Sunday, January 13, 2008

أحلى الأوقات

أنا مبسوطة وسعيدة النهاردة وعلى غير العادة من فترة طويلة

أيه السبب مش عارفة

قعدت أفكر

أنا عملت ايه ممكن يخلينى مبسوطة

ايه يا هبة

ايه يا هبة

-------

هل لانى حاسة انى قريبة ربنا اليومين دول وراضية عن نفسى

هل لانى قابلت اصحابى اللى بحبهم

هل لانى شربت مج نيسكافيه مضروب وقعدت أقرى بلوجات الناس الحلوين اللى بيفرحونى وبيسعدونى بموضوعاتهم وعلى فكرة بجد انا بستمتع جدا بإنى أقرالكم كلكم أكتر من انى اكتب حاجة لانى مليش فى الكتابة أصلا

-------

يا ترى ايه يا هبة

هل لان الواد يوسف بقى بيكبر حبة وبقينا نفهم بعض

هل لان الأخ يحيى جوزى مبسوط ومرتاح نفسيا شوية على غير المعتاد

-------

اااااااااااااه

انا عرفت اللى فيها

وهقولكم

--

انا فعلا لما لقيت انى قريبة من ربنا وان جوزى مرتاح نفسيا وابنى بقى لذيذ أكتر وعملت نيسافيهى المعتاد وقريت حاجات حلوة بتسعدنى منكم وخرجت مع أصحابى اللى بحبهم وبرتاحلهم بقيت كويسة وبخير وسعيدة ومنطلقة

----

وقررت إنى أشارككم يومى وفرحتى

وأقولكم

يا ترى هتاخدو ايه من الحلو اللى فى يومكم النهاردة علشان تكونو مبسوطين وسعدا وتقضوا انتو واسرتكم يوم فى منتهى الروعة

يا ترى أنهى نعمة من نعم ربنا هنقول النهاردة عليها الحمد لله قوى

---

أوصيكم بالأستغفار الكثير اليوم وأبدا

كما أوصيكم بشكر الله كثيرا

80 comments:

الـسـيـدة نـون said...

هييييييييييييييييييه
انا اول واحدة
بوست مليان فرحة يا بت يا دوبا
ربنا يسعدك يارب
ويجزيك عنا خيرا بكلامك اللى يخلى الواحد يحسن من نفسه دايما
تشكرى يا دوبا
بوسيلى يوسف كتيييير
اختك خيخة

دكتور حر said...

فعلا زي ما خيخه بتقول

تدوينه مليانه فرحه
ربنا يسعدك كمان وكمان

والسعاده كل السعاده في القرب من الله

وفي طاعة الزوج

ربنا يكملكم بالجنه ان شاء الله

Anonymous said...

ده اول تعليق ليه
ربنا يسعدك كمان وكمان
وربنا يدخل الفرح لكل بيوتنا
ما أجمل ان يكون الانسان سعيد فعلاً وبالذات لما يكون سعيد بأدائه لفرائض ربنا والعبادات
اخو دكتور حر

رئيس جمهوريه نفسى said...

ربنا يسعدك كمان وكمان وتكونى لربنا اقرب وعلى حخب وود انتى وجوزك وابنك يوسف يكبر اكتر لحد ما تفرحى بيه يارب وتشوفيه عريس
ممكن مج نسكافيه معاكى
محمود

Ehab said...

ربنا يديم عليكي سعادتك
ويديمك على الطاعه
ويبارك لك في ابنك وزوجك وحياتك وامك
ربنا يسعدكم
وسلامي ليحي ويوسف

انا بقى هاموت من النعس طول اليوم
والحمد لله انا برده من يومين كده كنت متوتر بس في نفس الوقت مبسوط ومتحمس لحاجه ناوي اعملها والحمد لله
على كل حال

سلااااااااااااااااااااااام

Anonymous said...

الأخت صاحبة القلب الكبير أسعدك الله كما أسعدتى أصدقاء مدونتك وبارك الله لك فى زوجك وأبنك و جعلك فى صحبة خير البشر على الحوض بعد عمر مديد
أخيك أبو خالد

MerMaid said...

