشفت انك بتكرهي التعليقات الطويلة

سأضرب مثالا بطفل صغير أول ما يولد يلعب به الأبوان ويدللـه كافة أفراد الأسرة ويتأملون في محاسنه وكل كلمة يقولها وكل ضحكة وكل حركة إصبع يتحركها

ثم يبدأ شكله في التحول ويخنشر كما يقولون ويقولوا ما بقاش لذيذ وهو في الحقيقة تحول إلى شخص جميل من جهات أخرى ويصلح لأشياء أخرى

خشية الإطالة أقول 3 نقاط

يجب على الزوجين الابتكار في الوسائل التي تجدد الحب وتنوعه

والنقطة الثانية
هي كسر هذا الحاجز والتكلم دائما بما يدور في الذهن وعدم كتمانه وهذه نقطة هامة جدا

الثالثة
هي عدم تأجيل اللحظة إن مشاغل الحياة وأحداثها كثير منا يتعامل معها على أنها مرحلة مؤقتة وتمر ولكنها في الحقيقة ليست كذلك وأحداث الحياة يسلم بعضها لبعض فإذا أجلنا فترات التجديد بحجة انتظار انتهاء مرحلة معينة فإذا بنا نفاجأ بما بعدها

وهذه الثالثة هامة جدا يعني مثلا الأم ترضع أو حامل وتنتظر أن تمر هذه المرحلة ومتاعبها لتجديد حياتها أوعلاقتها بزوجها وإحياء حبها فإذا بها بعد هذا تنشغل
الزوج مشغول في عمله وفترة ضغط عمل ينتظر أن تأتي الأجازة السنوية وطول الفترة هذا هو ما يولد الفتور

مثلا يوجد مرض لقريب أو وفاة أو ما شابه وننتظر أن تمر الظروف حتى "لنبث زهور المحبة" هذا خطأ
ولننتبه أن هذا الأمر هو من العبادات وأيضا دائما يوجد في عمق الانشغال فجوات ووقت مستقطع وينبغي للإنسان أن يعي قيمة اللحظة ويحسن استغلالها

فى القلب said...

أنا عارفه أن حاله كده من ضغوط الحياه

وأن الحمل ذاد بعد زياده أسعار كل شئ

ربنا ينتقم من ألى كان السبب


عموماً

ممكن يوم الخميس ننيم الواد بدرى ولا نبعته عندسته
ونحضر أكل صينى أو أيطالى
ونلبس الحته الزفره بتاعت المناسبات ألى زى دى
مع كام شمعه كده من أم ريحه
و نسيب الباقى على ربنا

وبقى بلغينى الزبون أخباره أيه

الراقـــص مع الذئـــــاب said...

السلام عليكم
ازيك يا استاذة هبة
كل سنة وانتي طيبة

معلش يمكن انا مليش خبرة في الكلام دا عشان لسا مجربتش

بس مش ممكن الكلمات الرقيقة ديه لو اتقالت علي الهوا كدا من غير مدونة تبقي احسن
والا اقولك علي حاجة حلوة

اكتبيها في جواب وحطيها في جيبه

والله نفس الكلام دا لو قرأه في جواب منك او سمعه منك شخصيا هيغير حجات كتير

اكيد هو محتاجلك وبيفكر زيك كدا


اللهم اجعل ايامكم كلها سعادة ورزقكم رغد العيش والزرية الصالحة في طاعته


سلام بقي عشان عاوز اناااااااااام

أحمد سلامــة said...

جميل منك مدافعتك عن مشاعر جميلة لا تعود بعد الفقدان
لا تياسي
لاتستسلمي
حاربي
ولن تخسري في الدنيا اكثر من
وداع الحب

دكتور حر said...

بقول ايه

ربنا يسترها معايا
انا لسه خاطب ومعرفش القصص دي ايه

لكن انا اتفق تماما وأعتقد ان الحل فيهم

مع تعليقات
خيخه
وعصفور المدينه

ربنا يجمعكم في الدنيا والآخره ان شاء الله

غمض عينيك said...

الحب بيفضل بعد الجواز
لكنه بيهدى
قبل الجواز الحب بيزوده الشوق واللهفة لمقابلة الحبيب
لكن بعد الجواز تفضل العشرة والألفة والتعود
لكن اساسهم دايما بيكون الحب
من غيرة صدقيني بتبقى الجنه نار

ربنا يسعدك يادوبا ويريح قلبك
محمد سمير

no chance said...

السلام عليكم
بعد مقرات الموضوع والتعليقات
شدنى جدا تعليق
princess dodo
هى اكتر راى واقعى
للاسف


موضوع محترم

خالص تقديرى وتحياتى

Yahia said...

بسم الله الرحمن الرحيم
انا قرأت كل تعليقات الأخوه والأخوات الأفاضل اللي علقوا وفيه منها حاجات كتتتير مظبوطه بالكلمه والحرف، وأحب هنا أوضح رأي في موضوع الأخت هبة علىالرغم من أنها عرفاه كويس بس برده في الإعادة إفادة.....
منذ بدأ الخليقه وفي راجل وفي ست وكل واحد منهم ليه احتياجات اللي بيطلب من الطرف التاني انه يوفرهاله، وطبعا مع أختلاف النوعين (رجل - إمرأة) بتختلف معها كل حاجة من الاحتياجات ومفهومها ووقتها فبنلاقي مثلا مفهوم واحد بيترجم بشكلين مختلفين عند الطرفين دول مثال: لو الراجل طلب معاشره جنسية الست بتطلب مشاعر مش معاشره، لو الراجل طلب تفاهم وحوار الست بتطلب حب. وده على نفس الخط وفي نفس اللحظة يعني المفهوم الواحد بيترجم عندك كل طرف بشكل تاني. انا متفق جداً ومقتنع ان الحب مش بيموت أبداً ولكن بياخد صور تاينه فمثلا ايام المراهقة بيكون حلم ومشاعر جميله صافية مش باين فيها اي مسئوليات وبالتالي شكلها بيختلف، أيام الخطوبة بيكون فيه شوية ثقة وكمان مشاعر حالمه، بعد الزواج بيفضل موجود بس بشكل تاني زي التفاهم والتواصل والإحساس بالأخر بدون كلام وشرح كتتتتير. ويبقى غلطان جداً اللي يتصور أن أي مرحله ممكن أن تستمر على طول. نعم التغير مطلب وفي بعض الاحيان يمكن أسترجاع وتنفيذ بعض المشاعر والتصرفات من المراحل المختلفه بس ده بيكون شيء عابر مش هيستمر. نهايك بقى عن مسئوليات الحياة والاسعار والمواصلات والفساد السياسي والتخبط الحكومي وعدم التخطيط والشغل ومشاكله ...... الخ يعني مفيش حاجة بتساعد على استمرار الحب بالشكل اللي الاخت الفاضله بتطلبه وتسألأ عنه. واحب اوضح هنا ان كلمة السر الرئيسية لإستمرار أي حاجة في حياتنا أو شغلنا أو تهريجنا مع الاصدقاء او علاقتنا العائلية أو أي حاجة هي كلمة المرونه ويليها التفاهم لكن الحب وحده في بدايةالامر لن ينجح في التغلب على صعوبات الحياة كذلك مينفعش نبدأ به لازم يكون فيه مرونه وود وتفاهم وتحمل وبعد كده الحب. معلش اتكلمت كتتتتير ويمكن في افكار مش عارف اوضحها أكتر من كده بس أتمنى أن الاخت الفاضله يكون وصلها الكلام المره دي.

تحياتي

Anonymous said...

الحب لا ينتهى بعد الزواج
قد تاتى عليه فترات ضعف لا اكثر ولا اقل
الرجل طفل كبير
يحتاج الى رعايه واهتمام
الى تجديد
الى تشويق
الى تغير
جددى كل شيء تستطعين تجديده
اجعليه يراك كل يوم امراه جديده
تختلف عن امراة اليوم السابق
وادعى الله ان يساعدك
لكن لا تياسى
ولا تتركى ساحة المكركه
فهى ملكك
تحياتى

Anonymous said...

يخربيت الجواز وسنينه ،، يا بت انا كنت سايباكي كويسة يا عين امك يا ضنايا،، معلش هيا كده سنة الحياة ،، بعد الجواز كل حاجة بتتغير ،، معلش يا حبيبتي بس انا اعرف محامي خلع زي السكر ،، وساكن في المدونة اللي جنبك كده تاني يمين علي ايدك الشمال ،، وربنا معاكي يا حبيتشي يا ختشي
بنت من شبرا

Ehab said...

يا جدعان انتم عمالين تصبروها كده وتقولولها الدنيا ومش الدنيا

دي بتبعد عنها الحسد
بتخزي العين عنها
بالزمه في واحد فنان زي يحي الدنيا هتاخده عن احبابه كده
طيب ادخلوا مدونته وشوفوا اشعار زمان اللي بيحبها

اعتقد ان البوست عن الفكره بصفه عامه مش تجربه شخصيه

ده اولا
اما التعليق بقى

التعود
التكرار
الملل
المشاكل الحياتيه الصغيره
العناد
اعتقد دي اكتر حاجات بتخلي الحب بعد الجواز يفتر شويه او يبدو عليه الفتور