شوفي يا ستي
انا اول مرة اجي عندك هنا

و بجد حسيت ان كلامك طالع من القلب
وفعلا لما الواحد بيلاقي اللي حواليه كويسين ومرتاحين و هو كمان كويس و مرتاح
وعلاقته بربنا كويسة وموصولة
بيحس ان هو سعيد قوي
ربنا يديم عليكي رضاه ونعمته يارب

انتي واهل بيتك كلهم
:))

mermaid

MerMaid said...

بجد
انا سعيدة قوي بمعرفتك في الظروف الحلوة دي

ربنا يكرمك
:)

عصفور المدينة said...

دامت سعادتك في طاعة الله وبارك الله لك في زوجك وولدك

فرنسا هانم said...

ربنا يسعدك كمان وكمان يا هبه
انا مبسوطه جدا انكى فرحانه
ويارب
يارب
تفضلى كده فى سعاده وهناء
وسلامى وقبلاتى ليوسف

3ala asm masr said...

ربنا يفرحك ويسعد ايامك كلها يارب
وفعلا اكتر حاجه ممكن تحسس الواحد بالفرحه والامان والراحه لما يبقى قريب من ربنا

Unknown said...

ربنا يسعدك ويرضيكي
ويؤلف بينك وبين زوجك
ويقر عينك بابنك
:))

الجنوبى said...

ألديكى هذا الكم من الاشياء الجميلة ولم تكونى تعرفى لماذا انتى سعيدة على كل اللهم لا حسد تحياتى

Unknown said...

يا ستى انااكتر حاجه مخليانى سعيده اليومين دول
احساسى بحب اللى حواليا الحمد لله
بحس ان ربنا راضى عنى
ربنا يديم عليكى وعلى اسرتك السعاده والهنا يارب
وسلام لخطيبى وبوسيهولى لحد ما اعرف ابوسه

أحمد سلامــة said...

وممكن نزود عليهم كمان الدعاء لكي
:)
ربنا يسعد ايامك كلها يا رب

Anonymous said...

حلو اوى البوست بسمالله ماشاءالله
بجد فيه بهجه ورساله مهمه جداااااااااا

مش ضرورى يكون يومك كله تحفه بس بدل منمسك فى الجزء الوحش ونكد روحنا عليه نمسك فى الجزء الحلو ونور روحنا وننبسط ونسعد الى حوالينا ببوست جامد كده

بجد تسلم ايدك وربنا يكرمك ياجميل
:))سلامى يا قمر

Anonymous said...

ربنا يسعدلك أوقاتك دايما يارب ويارب تكوني دايما يف اسعد حال يارب

الطائر الحزين said...

الله

اسعد الله قلبك بقربة


تحياتى

نفرتيتي said...

الحمد لله انك بقيتي مبسوطة اخيرا اللهم دامها عليها دايما واكتبي ما تكسليش

ghalia said...

حلو أوى يا هبة
ربنا يديم عليكى حالة الصفاء والسعادة الجميلة دى
وكويس كمان انك سجلتيها على البلوج هنا علشان نشاركك إحساسك ده
أنا بحب أوى البوستات اللى من النوع ده

micheal said...

ربنا يديم عليكي السعاده
تحياتي

كاميليا بهاء الدين said...

((يا ترى أنهى نعمة من نعم ربنا هنقول النهاردة عليها الحمد لله قوى))

آنا هاخد من يومى النهاردة .. صلاة فجر جميلة اديتها
وسورة يس فى الصباح رددتها
وطن ملابس ارتديتها

وصباح جميل وكلمة حلوة منك اليوم سمعتها

ما آجملك عندما تتفائلين

ادام الله عليكى السعادة والراحة والتفاؤل

يا آغلى الصديقات

كاميليا

not crazy said...

حلو

الربان said...

تحياتي

كل سنه و حضرتك و يوسف ووالده بألف خير و سلام.

الرضي ...نعمه كبري من المولي جل و عل ،
و من يشعر بالرضي يشعر بالجمال من حوله...

ربنا يسعدكم...و يحفظكم من كل سوء
تحياتي لحضرتك و للاسرة الكريمة
دمتي بألف خير

Unknown said...