ولو ان ممكن علاجها لو الطرفين عايزينن يعالجوها
ناس تقولك لا الست في ايدها كل حاجه وممكن تظبط الدنيا وتنعش جوازها بأيدها
ده كلام كويس
بس انا اعتقد ان المثل بيقول القفه ام ودنين يشيلوها اتنين
يعني لازم الطرفين يكونوا ناويين انهم يشوفوا ايه اللي حصل ويعدلوا المركب قبل ما تغطس في الطينه اللي على الشط

هو الموقف عامل زي المركب في النيل
ماشيه براحه قوي بسبب رتابة الحياه والأنشغال بهموم ومشاكل الدنيا اللي هي ورد النيل مثلا والتلوث وبعدين التيار الهادي ده ياخدهم وهم مش واخدين بالهم ناحية الشط
قوم تلاقي انهم بيحسبوا ان ده هدوء حلو علشان الحياه مستقره بس المصيبه انهم رايحين ناحية الطين اللي على الشط فالمركب بتنغرس فيه ومش بيعرفوا يخرجوها الا بمعجزه
علشان كده لازم كل اتنين ياخدوا بالهم من المركب قبل ما تغرس في الطينه
وبرده ميسيبوش التهييس والمشاكل اللي عامله زي التيار الجارف تاخدهم ناحية الشلال اللي هتغرق فيه المركب

وختاما سلمولي على المركب وعلى الواد الدفه يوسف
وعلى الشراع دوبه
وعلى الموتور والمجداف يحي

اخوكم مراكبي معدي بالصدفه ايهاب
سلاااااااااااااااااااااااام

السـيد شبـل said...

هبه ... ازيك اتمنى تكونى بخير

واتمنى ان يعودلكى زوجك بخير

ولو انى لا ارى حبا بعد الزواج
هى الحياه كده
زواج او حب

عموما

موضوع مهم للغايه ......

يكشف الستار عن المؤامره الصهيونيه على المدونات

تجدونه على
مدونة السيد شبل بلا اسم


www.bela-esm.blogspot.com

نفرتيتي said...

أزيك يا دوبا وحشتيني خالص علي فكرة انا زعلانة منك عشان مش بتيجي وتزوريني المهم يا دوبا الكلام اللي بتقوليه ده واقعي ولا من خيالك يارب يكون العكس
الحب دايما بيجيلوا فترة وينقص عن الاول وده بردوا سببه مطالب الحياة الكتير لكن انا عارفه انك انسانه رقيقية لو حاولت انك تعملي حاجات ملموسة في حياتك وتغيري شويه الروتين اليومي متهيالي هيتغير الوضع تماما وانت عارفة اكتر مني اتمني يا دوبا تكوني انت ويوسف بخير وبرضه اتمكني انك تزوريني لاني شوية ايام وهكتب حاجة جديدة عني هي سعيدة ومقلقة في نفسش الوقت وانت اكيد مريتي بيها بس مش عارفة اخد قرار فيها اظن انك فهماني دلوقتي ياريت تساعديني بكلامك اللي بيريح وتقوليلي وتنصحيني ذي ما حصل معاك

خلي بالك من نفسك والمهم من ابو يوسف كمان اوي اوي ويوسف وانت ممكن تستعيد الحب اللي كان بارادجتك انت وممكن يكون اقوي من الاول بمراحل كتير بس ركزي انتي اوي

الطائر الحزين said...

متأسف على التأخير فى الرد

الحب موجود وهو المحرك الاساسى بدليل ان كل من الزوجين يسامح الأخر عن شىء أغضبة فطالما ان هذا التسامح موجود اذن الحب باق

لكن هناك تحولات فى فترات العمر المختلفة وجوانب أخرى تتكشف مع مر السنين

اللهم بارك فيكما والف بين قلوبكم اكثر واكثر

جزاك الله خيرا

Rosa said...

لا يا دوبه
اتعودنا عليكي دايما متافئله كدا
و النهارده تقولي وداع يا حب؟؟؟
ممكن نقول الحبالي واخد هدنه شويه
او الحب المستخبي في رداء آخر كدا يعني
المشكله ان الرجال طريقة تفكيرهم و قياسهم للالمور بتختلف عنا
ودا الي بيخلينا نحس انهم بعدوا عنا او معادوش بيحبونا
و اكيد انتي ست العارفين
دوباااااا مابحبش اشوفك متشائمة بليززززز
ربنا يسعد كلايامك يا رب

الحب واشياء اخرى said...