أخلاقنا...اسلامنا
إيمانا منا بأن حال العالم ...لم ولن ينصلح... إلا بالاسلام
وإيمانا منا بأن اسلامنا...لم ولن ينصلح ...إلا باأخلاق
اتفقنا...أو وفق الله بيننا ...لتكوين أول حملة للأخلاق...لتحقيقها...والسمو بها...والعمل بها بإذن الله
...................
من نحن
مجموعة من الشباب ...أهمهم حال أمتنا...وعروبتنا...وأوطاننا
فوفق الله بينناعلى الإجتماع على هذه الحملة...ولنطلقها حتى تصل إلى عنان السماء...علها تشفع لنا يوم القيامة
وبإذن الله ... سوف نعلن في البوست القادم عن المدونات والمواقع التي تدعم هذه الحملة
...................
وقد تم بحمد الله إنشاء مجموعة أخلاقنا إسلامنا البريدية على
yahoo groups
وسننشر بها ان شاء الله ما يتم انزاله من مقالات وفعاليات الحملة
وللاشتراك في الحملة...اضغط على الرابط التالي
http://groups.yahoo.com/group/akhlakona/
Group Email Addresses
Related Link
http://groups.yahoo.com/group/akhlakona/www.ana-insan.blogspot.com

Yahia said...

ساعات كتتتير بنفرح أو بنكتأب من غير سبب ، بس الواقع ا في سبب بيخلي الواحد في الحاله دي ومش مهم يكون واضح او مش واضح ومش مهم يكون كبير او صغير بس المهم ان فيه حاجة. لو عايزه اجابة عن السؤال بتاعك وعايزه تعرفي السبب أنا بجد عارف ليه ولو قولتلك هتقولي مغرور فمش هقوله وهخبيه في قلبي بس بجد احب اقولك ان كل يوم الواحد بيتعلم حاجة جديدة في حياته حتى لو مختش باله او افتكر ان عرف كل حاجة عن موضوع محدد بس بيلاقي نفسه برده فيه جديد، على العموم عشان مطولش احب اقولك هنا ومن موقفي هذا أني أحبك و.... بس خلاص .... كفاية

سلام

daktara said...

احيانا الواحد بيصحي يلاقي نفسه مبسوط النهاردة ومن غير سبب
واحيانا يلاقي نفسه قرفان ومش طايق دبان وشه وبرضه من غير سبب
اهي كده حكم بقي

انظر حولك
د. خالد عزب

daktara said...

الأخ يحيى جوزى


غريبة قوي دي
هل ليها علاقة بالبوست السابق
ويعني ايه الاخ جوزي
متمشيش مع بعض ابدا , امال اتجوزتم ليه واتقفل عليكم باب واحد او حتي بابين باب الشقة وباب غرفة النوم
متنفعش دي خالص

Ahmed Al-Sabbagh said...

ربنا يكرمك يارب

ودايما نشوفك مبسوطة وفى احسن حال

تدوينة جميلة بجد

تحياتى
أحمد

Anonymous said...

يا دوبا يا حبيبتى ربنا يسعدك بس تعرفى انا اظن قربك من ربنا هو الاصل فى كل السعاده اللى حاساها دى وبرضه سوسف العسول اكيد جزء ويحيى برضه بس الاصل صدقينى فى رضى ربنا عنك ربنا يرضيكى ويهنيكى دايما انتى وسوسف ويحيى اختك حنين القلب

Anonymous said...

يا دوبا يا حبيبتى ربنا يسعدك بس تعرفى انا اظن قربك من ربنا هو الاصل فى كل السعاده اللى حاساها دى وبرضه سوسف العسول اكيد جزء ويحيى برضه بس الاصل صدقينى فى رضى ربنا عنك ربنا يرضيكى ويهنيكى دايما انتى وسوسف ويحيى اختك حنين القلب

تخاريف خاصه! said...

ربنا يديم عليك السعاده...

بوست اسعدنى كتير...بجد...

خلانى انشكح..
:)

محمد العدوي said...

ربنا يديم الرضا .. والانبساط ..

والنيسكافيه ...

خمسة فضفضة said...

السلام عليكم ورحمة الله وبركاته

الرضا هو السبب الاساسي والاول في الشعور بالسعاده والوصول الي قمة الفرح والنشوه ، لو الواحد راضي باللي ربنا كاتبه عليه اكيد اكيد هايبقي سعيد ومبسوط وحاسس ان الدنيا بتضحك من حواله اما لو العكس حايحس كل حاجه مكشره وهايشوف كل الالوان غامقه


ربنا يسعد ايامك يا دوبا ويتم عليكي فرحتك بيوسف ويقربك اكتر واكتر من ربنا


استغفر الله العظيم الذي لا اله الا هو الحي القيوم واتوب ليه
لا اله الا انت سبحانك اني كنت من الظالمين

صالح سعيد said...

السلام عليكم
اذيك يا هبه
وكل سنه وانتى طيبه
ويا رب تبقى مبسوطه كده على طول
وتحققى كل امنياتك فى العام الجديد
اول زياره لمدونتك ولن تكون الاخيره باذن الله
والبوست كويس بجد وفعلا سر سعادة الانسان هو مدى قربه من الله سبحانه وتعالى
اتمنى تشرفينى بزيارتك لمدونتى المتواضعه
ويهمنى رايك
ارق تحية

Unknown said...

ربنا يسعدك ويملا حياتك فرحة وسعادة وراحة بال، وتشوفي يوسف في الكوشة
وتنوري حياتك بالاستغفار على طول
روحي الهي يفرح قلبك زي ما دخلتي الفرحة على قلوب اللي قرأوا الكلام ده

أُكتب بالرصاص said...

انت جبتي الخلاص

فعلا
إذا اصلحنا العلاقة بيينا وبين الله

كل الامور الاخرى هاتنصلح اتوماتيكيا


بس ربنا يقدرنا ونقدر

فى القلب said...

الله اللهالله يا ست هبه يا قمر

بدون تعقيد وأنسيابيه كتبتلنا أروع وأحكم بوست

عارفه يا هبه أنى بحسك حدقريب من دمنا كلنا أختنا بنتنا مامتنا

هههههههه

بلاش الاخيره خلاص متزعليش

ربنا يخليكى لينا يا رب

truelove said...

هوبة ليكي تاج عندي تعالى بقى علشان تجاوبيه وانتي في المود الحلو ده يالا بسرعة

ABUL_HASAN said...

السلام عليكم ورحمة الله وبركاته...دي اول زيارة ليا هنا ياريت تسمحي لي بشرف التعليق واني اكون صديق دائم للمدونة...الموضوع هايل ورائع...وصحيح الانسان لما بيحس انه بيرضي ربنا وان ربنا راضي عنه...بيحس ان كل شيء حواليه جميل وان الفرحة في كل شيء حواليه.وعلى العكس تماما مهما عمل الانسان وهو حاسس ان ربنا مش راضي عنه عمره ما هيحس بالسعادة ابدا.ربنا يديم عليك السعادة يارب ويبارك لك في يوسف سلامي له

د/اجدع بنوته said...

يارب يديم عليكى الفرح

ويقويكى ع عبادة ربنا اكتر واكتر

ويباركلك ف استاذ يحيى ويفضل مرتاح نفسيا ع طول

ويخليلك يوسف يارب ويفرحك بيك وبكل ايامه معاكى يارب

رحــــيـل said...

ربنا يجعل كل ايامك سعد وهنا

وتكونى مبسوطه وسعيده دايما

ويفرحك بيوسف يارب

تحياتى وحبى

Omar... [ خروشات ] said...

تعرفى؟

انا اكتر انسان سعيد بهذا البوست

و اللى اسعدنى اكتر تعليق الاستاذ يحيى


المسئلة بسيطة جدا والله

مراتى بتسلم عليكى و بتقولك نصيحة بسيطة وهى:

عيشى حياتك وانتى سايبه ايدك خالص


اخوكم عمر،

son's egypt said...

السلام عليكم
جزاكي الله خيرا علي النصيحة الغالية
والدال علي الخير كفاعله

البِـئرُ والظمّأْ said...

عسوله قوي انتي يا هبه



انا مبسوطه قوي
لاني بس جيت قريت البوست بتاعك
و طبعا من وجهة نظري ببقا في قمة السعاده
لما بقرب من ربنا




تحياتي يا هوبه
زيزي

shahy said...

اة ياني
منك لله ياشيخة
هو انا هالقيها منك والا من زوجك
الأخ يحيى زوجك يالهوووووووي

اقول عليكي اية بس

ربنا يفرح قلبك ويسعدك على طول
اقولك على حاجة وماتضحكيش عليا
انا كمان فرحانة قوي من تعليق يحيى بس هاموت واعرف هو بيتكلم على اية
اوعي تسبيني اموت
لازم تسألية وتقوليلي على طول
انا مستنية اهو

اوعي تتأخري

أحساس لسه حى...كلام من جوه روح لكل روح said...