‏ عن الاشواق سألوني

أشقانى جفاءك وأعيانى طول إنتظارك

الاشواق هي روح الحياة‏..‏

وهي قريبة الشبه من الآمال والأمنيات‏..‏

لأنها في النهاية تعلق بوجود غيرالموجود‏!!‏

ولو فقد الانسان آماله وأمنياته‏‏

لفقد روح الحياة نفسها‏.‏

وفي الحب‏ تقوم الأشواق بنفس المهمة‏

تماما كما يقوم الشجن‏..‏

في الحب مقام الحزن‏‏ في الحياة العادية‏!!‏

إن الاشواق شواظ من نار‏..‏

وقطرات من عطر‏!!‏

يصطلي القلب بها موجوعا بألم البعاد‏..‏

وتتعطر الروح بها

ملحوقة بعبق اللقاء‏!!‏

إن الذين لا يأملون‏..‏ لايعيشون‏..‏

وإن الذين لايتشوقون‏..‏ لايحبون‏..‏

فالحب شوق‏..‏

في القرب شوق‏..‏

وفي البعاد شوق‏..‏

وحين تشعر بأنك‏(‏ تشتاق‏)‏ إلي شخص رأيته‏‏

فقد بدأت تقرأ أول حروف الهجاء

في الحب‏!!‏

تحياتى
على

البِـئرُ والظمّأْ said...

سلام الله عليكي يا هبهوب يا قمر


ياااااااه ايه الكلام الجامد و الحب ده
بصي يا هبهوب
انتي روحي اعملي صنيبه بيتزا كداهون حلوه من ايديكي
و هوا هيصالحك علطوول



شكله مزعلك


تحياتي يا قمر ليكي
و كل سنه و انتي طيبه


زيزي

shahy said...

بعد السلامات والتحيات

احب اقول للأستاذ يحيى
كلامك صحيح واعتقد اني فهمتة بس بصعوبة شوية يمكن دة غباء مني بس هو دة اللي حصل
انا هاقولك على حاجة زعلتني شوية وممكن جدا تقول عليا تافهة بس عادي مفيش مشكلة
شوف ياسيدي انا زعلانة من استخدامك لكلمة الاخت الفاضلة هبة
عارفة هاتقولي تاني
ايوة تاني وتالت ورابع كمان
هي مش اختك هي مراتك وام ابنك وحبيبتك كمان
كل الناس اخواتك الاهي
انا عارفة ان كلمة اخت جميلة بس بتبقى وحشة لما تتقال على الزوجة

وبعدين تعالى هنا انت لية اخدت نص كلامها ومااتكلمتش على النص التاني
هي بتسأل هل الحب بيموت بعد الزواج؟
وحضرتك تفضلت مشكورا وشرحت رأيك وقلت انة مش بيموت

وهي قالت كمان انها مشتاقة لزوجها وحبيبها جدا

اية بقى؟ مش عاوز تقول حاجة في الموضوع دة

ماشي ياعمنا ربنا يعينك في شغلك وفي الحياة الصعبة بس احنا برضة غلابة واي كلمة حلوة بترضينا
يالا ياراجل روح قولها وحشتيني
..................
اما انتي يادوبة
مش هاقولك اي حاجة لانك عارفة كل الكلام اللي ممكن اقولة لكي
والشنكوتي الكبير قال كلام حلو خالص

ربنا يهدينا جميعا ويسعدنا بأذن الله

خمسة فضفضة said...

السلام عليكم ورحمة الله وبركاته

رقيقه اوي كلماتك يا دوبا
مانكرش انه بعد فتره زواج بيحصل فتور جزئي في العلاقه
واو اهملناه بيتحول لفتور كلي وتنكسر حاجه جوا الاتنين
بس الرك علي الزوجه الشاطره اللي تقدر انها تجدد حياتها كلها وحبها

ازواجنا برضو معذورين ماهم مربوطين في ساقيةالجري ورا لقمة العيش و دوامة الحياه واخداهم


سلام يا قمر

Anonymous said...

كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا

micheal said...

يموت بسبب النظره الخاطئه للجواز و بسبب الانانيه من كل طرف
سيبتلك كومنت تاني ع البوست الماضي
:)
تحياتي لكي

فرنسا هانم said...

هو احنا هنقعد كل كام يوم ندور عليكى ؟؟؟؟ظ
انتى بتروحى فين يابنتى وسايبه المدونه لوحدها من غير اكل ولا شرب ولا نسكافيه ولا اى حاجه
طمنينا عليكى

السـيد شبـل said...

موضوع هايل وتمنياتى بالتوفيق

ممكن استغل المساحه للاعلان عن موضوع غايه ف الاهميه



ادعوكم لزيارة مدونة


السيد شبل ... بلا اسم

www.bela-esm.blogspot.com


للتعرف على اهم مبادره للتقريب بين الاخوان والناصريين وايضاح صوره كامله حول الاشتراكيه الاسلاميه




لكم خالص تحياتى وتمنياتى بالتوفيق

السيد شبل

Omar... [ خروشات ] said...