عزيزتى
شوفى طول ما جواكى الرضا باللى مقسوم والموجود هتفضلى مبسوطة

وبلوجات ايه اللى عديتى عليها وانا فييين روحت اوك ماشئ هنعديها المره دى علشان انتى مبسوطة ودى مناسبة سعيدة

تصدقى انتى فى نعمة جميلة السعادة والرضا يا بختك

متخفيش مسكت الخشب ودعيتلك كمان

سلام

no chance said...

السلام عليكم
رينا يسعدك دايما

تحياتى

مدحت محمد said...

ربنا يجعل ايامك كلها سعادة ويحفظلك ابنك وتشوفيه حاجة كبيرة
ويهديلك جوزك
ويرضى عليكى ربك
ياهبة

kikooooooooo said...

سلاموووووووووو عليكووووووووووو
أنا كنت فاتح يجي عشرتاشر بلوج كده عشان أعلق فيهم بس لما قريت البوست بتاعك حسيت بفرحة غريبة كده فقلت أعلق عندك الأول ... قلت لنفسي في أمل ولسه في ناس فرحانة أهيه رغم غلاء الأسعار وارتفاع سعر الطوب وخروج مرتضي منصور من السجن ..... بس بجد فرحت جدا واديتيني أمل في الحياة ...
يارب يسعدك علي طول ياااااااااااااارب

كن معكم ..,
كيكوووووووووووو

Anonymous said...

يا رب دايما مبسوطه ومرتاحه وقربية من الله
والله يخليلك ابنك وزوجك ويتمم عليكم السعاده

مدونتك رائعه والبوست الي فات بجنن

RoReE

لحظة said...

انا سعيده جدا لسعادتك
بافرح قوي لما بشوف حد فرحان
وفرحان بايه
بنعم ربنا الغالية اللي بين ايديه

زمان وانا عندي 18 سنه كده
كان ليا بنت عم اتجوزت
وكانت اكبرنا واول واحده اتجوزت فينا
وربنا رزقها بزوج صالح ورائع ومتفاهم
وبنوته زي القمر
في مرة قعدت معاها
وقلتلها
الواحده ربنا يديها بيت وزوج محب زي زوجك وبنوته زي القمر كده هتعوز ايه تاني من الدنيا

ولما الدنيا لفت
وكبرت اكتر لقيت ان الواحد بيعوز حاجات كتير

ولما عقلت بقى

لقيت ان الواحد يغتنم لحظات السعاده اللي بين ايديه
ويفرح باللي ربنا مديهوله

ومايفوتش لحظة
على راي بتوع فودافون

مش قالوا
السعاده في الرضا وراحة البال

ربنا يعدك ويهنيكي ويديكي ويرضيكي

ويجعللك زوجك كما تحبين
ويجعلك له كما يحب

ويبارك في ابنك
ويرضى عنه
ويرزقك بره

امين

لحظة said...

اه نسيت

حلو قوي مج النسكافيه اللي فوق ده

جريتي ريقي

السـيد شبـل said...

هبه
انا زعلت من ردك على تعليقاتى اللى فاتت
انت ممكن تكونيش مهتمه بالسياسه ... حقك طبعا ... بس اكيد فيه ناس لازم تكون مهتمه
... وبتشوف انها شىء اساسى فى حياتنا... اكيد مش هشوف ممارسات صهيونيه وهسكت ... لان الساكت عن الحق شيطان اخرس
... ده مطلوب وده مطلوب صدقينى

عموما
تمنياتى لكى بمزيد من السعاده ... يارب

klmat said...

ماشاء الله
ربنا يسعدك ويفرح قلبك
هو ذكر ربنا بيطمئن القلوب
وبيبارك واسفه عالى تأخيرى
وربنا يخليكى بحثك لنا على الآستغفار
وحمد ربنا على نعمه
تدوينه جميله جدا
تحياتى وسلام

S H A H said...