بما انك من اسبوع لم تعلقى على البوست

يبقى اكيد اسباب كتابة البوست زالت

و لو لسه؟ هانصحك نصيحة جديدة وغريبة بصفتى راجل متزوج من اكتر من 17 سنة ولسه بقول لمراتى نكتة كل صباح وااقرا لها شعر كل مساء

موش هاقولك نصائح ومنشورات عسكرية و بيانات حربية زى اللى مكتوبة فى التعليقات اللى فوق


هاشور عليكى فقط تتفرجى مع زوجك الكريم على فيلم رجل الطقس بتاع نيكولاس كيدج

Weather Man

نصيحة غريبة شوية بس احسن من المارشات العسكرية و النصائحة الحجرية

انا بفكر اكتب بوست مخصوص عن جزء صغير جدا فى الفيلم ده


عام سعيد وجديد

و قلب اخضر ومفيد

و حياة سعيدة وعمر مديد

قولوا أميييييييييييين


اخيكى عمر،

Anonymous said...

السلام عليكم هوبه بصى يا حبيبتى مفيش حد بيختار حياته ولا بيختار تمشى ازاى يعنى فيه حاجات بتتفرض علينا بمعنى اننا لازم نتفهم ازواجنا ونصبر عليهم كمان فى وقت الزعل والخنقه والشده واكيد برضه الازواج مش علطول نكديين انما الموضوع محتاج تفهم مننا وعلى فكرة لو الراجال قومون على النساء فالنساء اكثر تحمل من الرجال على مشاكل الدنيا صدقينى حاولى بس تتفهمى جوزك ده لو الكلام عليه اصلا بس اتمنى انه يكون كلام عادى عارفه الراجل دايما بيحب الست اللى تتفهمه تحتويه مش شرط هو اللى دايما يدى حب وحنيه لأساعات بيكون محتاج ليهم اكتر منك انتى ومين ساعتها هيدى الا الزوجه والحبيبه .الراجل طفل يحب مراته زى ما بتدلل عليه تدلله برضهوصدقينى احسن صفه فى الزوجه الاستماع لزوجها وتفهمه وتكون حنونه عليه اتمنى كلامى يكون وصلك واقول سلام لانى طولت عليكى اختك حنين القلب

احساس لسه حى said...

عزيزتى
لو حب مش هيموت اللى بيموت يبقا مكنش حب
بس الحب ليه طرق كتير وبتتغير مع تغير الزمن والوقت والوضع
وساعات يكون انشغال الرجل بشغله لكى يوفر حياه كريمه لمراته واولادة من احلا انواع الحب المهم كل شئ بحدود والزوجه تقدر ايه الحدود دى
تحياتى
مستنى زيتك للاهمية والضروره
سلام

نفرتيتي said...

ازيك يا دوبا انتي عاملة ايه وازي يوسف معاكي والنبي طمنيني عليكي انا مستنية ردك

Anonymous said...

Dobaالفاضلة
أشتقنا لردودك الجميلة ،أنتى فين أخيك
أبو خالد

مدحت محمد said...

يابخته
بانك بتحبيه كل الحب ده
اعتقد الحب بيزيد مش بينقص بس
ممكن مسئوليات الزوج وظروفه بتفرض عليه
الواقعية اكتر من الرومانسية
وضغوط الحياة
اعتقد انه يكون رومانسى
بيعتمد على ذكاء المرأة نفسها
انها تخرجه من الهموم دى
وتشاركه فيها
والله اعلم
انا لسة فى قائمة العزاب
بس ده اعتقادى
خالص تحياتى ليكى

Doba said...

yahia

اهلا وسهلا بصاحب السبق الذهبى
تصدق نورتنى
والله نورتنى
اتفضل غدا ياراجل ولا حاجة

يلا مستنية اهو التعليق
=================
princess dodo

هو يمكن بيتحول لحب عشرة ومودة واعتياد بس فيها ايه لما الواحد يرجع لورا شوية ويرجع احساس متميز

انا بصراحة مقدرشى اعيش من غير حب

اشكرك يا ارق برنسيسة
تحياتى
===========
بت خيخة وأى كلام

وهو انا اقدر ألقح على جوزى برده ده حبيبى الغالى بس هاتى ودنك لما اقولك عالسر

انا بس يا بنتى نفسى يحب الحياة ويعيشها وهو مبسوط وفرحان ويقضى اوقات حلوة بدل مالهموم متكسر أكتافنا والحمل بيتقل علينا وعمره مهيخف علشان نقدر نعيش مبسوطين

بس خلاص
غلطش انا بقى

يلا حصل خير
الا انتى طابخة ايه النهاردة
سلام يا اجدع خيخة
يا مفجوعة
============
عصفور المدينة