دوبا هانم
=========
اسف على التاخير و على القصة و على كل حاجة فعلا انا محرج منك جداااااااا

بس والله فرحتلك في البوست ده و حسيته
بقالي كتير مجاليش يوم زي ده

اللهم لا حسد و ما شاء الله طبعا

بس جميل ان من كتر فرحتك تبقي عايزة كل الناس تعرف انك مبسوطة كدة

تحياتي لزوجك العزيز و ربنا يخليكم لبعض , انا متابع اشتياقك من البوست اللي فات :)

و يوسف
ايه رأيك تشوفيه طيار!!؟
لايقة عليه و على اسمه
كابتن يوسف

و يفضل معاكي حبابيبك طول العمر
وطولة العمر ليكي

وسلام مؤقت

Soooo said...

اول حاجه هحمد عليها ربنا النهارده

ان ربنا عوضني باخوات زيك وزي كل المدونين اللي بجد بقيت حاسس انهم اخواتي



الحمدلله



سلاموووووووووووووز

MAKSOFA said...

ربنا يسعدك

غمض عينيك said...

بوست جميييييييييييييييللل
اوي اوي
يارب دايما تكوني سعيدة وفرحانة كده ياهبه
الله بجد انا شوفت البوست جا الصبح وكان يوم جميل اوي

يارب كل ايامك فرحه

محمد سمير

S H A H said...

لزومها ايه بقى الفضايح دي يا دوبة, انا كنت بواسي الراجل في محنتته و بقوله انت مش لوحدك

قومي تفضحيني و في بيتي و كمان 31 و نوص

و جمهور المعجبين اللي بيضربولي 10 كومنتات في كل بوست دول مين يرجعهوملي بعد السياح اللي قلتيه ده

االبرج برئ منك يا دوبة
انا هحدفك على الدلو

و ليكي يوم

نفرتيتي said...

ازيك يادوبا اتمني انك تكوني بخير
علي فكره انا غيرت اسم البلوجر خليت

www.nefrtity-lolo.blogspot.com

لـــى لــــىِ said...

ايوة كدة
انا بحب التفاؤل والسعادة بالحياه

نورى اكتر
وافرحى اكتر
واسعدى اكتر

تعالى زورينى
وانتى تضحكى اكتر

فى إبتسم شوية

لى لى

قضية عم أحمد Ahmed Case said...

أقولك طالما مبسوطة اوي ما تسأليش عن السبب
عيشى السعادة وحسى بنعمة ربنا

وعلى صوتك بالبسمة اوي خلى غيرك يتعدي منك

حل وسط said...

كل الحاجات اللي انت قلتيها دي تبسط بلد

بس ممكن ابدل مج النسكافيه بمج كاكاو


ربنا يبسطك كمان وكمان

عابد الرحمن said...

الحمد لله ... الحمد لله ... الحمد لله
استمري عليها ليزيدك الله نعمة البهجة التي منحك اياها
استغفر الله ... استغفر الله ... استغفر الله
استمري عيها ليجعل الله لكي من كل هم فرج
اختي الكريمة التي احسبها عند الله من المؤمنين
نسال لكي الله الثبات
ولكن احب ان اعقب على الموضوع السابق الذي من بدايتة لم اود ان اكمل ان اقراءه
ليس لسوءه حاش لله ولكن لانه لمس الجروح

ما ابغي ان اخبرك به انك صانعة الحب في البيوت
وان وجدتي زوجك انغمس في مشاكل الحياة ودوماتها فاخرجيه برقتك وايمانك واخلاصك منها بكل رقة
وتحمليه اختي الكريمة
ويكفي ان الرب عز وجل منحك هذا الحب في صورة متجسدة في الحبيب يوسف ابنكم
ترى حبكم يسير امام عينك يكلمك يحبك يلاعبك يؤنس وحدتك عند انشال الزوج الحبيب
اخيكي في الله
الاستاذ عابد الرحمن

أشرف حمدي said...

يااااااااه
ايه الروقان ده :) من زماااان وانا نفسي في لحظات هادئة زي كده
طب حجرب النسكافية المضروب يمكن يساعد
ضغط الشغل مخللي الواحد عامل زي فرقع لوز
تحياتي

همسات دافئه said...