فى انتظارك دائما والف مبروك للعروسين ولاصحاب الفرح
============
ghalia

اهلا بزيارتك الغالية
انا لا أحبذ انه يموت اصلا انا بنادى بأن رايته تكون مرفوعة دايما

يلا نادى معايا
بيب بيب
عاوزين نحب

ههههههههههه
نورتينى
تحياتى
=============
dr. hamas

اهلا بيك وبزيارتك الأولى لعالم دوبه أخو عالم سمسم كده

هو فعلا احنا دايما ومن وقت للتانى وسواء متجوزين ولا لا بنتضايق كلنا من الرتابة والملل ولازم وضرورى الريفرش يتعمل ويتعمل صح قوى

روح يا حماس اللهى يرزقك باللى تيجى تتقدملك وتطلبك من طنط - قول آمين

نورتنى
تحياتى
===========
فرنسا هانم

الغالية حبيبة الغاليين
ياختشى المواصلات بقت صعبة قوى اليومين دول جربى كده تركبى المترو بييجى بسرعة

كله والله قسمة ونصيب ولو علمتم الغيب لاخترتم الواقع ربنا بس يباركلنا فيكى

نورتينى يا غالية
تحياتى
==============
sooooooo

دعوة جميل ربنا يتقبل منك ويوسف بيسلم عليك قوى وبيقولك يا عمو يا تخين تعالى احكيلى حدوتة

تعالى بقى بسرعة متتأخرش
نورتنى يا ابو كرش
تحياتى
=============
أبو خالد

الأخ الفاضل
أشكرك حقيقى على الكلمات الرقيقة اللى كل مرة بتغمرنى بيها اشكرك وادعو لك بكل الخير انت واسرتك الغالية

تحياتى
===========
mohand

وعليكم السلامة
حد قالك انه مسافر
ياريته مسافر
ده الزوج بيكون فى بيته وبعيد بمشاعره وده بيبقى شعور اقسى وبيعذب اكتر واكتر

نورتنى يا افندم
تحياتى
============
الطائر الحزين

مستنياك يا افندم
===========
كاميليا

الرقيقة دائما
العذبة دائما

بنوتى حبيبتى
اشكرك على كلماتك الحلوة اللى بتخلينى فى منتهى السعادة

اللهى ربنا يسعدك يا كوكى يارب
بوسات بوسات
==========
son's Egypt

يعنى كل المطلوب سعادتك التجديد والذكرى بس الرجالة الذكريات معاهم بتنعدم

ادعى انت بس من قلبك يصلح كل احوال المتجوزين ويقرب بين قلوبهم

تحياتى
============
raheel

بيعجبنى اسمك قوى هفكر اسمى بنتى اللى ناوية اجيبها كده بس قولى يارب

ييجى بالسلامة يارب بمشاعره دايما وميتنيهوش

انا قربت اعمل نداءات على محطات الاذاعة والتليفزيون

نورتينى
تحياتى
=============
لماضة

بت يا لماضة
انتى يا بت بتفرحينى
والله بتفرحينى
مش عارفة ليه
بس بحسك غالية كده وليكى مكانة خاصة

اخطبى اخطبى ولا يهمك لما نشوف هتقعى فى أرابيز مين - اقصد مين اللى مامته داعيه عليه- يييييه قصدى ليه

ربنا يباركلك يارب
تحياتى
==============
عصفور المدينة

نورتنى تانى يا افندم
انا حابة اوضح لسيادتك انى بحب التعليقات جدا والبيت بيتك يعنى تتكلم وتقول براحتك انا بحب رأى كل الناس ويكون كامل والتطويل عندى معناه انك اهتميت وكتبت وده بالطبع شىء يزيد فرحتى

كلماتك جميلة وانا بستفيد منها واتمنى غيرى يستفيد هو الآخر ولذلك أثرت الموضوع

اشكرك لاهتمامك الغالى
دمت بكل الخير انت والاسرة
تحياتى
=============
فى القلب

مش عيب كده
عيب ولا مش عيب
مش عيب كده قدام الناس النصايح دى
يا كزوفى يانى

طب استخبى ولا اعمل ايه
مشكرين يا باشا عالنصايح
نعمل ايه احنا بس من غيرك يا بطاطس

نورتينى
==========
الراقص مع الذئاب

المشكلة فى الكتابة - الواحد بيقول وبيبث مباشرة مشاعره ولكن بتقابل بالجفاء الناتج عن الضغوط الكثيرة فيجب عمل البث المباشر والحى وعلى كل المحطات يمكن سيادته يقرر انه يتواصل

عقبال مفرح فيك

على فكرة
من اكتر الحاجات اللى خلتنى اكتب كده انى اثير نقطة للى متجوزوش يمكن يقدرو يتلاشوا الوضع ده بعد الجواز ويقدرو يستمتعو بوقتهم

نورتنى
تحياتى
===========
أحمد سلامة

لن أيأس - فأنا لا أستطيع العيش بدون الحب
لن أستسلم فهو أغلى من أن أضحى بحبى له
لن أوعد الحب - لانه هوائى الذى أستنشقه

اشكرك كثيرا كثيرا
تحياتى
==========
دكتور حر

ربنا يبارك ليك فى خطيبتك ويارب تقدر انك تتلاشى انك تتلاشى شاعرها وتعيش معاها احلى أيام

دمت بكل الخير
انت وخطيبتك الغالية
ربنا يبارك فيكم ويجمعكم على كل الخير
=========
غمض عينيك

الله يخيلك يا محمد يارب ويبارك فيك - ايوة يا اولاد دافعو عن الحب واوعو تتنازلو ابدا

ربنا يخليكو ليا يارب
نورتنى
==========
no chance

ماشى ماشى
انت تقصد ايه تعالى هنا
لالالالالا لازم حب ويقما فلا عيشة هنيئة
سامع ولا اجيب الخرزانة

نورتنى
تحياتى
==========
Yahia

اهلا اهلا بالحبيب الغالى
هو ده يا جماعة اللى تاعب قلبى وشايل الهموم كلها فوق قلبه وعقله وكيانه ومطنشنى - هههههههههه - عارفة هتضرب بس ولا يهمنى

كل كلماتك عارفاها بس انت عارف ان كل اللى بتمناه انك تعيش مبسوط ومرتاح وسعيد قوى

اى حاجة ممكن توصلك للشعور ده انا ممكن اعمل كل جهدى علشان تكون كده

ربنا يباركلى فيك انت ويوسف ويبعد عننا الشيطان ويحفظ دائما الود بيننا يا أخ يحيى

نورتنى
تحياتى
=========
lonely

لن أيأس
ولن أترك الساحة
وسأجدد كل ما يحتاج تجديده

اشكرك
نورتنى
وتعالى دايما
===========
اهلا اهلا بشبرا وبنات شبرا
ممكن عنوان محامى الخلع علشان اديله علقة - انتى جاية تهدى النفوس شكلك كده

مشكرين يا غالية النصايح المذهلة
نورتى
==========
الشنكوتى الكبير

يعنى نضربلك عيارين عالهوا علشان البقين الحلوين اللى قلتهم

شكلك طمعان فى الشيكولاتة والعصير بتوع يوسف وعاوز تقاسمه فيهم

عموما براحتك واصطفى انت وهو بقى
شكرا يا إيهاب على كلامك بجد أسعدنى
ومنونى دايما بكلامك

تحياتى وعقبال مفرح فيك
===============
السيد شبل

مؤامرة ايه يا بنى اللى بتتكلم عليها وايه الكلام الكبير ده

هدى نفسك كده واشرب بق ميه ونام
خخخخخخخخخخخخخ

تحياتى
===========
نفرتيتى

انا جيت والله اول مقولتيلى بس انا والله بدخل النت قليل اليومين دول محلش سامحينى

يارب تكون اخبارك حلوة وسعيدة ويسعدك دايما يارب
===========
الطائر الحزين

مشكلة موضوع التحولات دى مع فترات العمر المختلفة بجد موضوع كبر واتمنى حد فاهم يكتب فيه صح لانى اقل كتير من انى اكتب عنه لسه خبرتى قليلة على كده واهو نتعلم

تحياتى لام الأبناء واشكرك
نورتنى يا افندم
=============
rosa

انا متفائلة وكل حاجة بس انا بثير موضوع مهم بين الأزواج

انا بعمل بمعنى آخر مظاهرة علشان نرجع الحب - ازى متفهمنيش

نورتينى يا احلى روزا ياللى بنهادى بيكى الأحباب

تحياتى
==============
الحب وأشياء أخرى

حلوين قوى يا على الكلمات اللى جبتهم بس تفتكر ممكن يفرقو لما راجل متجووز يقراهم مش عارفة قولى انت؟

نورتنى يا افندم
تحياتى
==============
meekness

بيتزا ياريتها تيجى عالبيتزا - تفتكرى هيه الحل

طيب اجيب من انهى محل
ده انتى طيبة قوى

الموضوع معاميقى قوى
نورتينى
=========
shahy

اهلا اهلا بست الستات
الفين سلام وتحية

نورتينى يا قطة ورسالتك وصلت تماااااام تمام يعنى

تحياتى يا غالية
فين النيسكافيه يابت
يلا باى
===========
خمسة فضفضة

اولا اشكرك على الايميلات
ثانيا انا مش عاوزة يكون فيه فتور لان الواحد ممكن يجدد فى خمسميت اتجاه والعيب عاللى يكسل وميجددش