دوبا
عارفه البوست دا عجبنى فى ايه
فى ان دايما الناس الحزينه هى الى بتتكلم وتشوف اتفه الأسباب الى تخليها سبب حزنها
قليل اوى لما بلاقى حد بيدور على اسباب للسعاده
ربنا يديم سعادتك يارب واراهنك انك أسعدتى كل الى عدى على البوست ده
تحياتى
شيماء:)

ولــــــــــو said...

بوست من اجمل ما قريت من فتره بجد على اد ماهو بسيط لكنه فرحني بجد واداني احساس بالسعاده وخلاني اتساءل عن اي حاجه ممكن تكون خلتني سعيد
تصدقي لقيت حاجات كتير اوي لازم معاها اني اقول الحمد لله
انا باتمنالك كل الخير ويارب يديم عليكي سعادتك

سكون الليل said...

وحشانى اوى يا بنت ووحشنى الكلام معاكى

Doaa Ebrahim Aaql said...

ربنا يديم عليكى السعادة يارب
وراحة البال

ولو النسكافيه
زى اللى فى الصورة كده

تبقى بجد
حاجة تفرح
هههههههههه


سلامى ليكى يا جميلة

Unknown said...

انا جيت متاخررررر
معلش والله كنت بمتحن
ومش مججمعة قوتي كدا للعودة مش مصدقة بمعني اصح
بوستك جميلللللللللللللللللللللل موت
وبجد كل ما بنقرب من ربنا بتزيد حلاوة الايمان في قلبنا ربنا يزيدك فرحة وساعدة يارب دايما ويباركلك في ابنك يارب ويكبر كمان وكمان
وشكرا علي رايك في مووضوعي بجد اسعدني
سلام

NeRmeeN said...

ربنا يبسطك كمان و كمان يا دوبا ...ويخليكى بشوشوة كده على طول..ويزودك طاعة و قرب ليه


بس نصيحة منى العين وحشة يا اوختشى :ي دارى على شمعتك تقيد

معلش بقى انا واحدة مقعدة شوية


تحياتى ليكى يا جميلة

سندباد said...

ربنا يديم عليكي الحالة الجميلة دي
واسف علي التقصير بس ضغط الشغل جزاكي الله خيرا وتقبل الله منا ومنكم
تحياتي

hoda omran said...

انى اعرف حد جميل زيك ده فى حد ذاته يخلينى سعيدة اووووووى

Ehab said...

هو انتي بتجمعي الكومنتات
يعني مستنيه ايه علشان تنزلي حاجه جديده لما يبقوا سبعتلاف كومنت
سلاااااااااااااام
سلمي على يحي ويوسف

Dr. Kafy said...

طبعا إذا سعيت إن ربنا يرضى عنك ربنا بيرضى عنك و يخلى كل خلقه راضيين عنك

مدونتك جميلة

و ربنا يزيدك هدى و تقى

sahr said...

ربنا يسعدك علطول
ويباركلك في يوسف ويارب تشوفيه راجل كبير بس عروسته عندي احلى عروسة في الدنيا

عاشــــــ النقاب ـقــــة"نونو" said...

بيتهيالي ان دة اول تععليق لي هنا
انتي كمان ام يوسف انا كمان ام يوسف
يوسف ابني 6 سنين
وانتي بقى عنده اد ايه ربنا يخليه وتشوفيه عريس يا رب
انا بقى النعم كتييييييييرة اوي هقول الحمد لله على ايه ولا ايه
هكتفي دلوقتي اني اقول الحمد لله على نعمة الاسلام وكفى بها نعمة
بارك الله فيكي يا اختي وعلى الفضل دة التدبر والتفكر في نعم الله دي عبادة منسية تؤجري على تذكرتنا بيها
جزاك الله خيرا

مونتي بوكيه ورد said...

ربنا يكرمك يارب شفتك بالصدفه واعدتين لذكريات جميله وبجد هتشجعيني ارجع اكتب بمدونتي بوكيه ورد تاني
و مش مشكلهه المذاكره
ما انا كدا كدا مش ذاكرت لسه
:$

مونتي بوكيه ورد said...

حقيقي لو كل واحده حسست ال بيحبها انها مهتمه بيه كدا ولو حتي بعتاب بحب زيك وبامل انه يعود لها لن يكون هناك فراق ابدا بين الازواج
وانا شخصيا من الناس ال بيحبوا الاكتفاء الذاتي بزوجه تملك مثل احاسيسك