ربنا يسترها علينا نعيش فى سلام

نورتينى يا داكتورة
=============
وينكى

والله ليكى وحشه يا استاذة

نورتينى
==========
micheal

ممكن كلامك يكون صح وان الاناينة بتقل كتير لو موجودة بس لما تكون عندك نظرة صح وبرده مش سعيد تعمل ايه

برده انا مستنية افرح فيك
وهفرح فيك
وانا اهو وانت اهو
وكل سنة وانت بكل الخير
==========
فرنسا هانم

اهلا يا غالية
انا جيت اهو والله
والمشاريب مفتوحة والاكل كمان بس انا مبخدمشى كل واحد يهلب يور سيلفز

انا شايلة الكهربا مؤقتا طول مانا مش موجودة علشان الناس متزهقشى

يلا باى
===========
السيد شبل

انا جااااااااااى
فرافيررررررررررررو

سلام
===========
خروشات عمر

والله بيعجبنى كلامك بحسه جاى من حد محنك فى المجال وعن خبرة بس ممكن لو سمحت ابقى اكلم المدام اشوفها بتعمل ايه علشان تقولها كل يوم نكته ومخلياك عندك تفاؤل للححياة والله مبهرج

انا يسعدنى انى اتعلم حاجة تضيفلى وتسعدنى واسعد بيها اغلى انسان عندى

هحاول اجيب الفيلم
واضح انه هايل

نورتنى يا عمر
بجد أسعدنى تعليقك
=========
حنين القلب

كلامك جميل قوى واسمك اجمل
ربنا يديم عليكى العقل والحكمة ويسعدك يارب

نورتينى وهنتظرك دائما
تحياتى
==========
احساس لسه حى

ممكن نوفر الحياة الكريمة ونكون سعداء برضه لكن ايه لزومها الحياة الكريمة واحنا تعساء وبعيد عن بعض

بالاضافة انى بالنسبة لى انى اعيش سعيدة اهم من اى حياة كريمة

النهاردة مش هييجى بكرة تانى
فاهمنى
نورتنى وانا روحت وقريت الموضوع متميز
============
نفرتيتى

انا كويسة والحمد لله وهاجى ازورك حالا
تحياتى وشكرا للسؤال
==========
أبو خالد

انا أهو أخى الفاضل ولكن لزم ترتيب الأمور بعض الشىء

أشكرك لودك الدائم وسؤالك المستمر
دمت بكل خير
تحياتى
=============
doha

اه والله بحبه كل الحب ده واكتر
عقبال ربنا ميرزقك باللى تحبك قد كده وعشر اضعاف كمان

نورتنى يا مدحت
أسعدك الله دنيا وآخرة
تحياتى
=============

ربنا يباركلى فيكم كلكم ودمتم جميعا بكل الخير والحب

تحياتى لكل الاخوة فى الله
لكل الاخوات الامورات
بحبكو كلكو قوى بجد من كل قلبى

هبة

Anonymous said...

هبة حببتي الي مطنشاني ومش معبراني خالص خالص المهم يابنتي تصدقي بالله اني والله والله بستكتر على نفسي اعيش اللحظات الحلوة اليومين دول لاني خايفة اتعود عليها وافتح عيني مش الاقيها بعد الجواز الفكرة دي والله رعباني بس هعمل ايه هستعين بالله والدعاء واستفيد من خبراتكم والله المستعان تحياتي يا نسياني

د/اجدع بنوته said...

مش عارفه كل الناس المتجوزين عن الحب وبيقولوا كده

اومال اللى مش متجوزين عن حب

هيضيع منهم ايه بعد الجواز وهو مفيش حب اصلا قبله

بس معرفش بحس

ان الست بيفضل عندها قدره رهيبه ع تجديد الحب وانعاشه
مهما خنقته الظروف وضغطت عليه هموم الدنيا

تحياتى ع الكلمات

عابد الرحمن said...

شكرا لفتحك هذا الباب الشاءك في كل حياة زوجية تعاني فيها كل زوجة ولكن
ما اريد ان اخبرك به انك صانعة الحب في البيوت
وان وجدتي زوجك انغمس في مشاكل الحياة ودوماتها فاخرجيه برقتك وايمانك واخلاصك منها بكل رقة
وتحمليه اختي الكريمة
ويكفي ان الرب عز وجل منحك هذا الحب في صورة متجسدة في الحبيب يوسف ابنكم
ترى حبكم يسير امام عينك يكلمك يحبك يلاعبك يؤنس وحدتك عند انشغال الزوج الحبيب
اخيكي في الله
الاستاذ عابد الرحمن